الماتىدا ەسىرتكى دايىنداۋمەن اينالىسقان كۇدىكتىلەر ۇستالدى

Polisia.kz جازۋىنشا, باس ايىپتالۋشىنىڭ كولىگىن پوليتسيا قىزمەتكەرلەرى جاندوسوۆ كوشەسىندە بوگەدى. 30 جاستاعى ە. ەسىمدى ازاماتتىڭ كولىگىنەن ەرەكشە ءيىسى بار كريستالدانعان زات سالىنعان سومكە تابىلدى.

«ۇستالعان ازامات وزىنەن تاركىلەنگەن زات مەفەدرون ەسىرتكى زاتى ەكەنىن ايتتى. ەر ادامنىڭ ايتۋىنشا, ول بۇل ەسىرتكىنى دوستارىمەن بىرگە سينتەتيكالىق ەسىرتكى ءوندىرۋ ءۇشىن ۇيىمداستىرعان ۋاقىتشا زەرتحانادا جاساعان. زەرتحانا الماتى وبلىسى, ىلە اۋدانى اۋماعىنداعى جالدامالى ۇيدە ورنالاسقان. عيماراتتى ءتىنتۋ كەزىندە زەرتحانالىق قۇرال-جابدىقتار, شيكىزات پەن ساتۋعا دايىن ونىمدەر تابىلىپ, تاركىلەندى», دەدى الماتى قالالىق پوليتسيا دەپارتامەنتى باستىعىنىڭ ورىنباسارى ديدار احانوۆ.

جەدەل دەرەكتەرگە سايكەس, وندىرۋشىلەر ەسىرتكىنى وزدەرى تاراتقان. تاعى ەكى كۇدىكتى – 28 جاستاعى م. ەسىمدى ازامات پەن 29 جاستاعى س. ەسىمدى ازامات ەسىرتكى قىلمىسىنا قارسى كۇرەس باسقارماسى مەن پوليتسيانىڭ ارنايى جاساقتارىنىڭ قىزمەتكەرلەرى جاساعان ارنايى ءىس-شارا كەزىندە بولدى.

كۇدىكتىلەر قاماۋعا الىندى.

قىلمىستىق ءىستى قر قك-ءنىڭ 297-بابى بويىنشا بوستاندىق اۋداندىق پب-عا قاراستى پوليتسيا ءبولىمى تەرگەپ جاتىر. سوت-حيميالىق ساراپتاما تاعايىندالدى.