الماتى تاۋلارىندا اداسىپ كەتكەن تۋريستەر قۇتقارىلدى

29 مامىر تۇنگى ساعات 01.06-دا رەسپۋبليكالىق جەدەل-قۇتقارۋ جاساعىنىڭ كەزەكشى بولىمىنە ايۋساي شاتقالىندا ەر ادام جوعالىپ كەتكەنى تۋرالى الماتى توتەنشە جاعدايلار دەپارتامەنتىنەن حابارلاما كەلىپ ءتۇستى.

ءۇش ادامنان تۇراتىن تۋريستەر توبى ايۋساي شاتقالىنا كەتكەن. الايدا كەش تۇسكەنشە تۋريستەر ۇيلەرىنە ورالماعان. ولاردىڭ تۋىستارى الماتى قالالىق تجد-عا حابارلاسىپ, كومەك سۇراعان.

وقيعا ورنىنا جەكە قۇرامنىڭ 7 ادامى بار جەدەل توپ, ونىڭ ىشىندە 1 كينولوگيالىق ەسەپ ىزدەستىرۋ-قۇتقارۋ جۇمىستارىن ىستەگەن.

ساعات 03.10-دا تجم قىزمەتكەرلەرى ايۋساي شاتقالىنا كەلىپ, ىزدەۋگە كىرىستى. قۇتقارۋشىلار 2 توپقا ءبولىندى: ءبىرىنشىسى كوسموستانتسيا ايماعىنان ىزدەۋدى باستادى, ال ەكىنشىسى پروحودنوە شاتقالىنان ءوتتى.

«جوعالعان تۋريستەر ايۋساي شاتقالىنداعى ەكىنشى سارقىرامانىڭ ۇستىنەن تابىلدى. ەشقايسىسىنا مەديتسينالىق كومەك قاجەت بولماعان. ناتيجەسىندە ءۇش ادام, 1993 جىلى تۋعان ەر ادام جانە رەسەيدىڭ ەكى ازاماتى - 1990 جىلى تۋعان ايەل جانە 1980 جىلى تۋعان ەر ادام قۇتقارىلدى», دەپ حابارلادى رەسپۋبليكالىق جەدەل-قۇتقارۋ جاساعىنىڭ ءباسپاسوز قىزمەتى.

ەستەرىڭىزگە سالا كەتەيىك, الماتى تاۋلارىندا جوعالىپ كەتكەن اۋستراليا ازاماتىنىڭ ءمايىتى ايۋساي شاتقالىنان تابىلعان ەدى.