الماتىدا اسكەري جۋرناليستەردىڭ جيىنى ءوتىپ جاتىر

وعان قر ۇلتتىق ۇلانىنىڭ باس قولباسشىلىعى مەن وڭىرلىك قولباسشىلىقتارىنىڭ ءباسپاسوز قىزمەتتەرى مەن ۇيىمداستىرۋشى-تىلشىلەرى جانە قر ۇلتتىق ۇلان اكادەمياسى وكىلدەرى قاتىستى. سونداي-اق باسقوسۋدا ىرگەلى جوعارى وقۋ ورنىنىڭ وقىتۋشىلار قۇرامى بولدى.

پراكتيكالىق ساباقتار مەملەكەت باسشىسىنىڭ قوعامدا جانە مەملەكەتتە تۇراقتىلىق پەن قاۋىپسىزدىكتى ساقتاۋ جونىندەگى يدەيالارى توڭىرەگىندە جەكە قۇراممەن يدەولوگيالىق جۇمىستى جانداندىرۋ, سونداي-اق جاھاندىق سىن-قاتەرلەرمەن قازاقستاندىق جۋرناليستيكانىڭ قازىرگى زامانعى پروبلەمالارىن زەردەلەۋ ماقساتىندا وتكىزىلدى.

- بۇگىندە ۇلتتىق ۇلان اسكەري قىزمەتشىلەرىنىڭ باتىلدىعى مەن جانقيارلىعىنىڭ وڭ ۇلگىلەرى نەگىزىندە ءبىز بۇقارالىق اقپارات قۇرالدارى ارقىلى جەكە قۇرامدى جاڭا قازاقستاندىق پاتريوتيزم مەن وتانعا ادالدىق رۋحىندا تاربيەلەپ وتىرمىز, - دەدى ۇلتتىق ۇلاننىڭ اقپاراتتىق-باسپا ءبولىمىنىڭ باستىعى –«قالقان» گازەتى مەن «بۇركىت» جۋرنالىنىڭ باس رەداكتورى پولكوۆنيك ەربولات سۇلتانوۆ.

جيىننىڭ ءبىرىنشى كۇنى «اسكەري قىزمەتشىلەردىڭ باتىلدىعى مەن ەرلىكتەرىنىڭ وڭ مىسالدارىندا جەكە قۇرامدى تاربيەلەۋدە باق رەسۋرستارىن پايدالانۋ», «Facebook, Instagram جانە YouTube الەۋمەتتىك جەلىلەرىندە ءباسپاسوز قىزمەتى وفيتسەرلەرىنىڭ جۇمىسىنىڭ يننوۆاتسيالىق نىساندارى مەن ادىستەرى, جاعىمسىز جانە دەسترۋكتيۆتى ەلەمەنتتەرگە اقپاراتتىق قارسى تۇرۋ»تاقىرىپتارىندا دارىستەر وتكىزىلدى. وندا جيىنعا قاتىسۋشىلار ۇلتتىق ۇلان تۋرالى اقپاراتتاردى ينتەرنەتتە تاراتۋدى ۇيىمداستىرۋ ماسەلەلەرىن تالقىلادى.

ءال-فارابي اتىنداعى قازۇۋ دوتسەنتى الەكساندر روجكوۆ «وقيعالىق كوممۋنيكاتسيالار جانە PR-اقپارات ديزاينى» تاقىرىبىندا ءدارىس وقىدى. ال «SMM-ءنىڭ دامۋ ترەندتەرى» تاقىرىبىندا ءدارىستى «sector X» راديوسىنىڭ PR-قىزمەتىنىڭ جەتەكشىسى انۋار ۋشۋروۆ جۇرگىزدى.

العاشقى كۇننىڭ جوسپارلى ساباقتارىنان كەيىن ءال-فارابي اتىنداعى قازۇۋ وكىلدەرى ۇلتتىق ۇلاننىڭ اسكەري جۋرناليستەرىنە ستۋدەنتتىك قالاشىق اۋماعىن ارالاتىپ, جۋرناليستيكا فاكۋلتەتى, مۇراجاي جانە كىتاپحانا بويىنشا تانىستىرۋ ەكسكۋرسياسىن وتكىزدى.

ايتا كەتۋ كەرەك, 2022 جىلدىڭ قورىتىندىسى بويىنشا رەسپۋبليكالىق جانە وڭىرلىك بۇقارالىق اقپارات قۇرالدارىندا قر ۇلتتىق ۇلانى اسكەري قىزمەتشىلەرىنىڭ قىزمەتى تۋرالى بارلىعى 9947 ماتەريال جارىق كورگەن. سالىستىرمالى تۇردە الار بولساق, 2021 جىلدىڭ كورسەتىلگەن كەزەڭىندە تۇرلى باق-تا 4655 ماتەريال جاريالانعان.  

جيىننىڭ ەكىنشى كۇنى اسكەري جۋرناليستەرگە ءال-فارابي اتىنداعى قازۇۋ جۋرناليستيكا فاكۋلتەتىنىڭ باسپا-رەداكتورلىق جانە ديزاين ونەرى كافەدراسىنىڭ اعا وقىتۋشىسى ىزباسارتۇرعىنباەۆ «تسيفرلاندىرۋدىڭ باسپا-پوليگرافيا ىسىنە اسەرى» جايلى لەكتسيا وقىدى. «شىعىس» وڭق-نىڭ ءباسپاسوز قىزمەتىنىڭ باستىعى كاپيتان باعدات امانگەلدى «الەۋمەتتىك جەلىلەردە كەزىگەتىن اقپاراتتىق قاۋىپ-قاتەردى انىقتاۋ مەن جويۋ» تاقىرىبىندا ساباق وتكىزدى. سونداي-اق ول اقپاراتتىق شابۋىلمەن كۇرەس بارىسىندا قولدانۋعا بولاتىن ءتۇرلى ءادىس-تاسىلدەر جايلى ويىن ورتاعا سالدى.

جيىن بارىسىندا قر ۇلتتىق ۇلانىنىڭ باس قولباسشىلىعى مەن وڭىرلىك قولباسشىلىقتارىنىڭ باسپاسوز قىزمەتتەرى ماماندارى باق سالاسىنداعى قر زاڭناماسى بويىنشا سىناقتان ءوتتى.  مۇندا اسكەري جۋرناليستەرگە كۇندەلىكتى ومىردە كەزىگەتىن جاعداياتتار مەن سالالىق زاڭعا قاتىستى ساۋالدار قويىلدى. بۇدان بولەك ولاردىڭ وزدەرىنە جۇكتەلگەن مىندەتتەرى مەن جاۋاپكەرشىلىكتەرى سۇرالدى.

لەكتور ايمان قايمۋلدينا مەن الما كەنجەبەكوۆا اسكەري جۋرناليستەرگە ۇلتتىق ۇلاننىڭ الەۋمەتتىك جەلىدەگى ابىروي-بەدەلىن قالىپتاستىرۋ مەن ونى ساقتاپ قالۋدىڭ جولدارىن كورسەتتى. بۇل جۋرناليستەر ءۇشىن اسا ماڭىزدى ارى قىزۋ تالقىلانعان كەزدەسۋلەردىڭ ءبىرى بولدى.  وسىدان كەيىن جان-جاقتان جينالعان باسپاسوز قىزمەتكەرلەرى ءبىر-بىرىمەن تاجىريبە الماستى. ولار بىلتىر جانە 2023 جىلدىڭ ءى توقسانىندا اتقارعان جۇمىستارى جايلى ەسەپ بەردى.

ماسەلەن, 2022 جىلى قر ۇۇ ءباسپاسوز قىزمەتى ەلىمىزدەگى بۇقارالىق اقپارات قۇرالدارىندا 2 277 ماتەريال جاريالاعان.  ال «ورتالىق» وڭق – 1893, «وڭتۇستىك» وڭق – 1384, «شىعىس» وڭق – 1109, «باتىس» وڭق – 919, ۇۇ اكادەمياسى – 408 ماتەريال شىعارعان.

وڭىرلىك قولباسشىلىقتاردان كەلگەن ماماندار بيىلعى ءى توقساندا ورىندالعان جۇمىستارمەن دە تانىستىردى.

«2023 جىلدىڭ 1-ءشى توقسانىنىڭ قورىتىندىسى بويىنشا رەسپۋبليكالىق جانە وڭىرلىك بۇقارالىق اقپارات قۇرالدارىندا قازاقستان رەسپۋبليكاسى ۇلتتىق ۇلانىنىڭ «باتىس» وڭىرلىك قولباسشىلىعىنىڭ جاۋىنگەرلىك قىزمەتى مەن كۇندەلىكتى تىنىس – تىرشىلىگى تۋرالى 415 ماتەريال جارىق كوردى. ونىڭ ىشىندە باسپادا – 87, (جازبا, سۇحبات, ماقالا, رەپورتاج سياقتى پۋبليتسيستيكالىقجانرلار) تەلەديداردا – 39, اقپاراتتىق اگەنتتىكتەردە جانە الەۋمەتتىك جەلىلەردە - 185 ماتەريال جاريالاندى», دەدى «باتىس» وڭق ءباسپاسوز قىزمەتىنىڭ باسشىسى كاپيتان ەرتۋعان اۋباكىر.

ۇلتتىق ۇلاننىڭ اقپاراتتىق-باسپا ءبولىمىنىڭ باستىعى – «قالقان» گازەتى مەن «بۇركىت» جۋرنالىنىڭ باس رەداكتورى پولكوۆنيك ەربولات سۇلتانوۆ وڭق ءباسپاسوز قىزمەتىنىڭ باسشىلارىنىڭ بايانداماسىن تىڭداپ, ولاردىڭ جۇمىستارىنداعى ولقىلىقتار مەن جەتىستىكتەرگە توقتالدى. سونىمەن قاتار حالىقتى «ۇلتتىق ۇلاننىڭ» قىزمەتى جايلى اقپاراتپەن باسىلىم بەتتەرىندە جانە ينتەرنەت رەسۋرستارىندا ءجيى ءارى ساپالى ناسيحاتتاۋ كەرەگىن باسا ايتتى.

ەرەكشە اتاپ وتەتىن تاعى ءبىر جايت, جيىن بارىسىندا وزگە دە مەملەكەتتىك ورگانداردان كەلگەن قىزمەتكەرلەرمەن كەزدەسۋ ءوتتى. الماتى وبلىسى پوليتسيا دەپارتامەنتىنىڭ ىشكى جانە سىرتقى كوممۋنيكاتسيا ءبولىمىنىڭ باسشىسى ەرنار سايدىلدين جانە الماتى قالاسىنىڭ توتەنشە جاعدايلارلاردى جويۋ باسقارماسىنىڭ اعا ينجەنەرى, ازاماتتىق قورعاۋ سالاسىنىڭ مايورى گۇلدانا نۇرىمبەتوۆا باستاعان ازاماتتار وزارا ىقپالداستىق جايىن ءسوز ەتتى. سونداي-اق وزگە قۇرىلىمداردان كەلگەن ماماندار دا جۇمىس تاجىريبەلەرىمەن ءبولىسىپ, پىكىر الماستى.

ۋنيۆەرسيتەت قابىرعاسىنداعى وقۋ-ادىستەمەلىك جيىننىڭ ەكىنشى كۇنى الماتى تەلەارناسىنىڭ عيماراتىندا اياقتالدى. مۇندا اسكەري جۋرناليستەردى الماتى تەلەارناسىنىڭ باس ديرەكتورىنىڭ ورىنباسارى عازيزا جاپاروۆا مەن ارنانىڭ اقپاراتتىق-ساراپتامالىق باعدارلامالار جوباسىنىڭ كوورديناتورى شىنار ساتىبالديەۆا قارسى الدى. ۇلتتىق ۇلاننىڭ باسپاسوز قىزمەتكەرلەرى تەلەارنا ۇجىمىمەن تانىستى. ارنا قىزمەتكەرلەرى قوناقتارعا «ارنايى جوبالار», «داۋىس جازۋ», «مونتاج جاساۋ» جانە ء«تۇسىرۋ پاۆيلونى» سەكىلدى كابينەتتەرى مەن ستۋديالارىن كورسەتتى. اڭگىمە بارىسىندا ارىپتەستىك بايلانىس جاساۋدىڭ ماڭىزدىلىعى ءسوز بولدى.

«اسكەري سالاعا قاتىستى اقپاراتتاردى نازارىمىزدان تىس قالدىرماۋعا تىرىسامىز. ەلىمىزدىڭ اسكەري الەۋەتى جايلى بىزگە كەلىپ تۇسكەن اقپاراتتار نەگىزىندە سيۋجەتتەر كورسەتەمىز. تاپسىرما بويىنشا دا تۇسىرىلىمدەر جاسايمىز. ءباسپاسوز قىزمەتكەرلەرىمەن بايلانىسىمىز جاقسى. ونىڭ ىشىندە ۇلتتىق ۇلاننىڭ ءباسپاسوز قىزمەتىندە اتاۋعا بولادى», دەدى شىنار ساتىبالديەۆا.

وسىلايشا ءۇش كۇنگە جوسپارلانعان وقۋ-ادىستەمەلىك جيىن جوعارى دەڭگەيدە جالعاسىپ جاتىر. جيىننىڭ سوڭعى كۇنى «بۇقارالىق اقپارات قۇرالدارىندا پاتريوتيزمدى ناسيحاتتاۋداعى اسكەري ءباسپاسوزدىڭ رولى» تاقىرىبىندا دوڭگەلەك ۇستەل وتەدى.

جانبولات كەنجەعۇل