پرەمەر-مينيستر ءاليحان سمايىلوۆتىڭ توراعالىعىمەن وتكەن مەملەكەت باسشىسىنىڭ سايلاۋالدى باعدارلاماسىن ىسكە اسىرۋ جونىندەگى رەسپۋبليكالىق شتاب وتىرىسىندا تۇرعىن ءۇي-كوممۋنالدىق شارۋاشىلىق ينفراقۇرىلىمىن كەشەندى جاڭعىرتۋ ماسەلەلەرى تالقىلاندى.
ۇلتتىق ەكونوميكا ءمينيسترى الىبەك قۋانتىروۆ پرەزيدەنت تاپسىرماسى بويىنشا ازىرلەنگەن ء«تاريفتى ينۆەستيتسياعا ايىرباستاۋ» باعدارلاماسىن ەنگىزۋ ارقىلى رەسپۋبليكا بويىنشا ەلەكتر, جىلۋ, سۋمەن جابدىقتاۋ جانە سۋ تارتۋ جەلىلەرىنىڭ توزۋىن ورتا ەسەپپەن 20%-عا تومەندەتۋ جوسپارلانىپ وتىرعانىن باياندادى. بۇل ازاماتتارعا كورسەتىلەتىن قىزمەتتەردىڭ ساپاسىن جاقسارتۋعا جانە اپاتتىق جاعدايلار سانىن ازايتۋعا مۇمكىندىك بەرەدى.
ول ءۇشىن 145 مىڭ شاقىرىمنان استام ينجەنەرلىك جەلىلەردى جوندەۋ قاجەت. وسىعان بايلانىستى بيىل وڭىرلەردەگى الەۋمەتتىك-ەكونوميكالىق جاعدايدى ەسكەرە وتىرىپ, تكش قىزمەتتەرى تاريفتەرىن كەزەڭ-كەزەڭمەن وزگەرتۋ كوزدەلىپ وتىر. ناتيجەسىندە, وسى جىلدىڭ وزىندە 5 مىڭ شاقىرىمنان استام ينجەنەرلىك جەلىلەردى جوندەۋ جانە تكش سالاسى قىزمەتكەرلەرىنىڭ جالاقىسىن ارتتىرۋ جوسپارلانۋدا.
يندۋستريا جانە ينفراقۇرىلىمدىق دامۋ ءمينيسترى مارات قاراباەۆتىڭ ايتۋىنشا, الەۋمەتتىك جاعىنان از قامتىلعان ازاماتتاردىڭ كوممۋنالدىق قىزمەتتەرگە شىعىندارىن ازايتۋ ءۇشىن ولاردى مەملەكەت تاراپىنان كورسەتىلەتىن تۇرعىن ءۇي كومەگى اياسىندا ءىشىنارا وتەۋ كوزدەلگەن. وتكەن جىلدىڭ سوڭىندا وتەماقى مولشەرى مەن ونى الۋعا ۇمىتكەرلەردىڭ قاتارىن ۇلعايتۋدى كوزدەيتىن وزگەرىستەر ەنگىزىلدى. 2023 جىلدىڭ I توقسانىنىڭ قورىتىندىسى بويىنشا 17 مىڭ وتباسىعا 372 ملن تەڭگەدەن استام تۇرعىن ءۇي كومەگى كورسەتىلدى.
ەنەرگەتيكا ءمينيسترى الماسادام ساتقاليەۆ دۇنيەجۇزىلىك بانك جانە KPMG حالىقارالىق كومپانياسىمەن بىرلەسىپ, رەسپۋبليكانىڭ 56 جىلۋ ەلەكتر ستانساسىنا تەحنيكالىق اۋديت جۇرگىزىلگەنىن باياندادى. ونىڭ قورىتىندىسى بويىنشا ستانسالاردىڭ تەحنيكالىق جاي-كۇيى مەن نەگىزگى تەحنيكالىق-ەكونوميكالىق كورسەتكىشتەر رەيتينگى جاسالدى. وسى ايدىڭ سوڭىنا قاراي كۇردەلى جوندەۋ جونىندەگى ءىس-شارالار جوسپارىن قامتيتىن كەشەندى ەسەپ دايىن بولماق.
وڭىرلەردە ءجۇرىپ جاتقان تكش ينفراقۇرىلىمىن جوندەۋ جۇمىستارى تۋرالى قوستاناي وبلىسىنىڭ اكىمى قۇمار اقساقالوۆ, قاراعاندى وبلىسىنىڭ اكىمى ەرماعانبەت بولەكپاەۆ, اقمولا وبلىسىنىڭ اكىمى ەرمەك مارجىقپاەۆ بايانداما جاسادى.
پرەمەر-مينيستر مەملەكەت باسشىسى سالاداعى كۇردەلى پروبلەمالاردى ەسكەرە وتىرىپ, ەلدىڭ تىرشىلىك كوزىنە قاجەتتى بارلىق جۇيەنى جاڭعىرتۋعا جانە كۇردەلى جوندەۋگە باعىتتالعان ء«تاريفتى ينۆەستيتسياعا ايىرباستاۋ» باعدارلاماسىن ىسكە اسىرۋدى تاپسىرعانىن ايتىپ ءوتتى.
«ول ءۇشىن ءبىز زاڭنامالىق تۇزەتۋلەردى, نورماتيۆتىك-قۇقىقتىق اكتىلەردى قابىلدادىق. بۇعان دەيىن تابيعي مونوپوليالار سۋبەكتىلەرىنىڭ ينۆەستيتسيالىق باعدارلامالارى مەن تاريفتەرىن تۇزەتە الماي كەلگەن ەدىك. ەندى وعان مۇمكىندىك تۋىپ وتىر», دەدى ءاليحان سمايىلوۆ.
وعان قوسا ۇكىمەت باسشىسى كوممۋنالدىق كاسىپورىندار ءتاريفتى تۇزەتۋ جانە جاڭعىرتۋ ۇدەرىسىن باستاۋ ءۇشىن قاجەتتى قۇجاتتامانى باياۋ دايىنداپ جاتقانىن اتاپ ءوتتى.
«بۇل ۇدەرىستى سوزبالاڭعا سالۋعا بولمايدى. جەلىلەر مەن ستانسالاردى كۇردەلى جوندەۋ جۇمىستارىن جەدەل باستاۋ ماڭىزدى. بۇل – كەزەك كۇتتىرمەيتىن مىندەت. اسىرەسە, بۇل – قۇرىلىس ماۋسىمى قىسقا جانە جىلۋ بەرۋ كەزەڭى ەرتە باستالاتىن سولتۇستىك وڭىرلەر ءۇشىن وزەكتى ماسەلە», دەدى پرەمەر-مينيستر.
ۇكىمەت باسشىسى قالىپتاسقان جاعدايدى ۇلتتىق ەكونوميكا مينيسترلىگى تاراپىنان كەتكەن ولقىلىق دەپ اتاپ ءوتتى. وسىعان بايلانىستى ءاليحان سمايىلوۆ ۆەدومستۆو باسشىسى الىبەك قۋانتىروۆقا ەسكەرتۋ جاساپ, ۇيلەستىرۋ جۇمىستارىنىڭ تومەن دەڭگەيدە جۇرگىزىلگەنى ءۇشىن تابيعي مونوپوليالاردى رەتتەۋ كوميتەتىنىڭ توراعاسى اسان دارباەۆقا سوگىس جاريالادى.
«كوممۋنالدىق قىزمەتتەردىڭ ساپاسىنا قاتىستى پرەزيدەنتتىڭ جانە حالىقتىڭ تاراپىنان ورىندى سىن ەستىپ كەلەمىز. الدىمىزداعى جىلىتۋ ماۋسىمىندا وتكەن قىستا ورىن العان توتەنشە جاعدايلارعا جول بەرمەۋ كەرەك. سۇرانىس قاتاڭ بولماق», دەدى ءاليحان سمايىلوۆ.
پرەمەر-مينيستر ينفراقۇرىلىمدى جاڭعىرتۋ ماقساتىندا كوممۋنالدىق كاسىپورىنداردىڭ ءتاريفتى تۇزەتۋ بويىنشا بەرگەن وتىنىمدەرىن جەدەل ەنگىزۋدى, جوندەۋ جۇمىستارىن جۇرگىزۋ ءۇشىن ماۋسىم ايىنىڭ سوڭىنا دەيىن جىلۋ جەلىلەرىنە تەحنيكالىق تەكسەرۋ جۇرگىزۋدى اياقتاۋدى, سونداي-اق 2024 جىلعا جوسپارلانعان قۇرىلىس-مونتاج جۇمىستارى بويىنشا جوبالاۋ-سمەتالىق قۇجاتتامانى جىل سوڭىنا دەيىن ازىرلەۋدى تاپسىردى.