ۇكىمەت باسشىسى ءاليحان سمايىلوۆتىڭ ورتا بيزنەس وكىلدەرىمەن وتكىزگەن كەزدەسۋىندە وڭدەۋ ونەركاسىبىن دامىتۋعا قاتىستى اۋقىمدى ماسەلەلەر قارالدى.
جيىنعا استانا, الماتى جانە شىمكەنت قالالارىنىڭ كاسىپكەرلەرى, «اتامەكەن» ۇكپ, سونداي-اق مينيسترلەر, قالا اكىمدەرىنىڭ ورىنباسارلارى مەن كاسىپكەرلىك باستامالاردى دامىتۋعا جانە مەملەكەتتىك قولداۋعا جاۋاپتى كۆازيمەملەكەتتىك سەكتور باسشىلارى قاتىستى.
ناۋرىزدا VIII سايلانعان پارلامەنتتىڭ ءبىرىنشى سەسسياسىنىڭ اشىلۋىندا مەملەكەت باسشىسى ەلىمىزگە ەكونوميكانى دامىتۋ جولىندا وزدەرىنە جاۋاپكەرشىلىك الا الاتىن كاسىپكەرلەردىڭ «جاڭا تولقىنى» قاجەت ەكەنىن اتاپ ءوتتى.
«ورتا بيزنەستەن زور ءۇمىت كۇتىپ وتىرمىز. ول باسەكەگە قابىلەتتى ءونىم شىعاراتىن جانە كەڭ اۋقىمدى قىزمەت كورسەتەتىن وڭدەۋشى سەكتوردىڭ قوزعاۋشى كۇشىنە ءارى درايۆەرىنە اينالۋعا ءتيىس», دەپ اتاپ ءوتتى ءاليحان سمايىلوۆ.
كەزدەسۋ بارىسىندا قاتىسۋشىلار قارجىلاندىرۋدىڭ قولجەتىمدىلىگىن قامتاماسىز ەتۋ, ءونىم كولەمىن ۇلعايتۋ, يمپورتتى الماستىرۋ جانە جاڭا ءوندىرىس ورىندارىن دامىتۋ, مەملەكەتتىك قولداۋ باعدارلامالارىن جۇزەگە اسىرۋ, مەملەكەتتىك ساتىپ الۋ, سالىق سالۋ, سەرتيفيكاتتاۋ, يندۋستريالىق ايماقتار مەن يندۋستريالىق پاركتەردى دامىتۋ, يننوۆاتسيالاردى ەنگىزۋ, ەكسپورت, جۇمىس ورىندارىن قۇرۋ, كادر دايارلاۋ جانە تاعى باسقا ماسەلەلەردى تالقىلادى.
پرەمەر-ءمينيستردىڭ ورىنباسارى – ساۋدا جانە ينتەگراتسيا ءمينيسترى سەرىك جۇمانعارين, يندۋستريا جانە ينفراقۇرىلىمدىق دامۋ ءمينيسترى مارات قاراباەۆ, عىلىم جانە جوعارى ءبىلىم ءمينيسترى ساياسات نۇربەك, دەنساۋلىق ساقتاۋ ءمينيسترى اجار عينيات وزەكتى ماسەلەلەرگە توقتالدى.
پرەمەر-مينيستر مەملەكەتتىك ورگاندارعا بيزنەس قاۋىمداستىعىمەن بىرگە كوتەرىلگەن بارلىق ماسەلەلەردىڭ شەشىمىن پىسىقتاۋ ءۇشىن تاپسىرما بەرىلەتىنىن ايتتى.
ول الەمدىك تاجىريبە كورسەتىپ وتىرعانداي, ورتا بيزنەس ۇنەمى وزگەرىپ وتىراتىن نارىقتىق جاعدايلارعا تەز بەيىمدەلەتىنىن اتاپ ءوتتى. بۇل ونى ءوز كەزەگىندە ەكونوميكالىق دامۋدىڭ اسا ماڭىزدى باعدارىنا اينالدىرادى. سول سەبەپتى دامىعان ەلدەر شاعىن كاسىپورىنداردى الەمدىك نارىقتاعى پوزيتسياسىن كەڭەيتىپ, نىعايتۋعا بەلسەندى تۇردە ىنتالاندىرىپ وتىرادى.
«مىسالدى الىستان ىزدەۋدىڭ قاجەتى جوق. «Samsung», «Toyota» نەمەسە «Hyundai» سياقتى كومپانيالار شاعىن جانە ورتا بيزنەس رەتىندە ءوز جولىن باستاعان, ال بۇگىن ولاردى تابىستى الەمدىك كوشباسشىلار رەتىندە بىلەمىز. ءوز كەزەگىندە ۇكىمەت بيزنەستىڭ دامۋىنا قاجەتتى بارلىق شارالاردى قابىلداپ جاتقانىنا سەندىرگىم كەلەدى», دەدى ءاليحان سمايىلوۆ.
ۇكىمەت باسشىسى جۇكتەمەنى ازايتىپ, سالىقتىق اكىمشىلەندىرۋ راسىمدەرىن جەڭىلدەتۋدى كوزدەيتىن جاڭا سالىق كودەكسى ازىرلەنىپ جاتقانىن ايتتى.
سونىمەن قاتار كاسىپكەرلەردىڭ قۇقىقتارىن ودان ءارى قورعاۋ ماقساتىندا «تازا پاراقتان» رەتتەۋ نورماسى ەنگىزىلۋدە. ونىڭ اياسىندا بيزنەسكە قويىلاتىن 10 مىڭ نەگىزسىز تالاپ الىنىپ تاستالادى جانە مەملەكەتتىك باقىلاۋدىڭ بارلىق باعىتى بويىنشا راسىمدەر اۆتوماتتاندىرىلادى.
«بۇل جاڭا جىلدان باستاپ بيزنەستى تەكسەرۋگە موراتوري اياقتالعاننان كەيىن ادامي فاكتورسىز, تاۋەكەلدەردى باسقارۋدىڭ اۆتوماتتاندىرىلعان جۇيەلەرى نەگىزىندە بارلىق تەكسەرۋ كەستەلەرىن قالىپتاستىرۋعا مۇمكىندىك بەرەدى. بۇل تەكسەرۋلەر سانىن ازايتىپ, مەملەكەتتىك باقىلاۋدىڭ تيىمدىلىگىن ارتتىرادى», دەدى پرەمەر-مينيستر.
سونداي-اق ول مەملەكەت باسشىسىنىڭ تاپسىرماسىنا ساي, مەملەكەتتىك رەسۋرستار مەن ينفراقۇرىلىمعا قولجەتىمدىلىكتى جەڭىلدەتۋ ماقساتىندا مەملەكەتتىك-جەكەمەنشىك ارىپتەستىكتىڭ جاڭا مودەلى ازىرلەنگەنىن ايتتى. جەرگىلىكتى دەڭگەيدە جەر تەلىمدەرىن ءبولۋ, ينفراقۇرىلىم جانە اكىمدىكتەردىڭ قۇزىرەتىنە جاتاتىن باسقا دا ماسەلەلەر بويىنشا دا قولداۋ كورسەتۋ جالعاسا بەرەدى.
«نەگىزگى كاپيتالعا ينۆەستيتسيا تارتۋ جانە جاڭا جۇمىس ورىندارىن قۇرۋ بويىنشا اكىمدىكتەرگە قويىلعان ناقتى KPI بار. بۇل رەتتە شوب سۋبەكتىلەرىنەن تۇسەتىن كورپوراتيۆتىك تابىس سالىعى جەرگىلىكتى بيۋدجەتكە بەرىلدى, سول سەبەپتى اكىمدىكتەر جەكە سەكتوردى كەڭەيتۋگە مۇددەلى. ۇكىمەت ارقاشان بيزنەسپەن ديالوگكە اشىق جانە ونىڭ دامۋىنا ىقپال ەتەتىن جوبالارعا قولداۋ كورسەتۋگە دايىن ەكەنىن تاعى دا اتاپ وتكىم كەلەدى», دەپ تۇيىندەدى ءاليحان سمايىلوۆ.