ەرتەڭنەن باستاپ ەلىمىزدە وتباسى بانكتىڭ «ۇماي» باعدارلاماسى بويىنشا وتىنىشتەر قابىلداۋ باستالادى.
بيىل بۇل باعدارلامانى نەسيەلەندىرۋگە 15,6 ملرد تەڭگە جۇمسالادى. قاجەتتى قاراجاتتى ازيا دامۋ بانكى (ادب) ءۇشىنشى ترانش اياسىندا ءبولىپ وتىر. وتباسى بانك ءدال وسى قارجى ينستيتۋتىمەن بىرلەسىپ, بىرنەشە جىلدان بەرى «ۇماي» جوباسىن ءساتتى جۇزەگە اسىرىپ كەلەدى.
ادب شارتتارىنا سايكەس استانا, الماتى, اقتاۋ جانە اتىراۋ قالالارىنا زاەمنىڭ جالپى كولەمىنىڭ 40% اسپايتىن بولىگىن نەمەسە 200-گە جۋىق نەسيە ءبولۋ جوسپارلانىپ وتىر.
نەسيەنىڭ 60%-ى وبلىستار مەن شاعىن قالالاردىڭ تۇرعىندارىنا بەرىلمەك. بۇل وڭىرلەردەگى ايەلدەر قاۋىمىن قولداۋ جانە نەسيەلەۋدە ديسپروپورتسيانى بولدىرماۋ ماقساتىندا جاسالدى.
گەندەرلىك تەڭدىكتى جەتىلدىرۋگە نەگىزدەلگەن باعدارلامانى ىسكە اسىرۋعا ادب باس-اياعى 38 ملرد تەڭگە كولەمىندە قاراجات ءبولىپ وتىر. 2021 جىلى «ۇماي» باعدارلاماسى باستالعان كەزدە, ءبىرىنشى ترانش اياسىندا, جالپى كولەمى 8,4 ملرد تەڭگەگە 954 قىز-كەلىنشەك قارىز العان بولاتىن. 2022 جىلى 14 ملرد تەڭگە ءبولىندى. بۇل قاراجاتقا 1 119 بۇرىمدى باسپانا الىپ, قونىس تويىن تويلادى.
باعدارلاما بويىنشا بەرىلەتىن زاەمنىڭ ەڭ جوعارعى قۇنى 30 ملن تەڭگەگە دەيىن. پايىزدىق مولشەرلەمە بيىلعى جىلى 14,4% (جتسم - 15,4% باستاپ) تەڭ, كەيىن ول 3,5%-5%-عا دەيىن (جتسم - 3,6% باستاپ) تومەندەتىلەدى.
«ۇماي» باعدارلاماسى بويىنشا قارىز الۋ مەرزىمى – 6 ايدان 25 جىلعا دەيىن. بۇل رەتتە تۇرعىن ءۇي تاڭداۋدا شەكتەۋلەر جوق, ونى العاشقى جانە ەكىنشى نارىقتان, سونىڭ ىشىندە ۇلەستىك قاتىسۋ شارتتارى بويىنشا ساتىپ الۋعا بولادى. سونداي-اق «ۇماي» بويىنشا باسپانانى جوندەۋ جۇمىستارىنا دا 3,7 ملن تەڭگەگە دەيىنگى مولشەردە قارىز الۋعا بولادى.
الەۋەتتى قارىز الۋشىنىڭ اي سايىنعى وتباسىلىق تابىسى 550 000 تەڭگەدەن اسپاسا, ول 15%-دىق باستاپقى جارنامەن نەسيە الا الادى. ال وتباسىنىڭ ورتاق كىرىسى ايىنا 550 001 تەڭگەدەن 640 000 تەڭگەگە دەيىنگى ارالىقتا بولسا, وندا تۇرعىن ءۇيدى 20%-دىق العاشقى جارنامەن الۋعا بولادى.
– «ۇماي» باعدارلاماسى ەكىنشى نەمەسە ءۇشىنشى تۇرعىن ءۇي ساتىپ الۋدى كوزدەپ وتىرعان, كىرىسى جوعارى ايەلدەرگە ارنالعان. بيىلعى جىلى ءبىز ادب-مەن بىرلەسىپ, «ۇماي» باعدارلاماسىنا تابىسى 200 000 تەڭگەدەن اسپايتىن ايەلدەر دە قاتىسا الادى دەپ شەشتىك. ەگەر ولار تولەم قابىلەتتىلىگىن راستاسا, ەڭ تومەنگى 15% باستاپقى جارنامەن نەسيە الاتىن بولادى. ءبىز ولارعا بولىنگەن قاراجات اياسىندا جالپى نەسيەلەندىرۋدىڭ 20%-عا جۋىعىن ءبولۋدى جوسپارلاپ وتىرمىز, دەپ ءتۇسىندىردى «وتباسى بانك» اق باسقارما توراعاسى ءلاززات يبراگيموۆا.
«ۇماي» باعدارلاماسى بويىنشا نەسيەنى otbasybank.kz پورتالىندا ونلاين نەمەسە بانك بولىمشەلەرىندە جانە كەڭەس بەرۋ ورتالىقتارىندا راسىمدەۋگە بولادى.
بۇگىنگى كۇنى وتباسى بانكىندە 1,5 ملن جۋىق دەپوزيت نەمەسە بەلسەندى جيناق شوتتارىنىڭ جالپى كولەمىنىڭ 68% ايەلدەرمەن اشىلعان. بانكتىڭ قارىز الۋشىلارى اراسىندا دا ايەلدەردىڭ سانى باسىم (54,7%). قىز-كەلىنشەكتەرىمىزدىڭ پاتەر نەمەسە ءۇي ساتىپ الۋ ءۇشىن نەسيە الاتىن نەگىزگى جاسى 36-45 جاس ارالىعىندا. ادەتتە, نەسيە مەرزىمى – 10 جىل. وتباسى بانكىندە ايەلدەر تولەپ وتىرعان نەسيەنىڭ ورتاشا سوماسى 11 ملن تەڭگەگە تەڭ.