الماتى قالاسىندا مەدەۋدە تۇتانعان وتپەن كۇرەس كەزىندە ءورت ءسوندىرۋشى ارسلان قۇرمانبەكوۆ مەرت بولدى, دەپ حابارلايدى Egemen.kz توتەنشە جاعدايلار مينيسترلىگىنىڭ ءباسپاسوز قىزمەتىنە سىلتەمە جاساپ.
ارسلان جولداسبەك ۇلى ىلە-الاتاۋ مەملەكەتتىك ۇلتتىق تابيعي پاركى اۋماعىنداعى تاۋ بوكتەرىندە ءورت سوندىرۋگە جۇمىلدىرىلعان توپ قۇرامىندا بولعان.
«قىزمەتتىك بورىشىن اتقارۋ كەزىندە, تاۋ باۋرايىندا ءورتتى ءسوندىرۋ بارىسىندا 1994 جىلى تۋعان الماتى قالاسى تجد ءورت ءسوندىرۋ جانە اۆاريالىق-قۇتقارۋ جۇمىستارى قىزمەتىنىڭ قىزمەتكەرى, 7-ءوسب اعا ءورت ءسوندىرۋشى-قۇتقارۋشىسى ازاماتتىق قورعاۋ سەرجانتى قۇرمانبەكوۆ ارسلان جولداسبەك ۇلى قازا تاپتى.
توتەنشە جاعدايلار مينيسترلىگى ارسلان جولداسبەك ۇلىنىڭ تۋىستارى مەن جاقىندارىنا كوڭىل ايتادى. ول تۋرالى جاقسى ەستەلىك, ءوز ءىسىنىڭ مامانى رەتىندە ءبىزدىڭ جۇرەگىمىزدە ماڭگى قالادى.
ارسلان جاۋاپتى قىزمەتكەر, كاسىبي كۇرەسكەر جانە بىلىكتى مامان بولدى. جۇمىستا ول ەڭبەكقورلىعى, ادىلدىگى جانە ماماندىققا دەگەن سۇيىسپەنشىلىگى ءۇشىن باعالاندى. تجم قازا تاپقان ءورت ءسوندىرۋشىنىڭ وتباسىنا جان-جاقتى كومەك پەن قولداۋ كورسەتەدى», دەلىنگەن رەسمي حابارلامادا.
توتەنشە جاعدايلار مينيسترلىگىنىڭ رەسمي وكىلى رۋسلان يمانقۇلوۆتىڭ حابارلاۋىنشا, ءورت ءسوندىرۋشى جانىپ جاتقان اعاش ءدىنىنىڭ قۇلاۋى سالدارىنان قايتىس بولعان.