جولعا شىعۋ ءۇشىن كاسساعا ارنايى كەلىپ, ۇزىن-سونار كەزەككە تۇراتىن كۇندەر بىرتىندەپ كەلمەسكە كەتىپ بارادى. نەگىزى ءبۇل ۇدەرىستىڭ ءبىزدىڭ ومىرىمىزگە ەنگەنىنە دە ءبىرشاما جىلدىڭ ءجۇزى ءوتتى. ەل تسيفرلى تەحنولوگيانىڭ ءدال وسىنداي جەتىستىگىن ءساتتى پايدالانىپ كەلەدى. ەندى مۇگەدەكتىگى بار جاندار ءۇشىن دە مۇنداي ءتيىمدى مۇمكىندىك قولجەتىمدى بولا باستادى.
2023 جىلدىڭ ءبىرىنشى توقسانىندا مۇمكىندىگى شەكتەۋلى جاندار ينتەرنەت ارقىلى جولاۋشىلار پويىزدارىنا 100 مىڭنان استام جەڭىلدىكتى بيلەت ساتىپ الدى.
ەلەكتروندىق بيلەتتى ساتىپ الۋدىڭ جولى وپ-وڭاي. ينتەرنەتى بار قۇرىلعىعا وتىرىپ bilet.railways.kz سايتى ارقىلى ساتىپ الۋعا بولادى. ونى رەسىمدەۋ ءۇشىن جولاۋشى تولقۇجات دەرەكتەرىن, جسن, مۇگەدەكتىك تۋرالى انىقتاما ءنومىرىن جانە eGov mobile-دان الىنعان التى تاڭبالى الەۋمەتتىك ID كودىن كورسەتە وتىرىپ تىركەلۋى قاجەت.
جەڭىلدىكتى بيلەت ساتىپ الۋعا قامدانساڭىز, مالىمەتتەرىڭىزدىڭ بارلىعىن تەكسەرۋ اۆتوماتتى تۇردە جۇرگىزىلەدى. دەرەكتەردى ونلاين رەجىمدە تەكسەرگەننەن كەيىن ساتۋ جۇيەسى تاڭدالعان ورىنعا تومەن باعا جەڭىلدىگىن قولدانۋعا مۇمكىندىك بەرەدى. ەرەكشە قاجەتتىلىكتەرى بار ادامدار ءۇشىن الەۋمەتتىك ماڭىزى بار مارشرۋتتار بويىنشا جول ءجۇرۋ بيلەتىنىڭ قۇنىنان 50% جەڭىلدىك, «تالگونىڭ» كوممەرتسيالىق مارشرۋتتارى بويىنشا مامانداندىرىلعان كۋپەلەرگە (ەرەكشە قاجەتتىلىكتەرى بار جولاۋشى مەن ىلەسىپ جۇرەتىن ادام ءۇشىن) 70% جەڭىلدىك كوزدەلگەن.
جەڭىلدىكتى جول ءجۇرۋ قۇجاتتارىن رەسىمدەۋ ءراسىمىن جەڭىلدەتۋ ءۇشىن قتج ەڭبەك مينيسترلىگىنىڭ «الەۋمەتتىك كومەك» اۆتوماتتاندىرىلعان اقپاراتتىق جۇيەسىمەن ينتەگراتسيالاۋ بويىنشا جۇمىستار جۇرگىزۋدە. وسىدان كەيىن جولاۋشى تەك جسن كورسەتە وتىرىپ, جەڭىلدىكتى بيلەتتەردى راسىمدەي الادى.
ۇلتتىق تاسىمالداۋشى پويىزدارىنا مۇگەدەكتەر مەن ولارعا ىلەسىپ جۇرەتىن ادامدارعا ارنالعان ورىندارى بار مامانداندىرىلعان ۆاگوندار ەنگىزۋدە. «جولاۋشىلار تاسىمالى» اق پاركىندە ەرەكشە جولاۋشىلاردىڭ قاجەتتىلىكتەرىنە جاۋاپ بەرەتىن 80 كۋپە ۆاگونى بار. ونىڭ 20-سى – تالگو ۆاگوندارى.
2025 جىلعا قاراي الەۋمەتتىك ماڭىزى بار مارشرۋتتار قوزعالۋى ناشار ادامدار ءۇشىن ىڭعايلى ۆاگوندارمەن تولىق قامتاماسىز ەتىلۋ جوسپارلانۋدا. ونىڭ كوممەرتسيالىق پويىزدار قۇرامىنداعى ۇلەسى – شامامەن 90%. 2023 جىلدىڭ سوڭىنا دەيىن 13 ۆاگوندا ەرەكشە ادامداردى تاسىمالداۋ ءۇشىن ءبىر-ءبىر كۋپە قايتا جابدىقتالادى. 2030 جىلعا دەيىن مۇمكىندىگى شەكتەۋلى جانداردىڭ جايلى ساپارى ءۇشىن كۋپەسى بار 46 ۆاگون ساتىپ الۋ جوسپارلانىپ وتىر.
ونىمەن قوسا, مۇمكىندىگى شەكتەۋلى جاندار پويىز بيلەتىن تىكەلەي ۆوكزال كاسسالارى ارقىلى دا ساتىپ الا الادى.