1 مامىر – قازاقستان حالقىنىڭ بىرلىگى كۇنى قارساڭىندا ۇقك شەكارا قىزمەتى الماتى وبلىسى بويىنشا دەپارتامەنتىنىڭ وقۋ بازاسىندا العاشقى اسكەري دايىندىقتارىن شىڭداپ جاتقان جاس ساربازداردىڭ انت قابىلداۋ ءراسىمى ءوتتى, دەپ حابارلايدى Egemen.kz.
وتان قورعاۋشىلارىمىزدىڭ ومىرىندەگى دارا مەرەكە سانالاتىن ايتۋلى شارانى تاماشالاۋ ءۇشىن ساربازداردىڭ الىستان ات ارىلتىپ جەتكەن اتا-انا, تۋعان-تۋىستارى, سونداي-اق قالا حالقى الماتى قالاسىنىڭ ەڭ كورىكتى ورىندارىنىڭ ءبىرى, 28 گۆارديالىق-پانفيلوۆشىلار ساياباعىندا باس قوستى.
600-گە تارتا شەكاراشى سارباز سالتاناتتى ساپ تۇزەگەن بۇگىنگى ءراسىمنىڭ كوركىن شاھارداعى «جاس شەكاراشى» اسكەري-پاتريوتتىق كلۋبىنىڭ مۇشەلەرى كىرگىزە تۇسكەن. ۇستەرىنە كيگەن اسكەري فورمالارى دا وزدەرىن ەرەكشەلەندىرىپ-اق تۇر... كوپشىلىكتىڭ كوزايىمىنا اينالعان شەكاراشىلاردىڭ جاس دوستارى قولدارىنا قارۋ الىپ, قۇرمەتتى قاراۋىل روتاسىنىڭ قاتارىنا تۇردى. ال بۇل – جاس پاتريوتتارىمىزدىڭ رۋحتارىن جاني تۇسكەنى حاق...
ۇقك شەكارا قىزمەتى الماتى وبلىسى بويىنشا دەپارتامەنتىنىڭ باستىعى پولكوۆنيك الىبەك كايۋپوۆتىڭ بۇيرىعىمەن, جاۋىنگەرلىك تۋ كوتەرۋشىلەر توبى ساپ تۇزەگەن ساربازداردىڭ الدىن كەسىپ ءوتىپ, ءوز ورىندارىنا تۇرعان سوڭ ءراسىم ەلىمىزدىڭ مەملەتتىك انۇرانىمەن باستالدى. بۇل – «كوكتەم-2023» شاقىرىلىمى ءۇشىن ماڭىزدى ءساتتىڭ تۇساۋى كەسىلگەنىن ءبىلدىرىپ تۇر ەدى.
«مەن قاتارداعى جاۋىنگەر...» دەپ باستاپ, تۋعان ەلىنىڭ حالقىنا اقتىق دەمى قالعانشا ادال قىزمەت ەتۋگە انت بەرۋشىلەردىڭ قاتارى بىرتىندەپ كوبەيە تۇسكەن. وسىناۋ ماڭىزدى ءساتتى قالت جىبەرمەگەن الماتى وبلىسى بويىنشا دەپارتامەنتىنىڭ باسشىلارى, شەكاراشى ارداگەرلەر مەن مارتەبەلى قوناقتار ساربازداردى قۇتتىقتاپ, قابىلداعان انتتارىنا ادال بولۋعا تىلەك ءبىلدىردى.
قالىڭ جۇرتشىلىقتىڭ باسىن قوسقان شارا دەپارتامەنتكە قاراستى قاراساي اۋدانى بويىنشا شەكارا باسقارماسىنىڭ ارناۋلى ماقساتتاعى ۇتقىر ءىس-قيمىلدار توبىنىڭ ساحنالىق كورىنىسىنە ۇلاستى. مۇندا ەل شەبىندەگى كۇردەلى جاۋىنگەرلىك تاپسىرمالاردى ورىنداۋعا ماشىقتانعان اسكەري قىزمەتشىلەر شەكارا بۇزۋشىلاردى ۇستاۋدىڭ تاسىلدەرىن اسقان شەبەرلىكپەن كورسەتە ءبىلدى.
«تۋعان جەردىڭ شەكارا شەبىندە ءجۇرۋ – اركىمگە بۇيىرمايتىن باق» دەمەكشى, شەكارا – جۇرەگى «وتانىم» دەپ سوققان ناعىز پاتريوتتاردىڭ مەكەنى. ەندى مىنە, وسىناۋ پاتريوتتارىمىزدىڭ قاتارىن جاڭادان تولىقتىرعان جاس ساربازداردىڭ جۇرەگىن قۋانىشقا تولتىرعان بۇگىنگى تاماشا مەرەكەنى ۇقك شەكارا قىزمەتىنىڭ ءانۇرانىنا اينالىپ ۇلگەرگەن ء«بىز – شەكارادا!» اتتى پاتريوتتىق ءان اياقتادى.
تامارا داۋلەتباەۆا,
ۇقك شەكارا قىزمەتىنىڭ زاپاستاعى پودپولكوۆنيگى.