پرەزيدەنت جانىنداعى مەملەكەتتىك باسقارۋ اكادەمياسىندا ءار جۇما سايىن وتەتىن «دامۋ كۇنىنىڭ» كەزەكتى سپيكەرى تاريحشى, «ۆوسحوجدەنيە پو نيسحودياششەي» كىتابىنىڭ اۆتورى نۇرتاي اگۋباەۆ بولدى.
كەزدەسۋدە اۆتور اقپارات اعىنى قارقىن العان شاقتا سانانىڭ فراگمەنتتەلۋىنە جول بەرمەۋدىڭ, الەۋمەتتىك روبوتتاندىرۋدىڭ قۇربانى بولماۋدىڭ جولدارىن, جاساندى فيلوسوفيا مەن شىنايى فيلوسوفيانىڭ اراسىندا تاڭداۋدى قالاي جاساۋ كەرەك ەكەنىن ءتۇسىندىردى. سونداي-اق ول ءومىردىڭ ادامعا قانداي ساباق بەرەتىنىن, نەلىكتەن سانالى ديالوگ قىزۋ پىكىرتالاستان ماڭىزدى ەكەنىن ايتتى.
«كىتاپ قازاقستان ءۇشىن كوركەم جانر, پۋبليتسيستيكا جانە زەرتتەۋ سينتەزىنە نەگىزدەلگەن مەمۋاريستيكانىڭ جاڭا ءتۇرىن ۇسىنادى. وندا «تاعدىر» ۇعىمىنىڭ وزىندىك ينتەرپرەتاتسياسى بەرىلگەن, ال ءومىر تاريحى ادامنىڭ وزىندىك «مەنىنە» باسا نازار اۋدارماي, قورشاعان الەمدى ءتۇسىنۋ پريزماسى ارقىلى بەرىلگەن», دەدى نۇرتاي اگۋباەۆ كىتاپتىڭ مازمۇنىنا توقتالىپ.
سونىمەن قاتار بۇل ەڭبەكتە اۆتور بۇرىنعى كەڭەس وداعى حالىقتارىنا ءتان «كاتاستروفيالىق سانا» جانە بولىپ جاتقان وزگەرىستەردى تۇسىنبەۋشىلىكتەن تۋىنداعان «كونفليكتتىك ويلاۋ» سياقتى ۇعىمداردى تالقىلايدى.
اكادەميادا ءبىلىم الىپ جاتقان مەملەكەتتىك قىزمەتشىلەردى «بيۋروكراتيالىق ريتۋاليزم جانە ونىڭ سالدارى» تاقىرىبى قىزىقتىردى. اۆتور دا وسى ماسەلەگە تەڭىرەك توقتالىپ, ساۋالدارعا جاۋاپ بەردى.