الماتىدا قالا اتىنان جالعا الىنعان اۆتوتۇراقتار «الماتى پاركينگىنە» بەرىلەدى. بۇل تۋرالى قالا اكىمى ەربولات دوساەۆ اۋەزوۆ اۋدانى تۇرعىندارىمەن كەزدەسۋ بارىسىندا ايتتى, دەپ حابارلايدى Egemen.kz.
اۋدان تۇرعىنى «جەتىسۋ-2» شاعىناۋدانىنداعى 16 جانە 19-ۇيلەردىڭ اراسىندا ورنالاسقان اۆتوتۇراققا قاتىستى سۇراق قويدى.
«وعان 10 جىلدان استام ۋاقىت بولدى جانە ول جەردە تارتىپسىزدىك بولىپ جاتىر. ءبىز مەنشىك يەسىنىڭ كىم ەكەنىن بىلمەيمىز. كەلىسىمشارتتار دا, فيسكالدىق چەكتەر دە جوق, بىزگە ەشتەڭە ۇسىنبايدى. بىراق, ءبىز اي سايىن اقشا تولەپ وتىرمىز. ول جەر جەكە مەنشىكتە», دەدى قالا تۇرعىنى.
الماتى اكىمى ەربولات دوساەۆ اتالعان ماسەلە بويىنشا قانداي شارا قابىلداناتىنىن ايتتى.
ء«بىز ەندى قالا اتىنان جالعا الىنعان اۆتوتۇراقتاردىڭ جەرلەرىن «الماتى پاركينگكە» بەرەتىن بولامىز. جينالعان قاراجات الماتى بيۋدجەتىنە ءتۇسىپ وتىرادى. ءسىزدىڭ ماسەلەڭىزدىڭ انىق-قانىعىن تەكسەرەمىز. جەر قاتىناستارى باسقارماسى ارقىلى جەردىڭ مارتەبەسىن انىقتاپ, قالالىق موبيلدىلىك باسقارماسىنان نە ىستەۋگە بولاتىنىن بىلەمىز. ارى قاراي بيزنەستى تەكسەرۋگە موراتوري جاريالانعانىنا قاراماستان, مەن مەملەكەتتىك كىرىستەر دەپارتامەنتىنەن پروكۋراتۋرامەن بىرلەسىپ سالىق تولەۋ جانە وزگە دە ماسەلەلەردى پىسىقتاۋدى سۇرايمىن», دەدى ەربولات دوساەۆ.