قۇجات قابىلداۋ باستالدى

اكادەميا رەكتورى ەرلان ءابىلدىڭ ايتۋىنشا, مەملەكەتتىك قىزمەتشىلەردى دايارلاۋعا ۇكىمەتتەن ماگيستراتۋرا باعدارلاماسىنا – 120, دوكتورانتۋراعا 12 گرانت بولىنگەن.

«2023 جىلى وقۋعا قابىلداۋ 6 ماگيستراتۋرا باعدارلاماسى, كۇندىزگى وقۋ بولىمىندە 3 دوكتورانتۋرا باعدارلاماسى بويىنشا جانە وندىرىستەن قول ۇزبەي وقىتىلاتىن 2 مودۋلدىك باعدارلاما بويىنشا جۇرگىزىلەدى. سونداي-اق اكادەميادا اقىلى تۇردە كۇندىزگى بولىمدە جانە مودۋلدىك فورماتتا ءبىلىم الۋعا مۇمكىندىك بار», دەدى وقۋ ورنىنىڭ رەكتورى.

كونكۋرستىق ىرىكتەۋدىڭ العاشقى كەزەڭى ونلاين, سۇحباتتاسۋ كەزەڭى بەتپە-بەت جۇزدەسۋ فورماتىندا وتەدى. قۇجات تاپسىرۋ https://admission.apa.kz پورتالىندا جۇرگىزىلەدى. بيىلعى قابىلداۋ كەزەڭىندە بىرقاتار وزگەرىس بار.

«حالىقارالىق قاتىناستار» باعدارلاماسى بويىنشا وقۋ مەرزىمى 1 جىلدان 2 جىلعا دەيىن ۇزارتىلدى. دوكتورانتۋرا باعدارلامالارى ءۇشىن جۇمىس ءوتىلى بويىنشا تالاپ 3 جىلدان 5 جىلعا دەيىن ۇلعايتىلدى. ەگەر وتكەن جىلى باسشى قول قويعان جولداما الدىن الا وقۋعا ءتۇسۋ كەزىندە, ياعني كونكۋرستىق ىرىكتەۋدەن كەيىن تاپسىرۋعا مۇمكىندىك بەرىلسە, بيىل ۇمىتكەرلەر جۇيەگە قول قويىلعان جولدامانى 29 ماۋسىمدى قوسا ەسەپتەگەندە قۇجات قابىلداۋ اياقتالعانشا تىركەۋى كەرەك. تاعى ءبىر ايتا كەتەرلىك جايت, بيىلدان باستاپ مودۋلدىك وقىتۋ قاعيداتى بويىنشا ماگيستراتۋرا مەملەكەتتىك قىزمەتشى ەمەس تۇلعالارعا, ياعني كۆازيمەملەكەتتىك جانە جەكە سەكتور وكىلدەرىنە عانا ارنالادى», دەدى ەرلان ءابىل.

سونىمەن قاتار اكادەميانى مەملەكەتتىك تاپسىرىس بويىنشا B+ (GPA 3,33) كورسەتكىشپەن اياقتاعاندار, وقۋدى بىتىرگەننەن كەيىن ءبىر جىل ىشىندە جەرگىلىكتى اتقارۋشى ورگانداردا, ءماسليحاتتار اپپاراتتارىندا, رەۆيزيالىق كوميسسيالاردا, ورتالىق مەملەكەتتىك ورگانداردىڭ جانە ولاردىڭ ۆەدومستۆولارىنىڭ اۋماقتىق بولىمشەلەرىندە (استانا قالاسى مەن ونىڭ اۋداندارىنداعى جەرگىلىكتى اتقارۋشى ورگانداردان, ءماسليحات اپپاراتىنان, رەۆيزيالىق كوميسسيالاردان, ورتالىق مەملەكەتتىك ورگاندار مەن ولاردىڭ ۆەدومستۆولارىنىڭ اۋماقتىق بولىمشەلەرىنەن باسقا) «ب» كورپۋسىنىڭ مەملەكەتتىك اكىمشىلىك لاۋازىمدارىنا مەملەكەتتىك قىزمەت ىستەرى اگەنتتىگىمەن جانە ونىڭ اۋماقتىق بولىمشەلەرىمەن كەلىسۋ بويىنشا كونكۋرس وتكىزىلمەستەن قىزمەتكە ورنالاسا الادى.

تاعى ءبىر وزگەرىس, اكادەميا تۇلەگى-مەملەكەتتىك قىزمەتشىنىڭ ونى وقۋعا جىبەرگەن مەملەكەتتىك ورگاندا جۇمىسپەن وتەۋ جونىندەگى مىندەتى الىنىپ تاستالدى. ەندى مەملەكەتتىك قىزمەتشىگە اكادەميادا وقۋىن اياقتاعاننان كەيىن مەملەكەتتىك قىزمەتتە 3 جىل جۇمىس ىستەۋ جەتكىلىكتى.

سونداي-اق ء«بىلىم تۋرالى» زاڭعا سايكەس جوعارى وقۋ ورىندارىندا جوعارى وقۋ ورنىنان كەيىنگى ءبىلىم بەرۋ باعدارلامالارى بويىنشا مەملەكەتتىك ءبىلىم بەرۋ تاپسىرىسى نەگىزىندە بۇرىن ءبىلىم العان مەملەكەتتىك قىزمەتشىلەر مەملەكەتتىك ءبىلىم بەرۋ تاپسىرىسى بويىنشا اكادەمياعا ماگيستراتۋراعا نەمەسە دوكتورانتۋراعا قايتا وقۋعا تۇسە الادى.