قر پرەمەر-ءمينيسترى ءاليحان سمايىلوۆ پەن Wabtec كومپانياسىنىڭ اعا ۆيتسە-پرەزيدەنتى گوحان بايحان سەرىكتەستىكتى كەڭەيتۋ پەرسپەكتيۆالارى مەن ماشينا جاساۋداعى جاڭا جوبالاردى ىسكە اسىرۋ جايىن تالقىلادى, دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
كەزدەسۋ بارىسىندا ۇكىمەت باسشىسى ماشينا جاساۋ ەل ەكونوميكاسىنىڭ ەڭ پەرسپەكتيۆالى سەكتورلارىنىڭ ءبىرى ەكەنىن اتاپ ءوتتى. وتكەن جىلى ەلىمىزدە سالاداعى ءوندىرىس كولەمى 35%-عا ءوستى.
ء«بىز وسى سالانىڭ ودان ءارى ءوسۋى مەن دامۋى ءۇشىن ۇلكەن الەۋەتتى كورىپ وتىرمىز, بۇل جاڭا ينۆەستيتسيالار مەن زاماناۋي تەحنولوگيالاردىڭ اعىنىن تالاپ ەتەدى. وسىعان بايلانىستى Wabtec كومپانياسىنىڭ ەلىمىزدەگى ءوندىرىس پروتسەسىن كەڭەيتۋ نيەتىن قۇپتايمىز», دەدى ءاليحان سمايىلوۆ.
ونىڭ ايتۋىنشا, ەكونوميكالىق كۇيزەلىستەرگە قاراماستان, الەمدىك تەمىرجول قاتىناسى تۇراقتى بولىپ قالا بەرەدى جانە الداعى 10 جىلدا ەكى ەسەگە جۋىق وسەدى دەپ بولجانۋدا. وسىنى ەسكەرە وتىرىپ, قازاقستان ءوزىنىڭ ءتيىمدى گەوگرافيالىق ورنالاسۋىن بارىنشا ءتيىمدى پايدالانۋعا جانە ترانزيتتىك جۇك اعىندارىن بايلانىستىراتىن ءىرى كولىك توراپتارىنىڭ بىرىنە اينالۋعا نيەتتى.
اتاپ ايتقاندا, ەۋروپا مەن ازيا ەلدەرى اراسىنداعى تاۋار اينالىمىنىڭ قارقىندى ءوسۋى اياسىندا ترانسكاسپي حالىقارالىق كولىك باعىتىن دامىتۋدىڭ پەرسپەكتيۆاسى جوعارى. ول ءۇشىن ينفراقۇرىلىمدىق شەكتەۋلەردى الىپ تاستاۋ, سونداي-اق لوكوموتيۆتەر مەن تەڭىز كەمەلەرىنىڭ پاركىن ۇلعايتۋ قاجەت.
ءوز كەزەگىندە گوحان بايحان Wabtec كومپانياسى استاناداعى لوكوموتيۆتەر شىعاراتىن زاۋىتتا ءوندىرىستى كەڭەيتۋگە قاراجات سالعانىن حابارلادى, بۇل ونىڭ قۋاتىن ەكى ەسەگە ارتتىرۋعا مۇمكىندىك بەرەدى.
سونىمەن قاتار ونىڭ ايتۋىنشا, كومپانيا لوكاليزاتسيانى تەرەڭدەتۋ, «جاسىل» يننوۆاتسيالاردى ەنگىزۋ, سەرۆيستىك قىزمەت كورسەتۋدى دامىتۋ جانە ءوڭىردىڭ باسقا ەلدەرىنە ەكسپورتتى ۇلعايتۋ جۇمىستارىن جالعاستىرادى. Wabtec سونىمەن قاتار قازاقستاننىڭ كولىك جەلىسىنىڭ تيىمدىلىگىن ارتتىرۋ ءۇشىن تەمىرجول باعىتتارىن تسيفرلاندىرۋ جانە وڭتايلاندىرۋ ماسەلەسىندە قتج-مەن بەلسەندى ىنتىماقتاستىق ورناتادى.
ءاليحان سمايىلوۆ كەلىسسوزدەر قورىتىندىسى بويىنشا ۇكىمەت ءوزارا بەلسەندى ءىس-قيمىلدى جالعاستىرۋعا جانە كومپانيانىڭ جاڭا ينۆەستيتسيالىق جوسپارلارىن ىسكە اسىرۋ ءۇشىن قاجەتتى قولداۋ كورسەتۋگە دايىن ەكەنىن اتاپ ءوتتى.
ايتا كەتەيىك, Wabtec – 1999 جىلى Westinghouse Air Brake Company (WABCO) مەن MotivePower Industries كورپوراتسياسىنىڭ بىرىگۋىنەن قۇرىلعان امەريكالىق كومپانيا. ول لوكوموتيۆتەرگە, جۇك جانە جولاۋشىلار كولىكتەرىنە ارنالعان ونىمدەر شىعارادى, سونداي-اق قۋاتى 6 مىڭ اتتىڭ كۇشى بار زاماناۋي لوكوموتيۆتەر جاساپ شىعارادى.