الماتى پوليتسەيلەرى ادام ۇرلاۋدىڭ جولىن كەستى, دەپ حابارلايدى Egemen.kz Polisia.kz سايتىنا سىلتەمە جاساپ.
وقيعا كەشە كەشكە قالانىڭ المالى اۋدانىندا بولعان.
«جبو جەدەل كەزەكشىسىنەن Chevrolet كولىگىنە ادامدى كۇشتەپ وتىرعىزۋ تۋرالى حابارلاما كەلىپ ءتۇستى. قالا بويىنشا ارنايى «پەرەحۆات» جوسپارى ەنگىزىلدى. اتالعان كولىك گوگول مەن پۋشكين كوشەلەرىنىڭ قيىلىسىندا كوزگە تۇسكەن. ىزىنە ءتۇسۋ ناتيجەسىندە كولىكتى ەكى ەكيپاج ماقاتاەۆا مەن جەتىسۋ كوشەلەرىنىڭ قيىلىسىندا جاۋىپ تاستادى. سالوندا ءۇش ادام بولعان, ولار ۇستالدى. جۇكسالعىشتان تاعى ءبىر ەر ادام تابىلدى, ول اتالعان كولىكتىڭ يەسى ەكەندىگى بەلگىلى بولدى. كۇدىكتىلەر جەدەل-تەرگەۋ توبىنا تاپسىرىلدى. ەندى ولاردىڭ ارەكەتىنە قۇقىقتىق باعا بەرىلەدى», دەدى الماتى قالاسى پد جپقب پپپ ۆزۆودىنىڭ كومانديرى مەيىرجان قالكەەۆ.
ۇستالعانداردىڭ ايتۋىنشا, Chevrolet كولىگىنىڭ يەسى ولاردى ءىرى كولەمدەگى اقشاعا الداپ كەتكەن.
وسىلايشا ولار قارىزدى قايتارىپ الماق بولعان. ال جابىرلەنۋشى كەرىسىنشە ايتىپ, ونى قۇتقارعان پوليتسيا قىزمەتكەرلەرىنە العىسىن ءبىلدىردى.
قىلمىستىق ءىستىڭ باسقا دا ءمان-جايلارى قر قپك-ءنىڭ 201 بابى جانە قر كونستيتۋتسياسىنىڭ نورمالارىنا سايكەس جاريا ەتۋگە جاتپايدى.