جاقىندا قازاقستان تاجىك ەلىنە گۋمانيتارلىق كومەك رەتىندە بەس مىڭ توننا مازۋت بەردى. وسىلايشا, تاجىكستان رەسپۋبليكاسىنا 2006 جىلدان بەرى كورسەتكەن گۋمانيتارلىق كومەكتىڭ جالپى كولەمى 44 ملن دوللاردان استى. جالپى, ەلىمىز بىرقاتار دامۋشى ەلگە تۇراقتى كومەك كورسەتىپ, قولداۋ ءبىلدىرىپ كەلەدى.
سىرتقى ىستەر مينيسترلىگىنىڭ مالىمدەۋىنشە, قازاقستاننىڭ تاجىكستانداعى ەلشىسى ءۋاليحان تورەحانوۆ قازاقستاننىڭ 5 مىڭ توننا مازۋتقا ارنالعان رەسمي گۋمانيتارلىق كومەك سەرتيفيكاتىن تاجىكستان رەسپۋبليكاسى ۇكىمەتىنىڭ جانىنداعى مەملەكەتتىك ماتەريالدىق رەزەرۆتەر جونىندەگى اگەنتتىكتىڭ ديرەكتورى نۇرماحماد احمادزوداعا تاپسىرعان. ەلشى ءوز سوزىندە قازاقستان پرەزيدەنتى ق.توقاەۆتىڭ تاپسىرماسىنا سايكەس ەلدىڭ ماڭىزدى ەنەرگەتيكالىق وبەكتىلەرىنىڭ تۇراقتى جۇمىس ىستەۋى ماقساتىندا تاجىكستانعا 860 ملن 805 مىڭ تەڭگە (شامامەن 1,8 ملن دوللار) سوماسىندا گۋمانيتارلىق كومەك كورسەتۋ تۋرالى شەشىم قابىلدانعانىن ايتتى. سونداي-اق ءۋاليحان تورەحانوۆ گۋمانيتارلىق كومەك ەنەرگەتيكالىق قاۋىپسىزدىكتى قامتاماسىز ەتۋگە قوسقان ۇلەسى, قازاقستان مەن تاجىكستاننىڭ عاسىرلار بويعى قارىم-قاتىناستارىنا ءتان باۋىرلاستىق پەن ءوزارا كومەك كورسەتكىشى ەكەنىن اتاپ ءوتتى.
وتكەن جىلدىڭ ءبىرىنشى جارتىسىندا دا قازاقستان شەت مەملەكەتتەرگە 9,4 ملن دوللارعا گۋمانيتارلىق كومەك جىبەرگەن ەدى. ونىڭ ىشىندە ءدارى-دارمەككە – 4,4 ملن دوللار, ازىق-ت ۇلىك – 280,8 مىڭ دوللار, كيىم-كەشەك پەن اياقكيىم – 94,8 مىڭ دوللار, ماشينالار مەن جابدىقتارعا – 15,4 مىڭ دوللار, باسقا دا تاۋارلارعا 4,6 ملن دوللار جۇمسالعان. ال گۋمانيتارلىق كومەكتىڭ باسىم بولىگى اۋعانستانعا جىبەرىلگەن. ونىڭ قارجىلاي سوماسى 5,7 ملن اقش دوللارىن قۇرايدى. جالپى, اۋعانستان – ءبىزدىڭ ەلدەن تۇراقتى كومەك الۋشى ەلدىڭ ءبىرى. ودان كەيىنگى ورىندا تاجىكستان تۇر. 2022 جىلدىڭ ءبىرىنشى توقسانىنداعى دەرەك بويىنشا بۇل ەلگە 130,1 مىڭ دوللاردىڭ كومەگى جونەلتىلگەن. بۇعان قوسا, وتكەن جىلى قازاقستاننان ۋكراينا, پولشا, ماجارستان گۋمانيتارلىق كومەك العان. ۋكرايناعا جالپى سوماسى 306 مىڭ دوللارعا 67,7 مىڭ توننا گۋمانيتارلىق كومەك جىبەرىلدى. ال پولشاعا 3,1 ملن دوللاردى قۇراعان 70,7 مىڭ توننا گۋمانيتارلىق كومەك كورسەتىلدى. ماجارستان بولسا 69,5 مىڭ دوللار كولەمىندە 6,7 مىڭ توننا گۋمانيتارلىق كومەك الدى.
ايتپاقشى, قازاقستانعا دا وزگە ەلدەردەن گۋمانيتارلىق كومەك كەلەدى. 2022 جىلى بىزگە باعىتالعان كومەكتىڭ كولەمىن يتاليا باستاپ تۇر, قارجىلاي قۇنى 1,7 ملن دوللار, ونان كەيىنگى ورىندا قىتاي 476,4 مىڭ دوللاردىڭ قولداۋىن, گەرمانيادان 37,4 مىڭ دوللاردىڭ كومەگىن الدىق.