قازاقستان تۇركياعا قوسىمشا گۋمانيتارلىق كومەك جىبەرەدى. پرەزيدەنت قاسىم-جومارت توقاەۆ ۇكىمەتكە وسىنداي تاپسىرما بەردى. رەسمي كومەكتەن بولەك ەل تۇرعىندارى جەر سىلكىنىسىنەن زارداپ شەككەن تۇرىك اعايىندارعا ءۇش ميلليون دوللارعا جۋىق قارجى جيناپ بەردى.
مەملەكەت باسشىسىنىڭ تاپسىرماسىمەن جەر سىلكىنىسى بولعان اۋداندارداعى زارداپ شەككەندەرگە كومەك كورسەتۋ ءۇشىن شاتىرلار, جىلىتقىشتار, جىلى كيىمدەر جانە باسقا دا تۇرمىسقا ەڭ قاجەتتى زاتتار جىبەرىلەدى.
تۇركياداعى ءزىلزالا بولعاننان بەرى ەلىمىزدەگى ەرىكتىلەر, بەلسەندىلەر گۋمانيتارلىق كومەك ۇيىمداستىرىپ, قارجىلاي قولداۋ كورسەتىپ جاتىر. تۇركيانىڭ قازاقستانداعى ەلشىلىگى جينالعان قارجى بويىنشا مالىمدەمە جاساپ, قازاق جۇرتىنا العىس ايتتى.
«قازاقستاندا سوڭعى 3 كۇندە جەر سىلكىنىسىنەن زارداپ شەككەندەرگە كومەك كورسەتۋ شوتىنا جينالعان 1 ملن 28 مىڭ 706 دوللار كولەمىندەگى قاراجات AFAD-تىڭ رەسمي شوتىنا اۋدارىلدى. وسىلايشا قايىرىمدىلىقتىڭ جالپى سوماسى 2 ملن 849 مىڭ 836 دوللاردى قۇرادى», دەلىنگەن ەلشىلىكتىڭ رەسمي حابارلاماسىندا.
سونداي-اق اقپارات جانە قوعامدىق دامۋ ءمينيسترى دارحان قىدىرالى ەرىكتىلەر تاراپىنان جينالعان كومەكتىڭ ەسەبىن جاريالادى.
– ۇلتتىق ۆولونتەرلەر جەلىسى اقپارات جانە قوعامدىق دامۋ مينيسترلىگىنىڭ ۇيلەستىرۋىمەن ازاماتتاردان 80 ملن تەڭگە جينادى. ءبىرشاما كەرەك-جاراق قازاقستانداعى تۇركيا ەلشىلىگىنە تاپسىرىلدى. بۇل جۇمىس الداعى ۋاقىتتا دا جالعاسادى. قينالعانعا قول ۇشىن سوزعان بارلىق ۆولونتەرگە العىس ايتامىز, – دەدى مينيستر.
ال تۇركياعا كيىز ءۇي جەتكىزۋدى العاشقى بولىپ قولعا العان, باستاما كوتەرگەن جۋرناليست, بەلسەندى نۇربەك بەكباۋ حالىق قاراجاتىنا ساتىپ الىنعان جۇزدەن استام كيىز ءۇيدىڭ باسىم بولىگى تۇرىك ەلىنە ەندى جەتكىزىلگەنىن ايتتى. وتانداستارىمىز قازىر قاحارمانماراش قالاسىندا زارداپ شەككەن حالىققا كومەك كورسەتىپ ءجۇر.
– 90-عا جۋىق كيىز ءۇيدى تيەپ اپ, كوپ كۇتكەن ۇشاعىمىز كەلە جاتىر. كارتاعا قاراپ, باعىپ وتىرمىز. ساعات 13:00-دە اداناعا قونعاننان كەيىن جۇكتەردى قاحارمانماراشقا الىپ كەلەمىز. قىرعىز باۋىرلار بىزدەن بۇرىن بوز ۇيلەرىن اكەپ, تىگىپ قويدى. نەگە ولار ءبىرىنشى بولدى؟ ويتكەنى بىزدەر كيىز ءۇي ساتىپ الۋعا جىلۋ جيناي باستاعاندا قىرعىز دەپۋتاتتارى پرەزيدەنتتەرىنە ء«بىز دە 100 كيىز ءۇي اپارايىق» دەگەن ۇسىنىسىن ايتتى. پرەزيدەنتتەرى بىردەن تاپسىرما بەرىپ, ارنايى اۋىر ۇشاق دايىنداتىپ, وعان كيىز ۇيلەردى تيەپ, تۇركياعا اكەلە قويدى. ال ءبىز شە؟ «100 كيىز ءۇي» ناۋقانىنىڭ باسى-قاسىندا جۇرگەن توپ – قاراپايىم ازاماتتار. بىراق باسقالار مەملەكەتتىك دەڭگەيدە قولعا العان شارۋانى ءبىز 3-4 ادام بولىپ-اق اتقاردىق, – دەدى نۇربەك بەكباۋ.
ءجۋرناليستىڭ ايتۋىنشا, كيىز ۇيلەر ساتىپ الۋعا قاجەتتى قارجى تەز جينالعانىمەن, ولاردى جەتكىزۋ وڭاي بولماپتى.
– ۇشاق ماسەلەسى كادىمگىدەي قيىندىق تۋدىردى. العاشىندا Air Astana اۋە كومپانياسىنا حابارلاسقانىمىزدا وبالى نە كەرەك, «ۇلكەن جۇك ۇشاعىمىز جوق» دەپ جاعدايدى ايتىپ ءتۇسىندىردى. تجم «كيىز ۇيلەردى تەك اقپاننىڭ 20-لارىندا اكەتە الامىز. سول كەزدە, مينيسترلىكتىڭ ساربازدارىن اكەتۋگە بارامىز. ۇشاعىمىز بوس كەتپەس ءۇشىن, تيەپ الىپ كەتەيىك», دەدى. بۇل تىم كەش بولار ەدى. سودان «Turkish Airlines»-قا كارگو ۇشاق بەرسەڭىزدەر» دەگەن وتىنىشپەن شىقتىق. كەلىسىم بويىنشا ولار جۇما نەمەسە سەنبى كۇنى كيىز ۇيلەردى تيەپ, اكەلۋى كەرەك بولعان. بىراق ءبىز قاتارداعى ازاماتتارمىز. مەملەكەتتىك دەڭگەيدەگى شەنەۋنىك ەمەسپىز. سوندىقتان «Turkish Airlines» تۇركياعا شۇعىل زات اكەلۋ كەرەك بولىپ, الەمنىڭ ءار بۇرىشىنا كارگوسىن ايداپ كەتىپ جاتتى. بىزگە «قولى تيمەي كەتتى». ەگەر ءبىزدىڭ جۇكتى تۇركياعا جەتكىزۋ ماسەلەسى مەملەكەتتىك دەڭگەيدە قولعا الىنسا, سەنبى كۇنى اقشاڭقان قازاق ۇيلەرى وسى جاقتا جايناپ تۇرار ەدى. بار سەبەپ وسى عانا, – دەپ جاعدايدى ءتۇسىندىردى بەلسەندى.
Al Jazeera اقپارات اگەنتتىگىنىڭ سوڭعى اقپاراتى بويىنشا, تۇركيا مەن سيرياداعى جەر سىلكىنىسىنەن قازا تاپقاندار سانى 36 مىڭنان اسقان. تۇركيادا 31 643 ادامنىڭ ءمايىتى تابىلسا, سيريادا 4 614 ادامنىڭ قازا بولعانى راستالدى.
سيريا پرەزيدەنتى باشار اساد بۇۇ-نىڭ سيريانىڭ سولتۇستىك-باتىسىنداعى كوتەرىلىسشىلەر باقىلاۋىنداعى ايماقتارعا تۇركيادان تاعى ەكى شەكارا وتكەلى ارقىلى كومەك جەتكىزۋگە رۇقسات بەرۋگە كەلىستى. بۇۇ مالىمەتىنشە, جەر سىلكىنىسىنەن كەيىن سيريادا 5,3 ملن-عا جۋىق ادام باسپاناسىز قالۋى مۇمكىن.