رەسپۋبليكالىق ماڭىزى بار ر-10 استانا قالاسىنىڭ ۇلكەن اينالما جولىنىڭ ءتورتىنشى شاقىرىمىندا تەمىرجولدىڭ ۇستىنەن وتەتىن اپاتتى جاعدايداعى كوپىر وتكەلىندە كۇردەلى جوندەۋ جۇمىستارى باستالدى, دەپ حابارلايدى Egemen.kz «قازاۆتوجول» ءباسپاسوز قىزمەتىنە سىلتەمە جاساپ.
«كۇردەلى جوندەۋ جۇمىستارى بارىسىندا جالپى ۇزىندىعى 140 مەتردى قۇرايتىن وتكەلدىڭ ارالىق قۇرىلىمدارى مەن بارلىق تىرەك بولىكتەرى بولشەكتەلەدى, سودان كەيىن ماماندار بۇرعىلاۋ قادالارىن قۇيۋ, تىرەك بولىكتەرى مەن ارقالىقتاردى مونتاجداۋ بويىنشا جۇمىستارعا كىرىسەدى. كوپىر وتكەلىنىڭ قۇرىلىس جوباسى اياسىندا سوڭعى بىرنەشە جىلدا تىركەلگەن جوعارى قوزعالىس قارقىندىلىعى ەسكەرىلدى. بۇل كورسەتكىش تاۋلىگىنە 15 مىڭنان استام كولىكتى قۇراپ وتىر», دەلىنگەن حابارلامادا.
كۇردەلى جوندەۋ جۇمىستارى ەكى اۋىسىمدا جۇرگىزىلىپ جاتىر, ولارعا 30 ارنايى تەحنيكا مەن 70-كە جۋىق مامان جۇمىلدىرىلدى.
كوپىر وتكەلىندەگى كۇردەلى جوندەۋ جۇمىستارى ر-10 تراسساسىنىڭ وتكىزۋ قابىلەتىن ارتتىرىپ قانا قويماي, بولاشاقتا كولىكتەر مەن پويىزداردىڭ قوزعالىس قاۋىپسىزدىگىن قامتاماسىز ەتۋگە دە سەپتىگىن تيگىزەدى.