سەنات توراعاسى ماۋلەن اشىمباەۆ تۇركىستان قالاسىندا وتكەن ورتالىق ازيا مەملەكەتتەرىنىڭ ءبىرىنشى پارلامەنتارالىق فورۋمىنا بايلانىستى Facebook پاراقشاسىندا جازبا قالدىردى, دەپ حابارلايدى Egemen.kz.
«قازىرگى تاڭداعى گەوساياسي احۋال, جاھاندى الاڭداتقان جاڭا سىن-قاتەرلەر, قۇبىلمالى ەكونوميكا الەمنىڭ دامۋىنا ايتارلىقتاي سالدارىن تيگىزىپ وتىر. وسىنداي ساتتە تاتۋلىققا تابان تىرەپ, بىرلەسىپ ارەكەت ەتۋدىڭ اسا ماڭىزدى ەكەنى ايتپاسا دا تۇسىنىكتى. كيەلى تۇركىستان شاھارىندا وتكەن ورتالىق ازيا مەملەكەتتەرىنىڭ ءبىرىنشى پارلامەنتارالىق فورۋمىندا وڭىردەگى ارىپتەستەرىمىزبەن بىرگە وسى ماسەلەلەردى كەڭىنەن تالقىلادىق», دەپ جازدى م.اشىمباەۆ.
فورۋم قوجا احمەت ياساۋي كەسەنەسىن زيارات ەتىپ, بابا رۋحىنا تاعزىم ەتۋمەن باستالعان. كيەلى ورىندا جويقىن ءزىلزالادان زارداپ شەككەن تۇرىك اعايىندارعا سابىر تىلەپ, قازا تاپقانداردىڭ رۋحىنا دۇعا باعىشتالدى.
جالپى العاشقى جيىننىڭ تۇركىستان تورىندە ءوتۋى تەگىن ەمەس. تاريحى مەن تامىرى ءبىر ەلدەر ءۇشىن بۇل قالانىڭ ماڭىزى زور. اسىرەسە, مادەني جانە رۋحاني تۇرعىدا شاھاردىڭ ورنى بولەك. سوندىقتان عاسىرلار بويى قالىپتاسقان تىعىز ىنتىماقتاستىقتى ودان ءارى نىعايتۋ ءۇشىن باۋىرلاس حالىقتاردىڭ قاستەرلى مەكەندە باس قوسۋى زاڭدى قۇبىلىس ەكەنى انىق.
«قازىرگى تاڭدا ورتالىق ازيا ايماعىندا مەملەكەتارالىق ديالوگ جاڭا ساپالى دەڭگەيگە كوتەرىلگەن. بۇل – ءبىزدىڭ پرەزيدەنتتەرىمىزدىڭ ناقتى ءارى دايەكتى قادامدارىنىڭ ناتيجەسى. وسىنداي تىعىز ىنتىماقتاستىقتى زاڭ شىعارۋشى ورگاندار تاراپىنان قولداپ, ءارى قاراي دامىتۋدىڭ ماڭىزى زور. وسىعان وراي بىلتىر شىلدە ايىندا ورتالىق ازيا مەملەكەتتەرى باسشىلارىنىڭ كونسۋلتاتيۆتىك كەزدەسۋىندە اتالعان فورۋمدى وتكىزۋ تۋرالى باستاما قولعا الىندى. باستى ماقسات – ءوڭىردىڭ بىرتۇتاستىعىن نىعايتۋدا پارلامەنتتەردىڭ ءرولىن ارتتىرۋ. وسىلايشا, ايماقتاعى پارلامەنتارالىق ىنتىماقتاستىقتىڭ جاڭا كەزەڭى باستالىپ وتىر», دەلىنگەن جازبادا.
قازاقستان رەسپۋبليكاسىنىڭ پرەزيدەنتى قاسىم-جومارت كەمەل ۇلى توقاەۆ فورۋمعا قاتىسۋشىلاردى قۇتتىقتاپ, ۇندەۋ جولدادى. مەملەكەت باسشىسى پارلامەنتارالىق فورۋم دەر كەزىندە قولعا الىنعان ماڭىزدى باستاما ەكەنىن اتاپ ءوتتى.
ءىس-شاراعا قاتىسۋشىلار ورتاق تاريحي جانە مادەني مۇرالارىمىزدى دارىپتەۋگە, زيالىلار اراسىنداعى بايلانىستى ارتتىرۋعا, ءوڭىر جۇرتىن الاڭداتقان ماسەلەلەردى بىرلەسىپ شەشۋگە قاتىستى ناقتى ۇسىنىستار ايتتى. ونىڭ ءبارى نازارعا الىنىپ, فورۋمنىڭ قورىتىندىسى بويىنشا قابىلدانعان تۇركىستان دەكلاراتسياسىندا قامتىلدى.
«سونىمەن قاتار فورۋم اياسىندا قىرعىز رەسپۋبليكاسى جوگوركۋ كەنەشىنىڭ توراعاسى نۇرلانبەك شاكيەۆپەن, وزبەكستان رەسپۋبليكاسى ولي ءماجليسى سەناتىنىڭ ءتورايىمى تانزيلا نارباەۆامەن جانە تاجىكستان مادجليسي نامويانداگون مادجليسي ولي توراعاسى ماحمادتوير زوكيرزودامەن ەكىجاقتى كەزدەسۋلەر وتكىزىپ, پارلامەنتارالىق ىنتىماقتاستىقتى ارتتىرۋ ماسەلەلەرى جونىندە ءسوز قوزعادىق. الداعى ۋاقىتتا فورۋم باۋىرلاس ەلدەردىڭ ىنتىماقتاستىعىن نىعايتۋعا ەلەۋلى ۇلەس قوساتىن ءتيىمدى جانە تۇراقتى الاڭعا اينالادى دەپ سەنەمىز», دەپ جازدى ماۋلەن اشىمباەۆ.