جىل باسىنان بەرى استانادا 80-نەن استام ءورت تىركەلگەن. ماماندار وتكەن جىلدىڭ وسى كەزەڭىمەن سالىستىرعاندا ءتىلسىز جاۋدان كەلگەن قاۋىپتىڭ 52,8%-عا ارتقانىن ايتىپ, ەسكەرتۋ شارالارىن جانداندىرىپ وتىر.
قىس باستالعالى, اسىرەسە, جەر ۇيلەردەگى ءورت قاۋپى سەيىلمەي تۇر. ونىڭ باستى سەبەبىن ماماندار پەش پەن ەلەكتر جىلىتۋ قۇرىلعىلارىن پايدالانۋ كەزىندە ءورت قاۋىپسىزدىگى قاعيدالارىن ساقتاماۋ دەپ تۇسىندىرەدى. وسى ورايدا قۇتقارۋشىلار جەكە سەكتورلارداعى ءاربىر ۇيگە كىرىپ, ءورت قاۋىپسىزدىگى ەرەجەلەرىن ساقتاۋ بويىنشا اقپارات بەرىپ, تۇرعىندارعا ەسكەرتۋ جاساپ جاتىر.
ماسەلەن, جاڭا جىل باستالعالى بەرى ەلوردانىڭ ءبىر عانا الماتى اۋدانىندا 24 ءورت بولعان. بۇل وتكەن جىلدىڭ وسى كەزەڭىمەن سالىستىرعاندا 33,3 پايىزعا ارتىق (2022 جىلى 18 ءورت تىركەلگەن). ءورت سوندىرۋشىلەر قىزىل جالىننان 2 ادامدى قۇتقارىپ قالعان, ال 3 تۇرعىن جاراقات العان.
رەيدتى الماتى اۋدانى توتەنشە جاعدايلار باسقارماسىنىڭ قىزمەتكەرلەرى جەرگىلىكتى اتقارۋشى ورگاندارمەن بىرلەسىپ ۇيىمداستىردى.
– ستاتيستيكا كورسەتىپ وتىرعانداي, جەكە سەكتورلاردا ورىن العان ءورت سانى ارتىپ وتىر. سول سەبەپتى ءبىز تۇرعىنداردى ساق بولىپ, ءورت قاۋىپسىزدىگى ەرەجەلەرىن قاتاڭ ساقتاۋعا شاقىرىپ جاتىرمىز. ەلەكتر جەلىلەرى مەن قۇرالدارىن, گاز جابدىقتارىن پايدالانۋ كەزىندە بارلىعىنا سەلقوس قاراۋعا بولمايدى. اسىرەسە جىلىتۋ قۇرالدارىن پايدالانۋ كەزىندە وقشاۋلاعىشى زاقىمدالعان ەلەكتر سىمدارىن پايدالانۋعا تىيىم سالىنادى, ەلەكتر جىلىتۋ قۇرالدارىن جانعىش زاتتاردىڭ جانىنا ورناتپاۋ قاجەت. ۇيدەن شىققان كەزدە بارلىق ەلەكتر جىلىتۋ قۇرىلعىلارىن مىندەتتى تۇردە ءوشىرۋ كەرەك, – دەدى الماتى اۋدانى تجب باس مامانى, ازاماتتىق قورعاۋ مايورى ەرنۇر رايىمبەكوۆ.
وسىنداي ساقتىق ءىس-شارالارى جالعاسا بەرەدى: جىلىتۋ ماۋسىمى باستالار الدىندا جانە ءاربىر ءۇش اي سايىن تۇتىندىكتەردى كۇيەدەن تازالاۋ, جارىقتارى بار پەشتەردى پايدالانباۋ, جانىپ جاتقان پەشتەردى, گاز پليتاسىن, كامين, قوسىلعان ەلەكتر قىزدىرعىش جانە گاز اسپاپتارىن قاراۋسىز جانە بالالاردى ەرەسەكتەرسىز وزدەرىن قالدىرماۋ قاجەت. سونداي-اق ەلەكتر جەلىسىنىڭ ارتىق جۇكتەلۋىنە اكەلەتىن بىرنەشە قۋاتتى ەلەكتر تۇتىنۋشىلارىن ءبىر مەزگىلدە قوسۋعا بولمايدى, ءۇي, پاتەرلەردە گاز ءيىسى سەزىلگەن جاعدايدا ەلەكتر جارىعىن قوسۋعا, سىرىڭكە جاعۋعا, تەمەكى شەگۋگە, اشىق وتتى پايدالانۋعا جول بەرمەۋ قاجەت.
ء«ورت نەمەسە ءتۇتىن شىققان جاعدايدا ءورت ءسوندىرۋ قىزمەتىنە ناقتى مەكەنجايىن كورسەتە وتىرىپ, «101» نەمەسە «112» نومىرلەرىنە دەرەۋ قوڭىراۋ شالۋ كەرەك», دەيدى ە.رايىمبەكوۆ.