ادام قۇقىقتارى جونىندەگى ۋاكىل ارتۋر لاستاەۆ ۆاشينگتونعا جۇمىس ساپارى شەڭبەرىندە جەتەكشى حالىقارالىق ۇكىمەتتىك ەمەس ۇيىمداردىڭ وكىلدەرىمەن كەزدەستى. قازاقستان ەلشىلىگىنىڭ الاڭىنداعى سىندارلى ديالوگ اياسىندا سپيكەرلەر تۇرمىستىق زورلىق-زومبىلىق پەن ازاپتاۋدىڭ الدىن الۋ, ءسوز بوستاندىعى قۇقىعى جانە ساياسي پارتيالاردى تىركەۋ ماسەلەسىن كوتەردى.
جاھاندىق جيىنعا Freedom Now, Amnesty International, Solidarity Center, International Republican Institute, World Justice Project, National Democratic Institute جانە ءوز قىزمەتىن قازاقستاندا جۇزەگە اسىراتىن باسقا دا بىرقاتار ۇكىمەتتىك ەمەس ۇيىم قاتىستى. تاراپتار ۇلتتىق ينستيتۋتتاردى ودان ءارى دامىتۋعا جانە ولاردىڭ الەۋەتىن نىعايتۋعا باعىتتالعان حالىقارالىق جانە وڭىرلىك قۇقىق قورعاۋشىنىڭ وزەكتى ماسەلەلەردى شەشۋ بويىنشا ءوزارا ءىس-قيمىل جولدارىن تالقىلادى. ۋاكىل ۇكىمەتتىك ەمەس سەكتور وكىلدەرىن ەلدە جۇرگىزىلىپ جاتقان ادام قۇقىقتارى جونىندەگى ۋاكىل جانە كونستيتۋتسيالىق سوت تۋرالى زاڭداردا قابىلدانعان كونستيتۋتسيالىق رەفورما تۋرالى حاباردار ەتتى. بۇعان قوسا ومبۋدسمەننىڭ ءرولى, ونىڭ مارتەبەسى, تاۋەلسىزدىگى مەن وعان قول سۇعىلماۋشىلىق كەپىلدىگىنىڭ كۇشەيتىلگەنىن اتاپ ءوتتى.
ارتۋر لاستاەۆ قازاقستاندا ادام قۇقىقتارى جونىندەگى ۋاكىلدىڭ اۋماقتىق وكىلدەرىنىڭ تارماقتالعان جەلىسى جۇمىسىنىڭ باستالعانىن ايتتى. قۇرامىنا قۇقىق قورعاۋشى ۇيىمداردىڭ, ونىڭ ىشىندە ۇكىمەتتىك ەمەس ۇيىمداردىڭ باسشىلارى كىرەتىن ۋاكىلدىڭ جانىنداعى ۇيلەستىرۋ كەڭەسىنىڭ قىزمەتىن اتاپ ءوتتى. كەزدەسۋدى باسقوسۋدىڭ قۇقىق قورعاۋشى قىزمەتتىڭ تيىمدىلىگىن بارىنشا ارتتىرۋ ءۇشىن ماڭىزدىلىعىمەن قورىتىندىلادى.
سونداي-اق بۇعان دەيىن انكارادا ء«ححى عاسىرداعى ادام قۇقىقتارىنىڭ بولاشاعى» اتتى الاڭدا الەمنىڭ 30 ەلىنىڭ سپيكەرلەرى باسقوسقان ەدى. حالىقارالىق كونفەرەنتسياعا ازەربايجان, يتاليا, قاتار, موڭعوليا, پاكىستان, پالەستينا, رەسەي, وزبەكستان, ۋكراينا, وڭتۇستىك افريكا رەسپۋبليكاسى جانە شىعىس ەۋروپا, وڭتۇستىك ازيا مەن باتىس افريكانىڭ وزگە دە مەملەكەتتەرى قاتىستى. ولاردى تۇركيا پرەزيدەنتى رەجەپ تايپ ەردوعان جانە تۇرىك باس ومبۋدسمەنى شەريف مالكوچ قارسى الدى.
كونفەرەنتسيا اياسىندا قازاقستاننىڭ ادام قۇقىقتارى جونىندەگى ۋاكىلى ارتۋر لاستاەۆ تۇركيا, رەسەي فەدەراتسياسى جانە باسقا دا بىرقاتار ەلدىڭ ومبۋدسمەندەرىمەن ەكىجاقتى كەلىسسوزدەر مەن كونسۋلتاتيۆتىك كەزدەسۋلەر وتكىزدى. وندا قۇقىق قورعاۋشى قۇندىلىقتارىن ىلگەرىلەتۋ سالاسىنداعى ءوزارا ىنتىماقتاستىق ماسەلەلەرى تالقىلاندى.
پانەلدىك وتىرىستا ارتۋر لاستاەۆ ەلدەگى وزگەرىستەردەن بولەك, قوعامنان ۋاقىتشا وقشاۋلانعان جەرلەردە ادام قۇقىقتارىن بۇزۋدىڭ الدىن الۋ بويىنشا قابىلدانىپ جاتقان جوعارى تەحنولوگيالىق شەشىمدەرمەن تانىستىردى.
– جابىق مەكەمەلەردى ۇزدىكسىز بەينەباقىلاۋ جۇيەسىمەن تولىقتاي قامتۋ, مەكەمە اكىمشىلىگىنىڭ باقىلاۋىنان تىس قاداعالاۋ ورگاندارىنا وتىنىشتەر بەرۋ ءۇشىن ەلەكتروندىق تەرمينالداردى ەنگىزۋ, ونلاين سوت وتىرىستارى, ادۆوكاتتارمەن, ۇلتتىق الدىن الۋ تەتىگىنىڭ قاتىسۋشىلارىمەن جانە تۋىستارىمەن ونلاين كەزدەسۋلەر, قاشىقتان پروباتسيالىق باقىلاۋ قۇرالدارى ەنگىزىلمەكشى. سونىمەن قاتار تسيفرلاندىرۋ اياسىندا باس بوستاندىعىنان ايىرۋ ورىندارىندا ەلەكتروندىق ۇكىمەتتىڭ قىزمەتتەرى كەزەڭ-كەزەڭىمەن ىسكە قوسىلادى, – دەدى ول.
ينتەراكتيۆتى ديالوگتە ادام قۇقىقتارى جونىندەگى ۋاكىل جان-جاقتى فورماتتاعى قۇقىق قورعاۋشىنىڭ قىزمەتى جايلى پىكىر الماسۋعا جانە وزىق تاجىريبەمەن بولىسۋگە اشىقتىعىن ءبىلدىردى.
ايتا كەتەيىك, ادام قۇقىقتارى جونىندەگى ۋاكىل بۇۇ دامۋ باعدارلاماسىمەن ىنتىماقتاستىق باعدارلاماسىنا تۇزەتۋلەر ەنگىزدى. ول ءۇشىن بۇۇ دامۋ باعدارلاماسىنىڭ قازاقستانداعى تۇراقتى وكىلىنىڭ مىندەتىن اتقارۋشى سۋحروب حودجيماتوۆپەن جۇزدەستى. تاراپتار كونستيتۋتسيالىق رەفورما كونتەكسىندەگى ادام قۇقىقتارى سالاسىنداعى ۇلتتىق زاڭنامانىڭ سوڭعى وزگەرىستەرىن ەسكەرە وتىرىپ ىنتىماقتاستىق باعدارلاماسىن تۇزەتۋ جانە بۇۇ دب مەن ەل ۇكىمەتىنىڭ گرانتتارى شەڭبەرىندەگى ودان ءارى بىرلەسكەن جوبالاردىڭ باسىمدىقتارىن ءسوز ەتتى. ءوز كەزەگىندە س.حودجيماتوۆ ۇلتتىق قۇقىق قورعاۋشى ينستيتۋتتىڭ باستامالارىن قولداۋعا دايىن ەكەنىن جەتكىزدى.