وڭىرلىك مەرزىمدى ءباسپاسوز باسىلىمدارى فورۋمىندا «ماسس-مەديا تۋرالى» زاڭدا كاسىبي جۋرناليستەرگە قاراستىرىلعان جەڭىلدىكتەر جايلى ءسوز بولدى, دەپ حابارلايدى Egemen.kz.
«اقپاراتقا قول جەتىمدىلىكتى جەڭىلدەتۋ جونىندەگى زاڭ اياسىندا جۋرناليستەردىڭ ساۋالىنا جاۋاپ بەرۋ مىندەتتەلەدى. سونداي-اق تىلشىلەردىڭ ساۋالىنا جاۋاپ بەرۋ مەرزىمى دە قىسقارادى. بىراق كەيبىر سۇراقتاردىڭ جاۋابى ساپالى بولۋى ءۇشىن جانە وزگە دە ۆەدومستۆولاردىڭ جاۋاپتارىن بىرىكتىرىپ بەرۋ ءۇشىن ولارعا دا ۋاقىت بەرۋ كەرەك. دەگەنمەن دە 3-5 كۇن ىشىندە تىلشىلەر ساۋالىنا ساپالى جاۋاپ بەرىلەتىن بولادى. سونىمەن قاتار تىلشىلەر جولداعان ساۋالعا جاۋاپ بەرمەگەن مەملەكەتتىك قىزمەتكەرلەر جاۋاپكەرشىلىككە تارتىلادى. مۇنىڭ ءبارى ءجۋرناليستىڭ اقپاراتقا قولجەتىمدىلىگىن جەڭىلدەتۋ ماقساتىندا جاسالىپ جاتىر. سونىمەن قاتار قازىر زاڭ جوباسى اياسىندا كەيبىر دسپ دەگەن قۇجاتتاردىڭ الىنىپ تاستالۋى, ءجۋرناليستىڭ اقپاراتقا قولجەتىمدىلىگىن بارىنشا قامتاماسىز ەتۋ قاراستىرىلعان. قازىر «قوعامدىق باقىلاۋ جانە ونلاين پەتيتسيا» دەگەن دە زاڭ جوباسى ماجىلىستە جاتىر. ول دا ءجۋرناليستىڭ جۇمىسىن جەڭىلدەتەدى. «ماسس-مەديا تۋرالى» زاڭدا كاسىبي ءجۋرناليستىڭ مارتەبەسىن كوتەرۋ, پرەسس-كارتتىڭ كىمدەرگە بەرىلۋى كەرەكتىگى تۋرالى ايتىلعان. جۋرناليستيكاعا ادال ازاماتتار مەن زەرتتەۋسىز, ەشقانداي تەكسەرۋسىز «حايپ» قۋالاعانداردىڭ اراسىندا ايىرماشىلىق بولۋى كەرەك. جاڭا زاڭ جوباسىندا جۋرناليستەردىڭ «وتباسى بانكتەن» جەڭىلدىكپەن پاتەر الۋ ماسەلەسى مەن اۋرۋحانادان جەڭىلدىكتەر الۋ سەكىلدى ۇسىنىستار بار. قاراپايىم ءبىر مىسال, كولىگىندە «پرەسسا» دەگەن جازۋى بار جۋرناليستەر اۆتوكولىگىن كەز كەلگەن جەرگە قويۋ نەمەسە كەز كەلگەن مەكەمەگە ەنۋ سەكىلدى باسقا دا ىڭعايلى جاعدايلار جاساۋدى قاراستىرىپ وتىرمىز. بىراق مۇنىڭ ءبارى كوپتەگەن ۆەدومستۆولارمەن بىرگە قاراستىرىلادى. ولاردىڭ كەلىسىمى الىنادى. سودان كەيىن زاڭ جوباسى ماجىلىسكە ەنەدى», دەدى اقپارات جانە قوعامدىق دامۋ ءمينيسترى دارحان قىدىرالى.
سونداي-اق ۆەدومستۆو باسشىسى ۇكىمەت وتىرىستارىنا قاتىساتىن, پارلامەنتكە تىركەلگەن جۋرناليستەردىڭ جۇمىسىنا كوڭىلى تولمايتىنىن دا ءبىلدىردى. ونىڭ ايتۋىنشا, باق وكىلدەرى تالقىلانعان زاڭ اياسىندا, اتقارىلۋى كەرەك جۇمىستار تۋراسىندا ەمەس تاقىرىپتان تىس سۇراقتار قويىپ جاتادى. سول سەبەپتى سالالىق جۋرناليستيكانى دامىتۋدىڭ وزەكتى ەكەنىن اتاپ ءوتتى.
ەسكە سالايىق, بۇگىن ەلوردادا ءوتىپ جاتقان فورۋمعا ءار ايماقتان 200 دەلەگات كەلگەن. فورۋم ەرتەڭ دە جالعاسادى.