پرەزيدەنت ابۋ دابي امىرلىگىنىڭ بيلىك باسىنداعى اۋلەتىنىڭ اعا وكىلى, ءباا-ءنىڭ ءىرى كاسىپكەرلەرىنىڭ ءبىرى, «First Abu Dhabi Bank» اكتسيونەرى سۋرۋر بەن مۇحاممەد ءال ناحايانمەن كەزدەسۋ وتكىزدى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
قاسىم-جومارت توقاەۆ بىرىككەن اراب امىرلىكتەرى قازاقستاننىڭ ايماقتاعى باستى ەكونوميكالىق جانە ساۋدا سەرىكتەسى ەكەنىن, ءباا پرەزيدەنتى شەيح مۇحاممەد بەن زايد ءال ناحايانمەن بۇگىنگى كەلىسسوز بارىسىندا ساۋدا-ەكونوميكالىق جانە ينۆەستيتسيالىق ىنتىماقتاستىقتى ودان ءارى نىعايتۋ جونىندە ۋاعدالاستىققا كەلگەنىن, سونداي-اق ماڭىزدى كەلىسىمدەرگە قول قويعانىن جەتكىزدى.
مەملەكەت باسشىسىنىڭ ايتۋىنشا, قازاقستان مەن ءباا ۇكىمەتتەرى قابىلداعان ستراتەگيالىق ينۆەستيتسيالىق جوبالار جاساۋ تۋرالى بىرلەسكەن دەكلاراتسيا ەكىجاقتى سەرىكتەستىكتى نىعايتۋعا تىڭ سەرپىن بەرەدى.
پرەزيدەنت ينۆەستيتسيالىق ءىس-ارەكەتتىڭ باسىمدىعىنا نازار اۋدارىپ, قابىلدانعان دەكلاراتسيا اياسىندا شەيح سۋرۋر بەن مۇحاممەد ءال ناحاياننىڭ كومپانيالار توبىن بىرقاتار جوبانى جۇزەگە اسىرۋعا شاقىردى.
ءوز كەزەگىندە ابۋ دابي امىرلىگىنىڭ بيلىك باسىنداعى اۋلەتىنىڭ اعا وكىلى قازاقستانداعى جوبالارعا ينۆەستيتسيا قۇيۋ جونىندەگى جوسپارىن ايتتى.