قازاقستان رەسپۋبليكاسى ۇلتتىق ۇلانى «وڭتۇستىك» وڭىرلىك قولباسشىلىعىندا قازاقستان رەسپۋبليكاسى ۇلتتىق ۇلانىنىڭ قۇرىلعانىنا 31 جىل تولۋىنا وراي سالتاناتتى جيىن ءوتتى, دەپ حابارلايدى Egemen.kz ۆەدومستۆونىڭ ءباسپاسوز قىزمەتىنە سىلتەمە جاساپ.
تاۋەلسىزدىك العان العاشقى كەزەڭنەن باستاپ ەلدىڭ قوعامدىق قاۋىپسىزدىگى مەن ىشكى ءتارتىبىن كۇزەتۋ, تۇزەۋ مەكەمەلەرى مەن اسا ماڭىزدى نىسانداردى قورعاۋ ماقساتى مەملەكەتىمىزدىڭ الدىنداعى ماڭىزدى ماقساتتاردىڭ ءبىرى بولىپ تۇردى. وسى ماقساتتا 1992 جىلدىڭ 10 كاڭتارىندا قازاقستان رەسپۋبليكاسى پرەزيدەنتىنىڭ جارلىعىمەن ىشكى ىستەر مينيستىرلىگىنىڭ ىشكى اسكەرلەرى قۇرىلدى.
2014 جىلدىڭ 21 ساۋىرىندە ىشكى اسكەرلەر ۇلتتىق ۇلان بولىپ قايتا قۇرىلدى. ال 2015 جىلى «ۇلتتىق ۇلان تۋرالى» زاڭ كۇشىنە ەندى.
قاۋىپسىزدىكتىڭ قالقانى, ەگەمەن ەلىمىزدىڭ قورعانى ۇلتتىق ۇلاننىڭ جاۋىنگەرلىك تاريحي جىلناماسى سوناۋ تاۋەلسىزدىكتىڭ العاشقى جىلدارىندا, 1992 جىلى 10 قاڭتاردا قازاقستان رەسپۋبليكاسى پرەزيدەنتىنىڭ «قازاقستان رەسپۋبليكاسى ءىىم ىشكى اسكەرلەرى تۋرالى» جارلىعىنا قول قويعاننان باستاپ جازىلا باستادى. تاۋەلسىزدىكتىڭ ەلەڭ-الاڭ شاعىندا ەلدىڭ ەرتەڭى مەن قاۋىپسىزدىك قامى ءۇشىن قابىلدانعان بۇل رەفورمالىق شارالار باعامىنىڭ تاريحي قۇندىلىعىن ايتپاساق تا, تۇسىنىكتى. ۇلتتى ورتاق يگىلىككە ۇيىتۋ, ەل بىرلىگىن ساقتاۋ, تىنىشتىقتى قامداۋ, وندىرىستەگى وركەندى ىستەرگە جول اشۋدىڭ ءبارى - ەلىن سۇيە بىلگەن, ەلدىكتى بەكەمدەي بىلگەن مەملەكەت باسشىسىنىڭ ەرەن ەڭبەگىنىڭ جەمىسى.
مەرەكەلىك شارا جاۋىنگەرلىك تۋ كىرگىزىلگەننەن كەيىن, مەملەكەتتىك ءانۇران ورىنداۋدان باستالدى.
اتالعان شاراعا «وڭتۇستىك» وڭىرلىك قولباسشىلىعىنىڭ جانە الماتى گارنيزونىنداعى اسكەري بولىمدەردىڭ جەكە قۇرامى, ۇلتتىق ۇلان ارداگەرلەرى قاتىستى.
مەرەكەلىك كەشتە العاشقى بولىپ ءسوز العان قازاقستان رەسپۋبليكاسى ۇلتتىق ۇلانى «وڭتۇستىك» وڭىرلىك قولباسشىلىعى قولباسشىسىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى, پولكوۆنيك نيازتاي الكەشەۆ جەكە قۇرامدى ايتۋلى داتامەن قۇتتىقتاپ, بايانداما جاسادى.
«31 جىلدا جاسالعان يگىلىكتى ىستەر از ەمەس. قازاقستان رەسپۋبليكاسىنىڭ پرەزيدەنتى – قاسىم-جومارت كەمەل ۇلى توقاەۆتىڭ قامقورلىعىنىڭ ارقاسىندا ۇلتتىق ۇلان قالىپتاسۋ جولىنان ءوتىپ, دامۋعا كوشتى. وسى جىلدارى اسكەردىڭ كاسىبي ساپاسى ەسەلەپ ارتتى. ونىڭ ماتەريالدىق-تەحنيكالىق قامتىلۋى قارقىندى دامىپ جاتىر. قازىرگى كەزدە ۇلتتىق ۇلان ەلدىڭ سەنىمىن اقتايتىن ايبىندى كۇشكە اينالدى. بۇگىنگى كاسىبي مەرەكەدە وڭىرلىك قولباسشىلىقتىڭ بارلىق جەكە قۇرامىنا, ارداگەرلەرگە جانە وتباسىلارىڭىزعا زور دەنساۋلىق, بەرەكە-بىرلىك, اماندىق, ەل يگىلىگىن ەسەلەۋ جولىنداعى ەسەلى ەڭبەكتەرىڭىزگە تولاعاي تابىستار تىلەيمىن!», دەدى پولكوۆنيك نيازتاي الكەشەۆ.
بۇدان كەيىن «وڭتۇستىك» وڭىرلىك قولباسشىلىعى قولباسشىسىنىڭ مىندەتىن ۋاقىتشا اتقارۋشى پولكوۆنيك بەكايدار قازكەەۆ ءسوز الىپ, مەرەكەلىك جيىندا قىزمەتتىك مىندەتتەرىن ادال اتقارىپ, ۇزدىك جەتىستىكتەرگە قول جەتكىزگەن اسكەري قىزمەتشىلەر مەن ۇلتتىق ۇلاننىڭ قارقىندا دامۋىنا ءوز ۇلەستەرىن قوسقان ارداگەرلەرگە قۇرمەت كورسەتتى. ماراپاتتاۋ راسىمىنەن كەيىن ەلىمىزدىڭ تاۋەلسىزدىك العالى وتكەن تاريح جولىنا توقتالا كەلىپ, ونىڭ ىشىندە ۇلتتىق ۇلاندا بولعان وڭ وزگەرىستەردى جانە وعان ۇلاندىق جاۋىنگەرلەردىڭ قوسقان ۇلەسىن ماقتانىشپەن اتاپ ءوتتى.
ءىس-شارانىڭ رەسمي بولىمىنەن كەيىن مەرەكەلىك كونتسەرت ءوتتى. كورەرمەندەر الدىندا «گەنەرال» توبىنىڭ انشىلەرى ونەر كورسەتتى.