باس پروكۋرور بەرىك اسىلوۆ قازاقستاندا قاڭتارداعى تارتىپسىزدىكتى ۇيىمداستىرۋ فاكتىسى بويىنشا 18 ادامعا ايىپ تاعىلعانىن ايتتى, دەپ حابارلايدى Egemen.kz.
بۇگىن ماجىلىستەگى كەزەكتەن تىس تىڭداۋلار بارىسىندا قۇقىق قورعاۋ ورگاندارىنىڭ وكىلدەرى قاڭتار وقيعاسىنا قاتىستى تەرگەۋدىڭ قورىتىندىسىن جاريالادى.
پارلامەنت وتىرىسىندا جۋرناليستەر باس پروكۋرورعا ۇقك-ءنىڭ بۇرىنعى توراعاسى كارىم ءماسىموۆ ءوز مۇددەسى ءۇشىن ارەكەت ەتتى مە, الدە بىرەۋدىڭ تاپسىرماسىن ورىندادى ما دەگەن ساۋال قويدى.
«بۇل ىستەر وتە قۇپيا تۇردە تەرگەلۋدە. سوندىقتان مەن بۇل ناقتى سۇراقتاردى وسى ءىستى تەرگەپ جاتقان ۇلتتىق قاۋىپسىزدىك كوميتەتىنە جىبەرەر ەدىم. ءبىز تارتىپسىزدىككە قاتىستى 18 ءىس قوزعادىق», دەدى ب.اسىلوۆ.
ماجىلىستەگى تىڭداۋلار بارىسىندا باس پروكۋرور قاڭتار وقيعاسى كەزىندە ۇقك-ءنىڭ بۇرىنعى توراعاسى كارىم ءماسىموۆ پەن ونىڭ ەكس-ورىنباسارى ءانۋار سادىقۇلوۆ سوت عيماراتىن بوساتۋ تۋرالى بۇيرىق بەرگەنىن ايتتى.
سونداي-اق باس پروكۋراتۋرانىڭ رەسمي YouTube ارناسىندا 2022 جىلدىڭ قاڭتار ايىندا ورىن العان تارتىپسىزدىكتەرگە ارنالعان فيلم جاريالاندى.