الماتى قالاسىنىڭ المالى اۋدانىنداعى 18 قاباتتى ءۇيدىڭ ءتورتىنشى قاباتىندا ءورت ورىن الدى, دەپ حابارلايدى Egemen.kz.
تجد مالىمەتتەرى بويىنشا, 3 قاڭتاردا ساعات 10:13-تە ءورت سوندىرۋشىلەر المالى اۋدانى, برۋسيلوۆسكي كوشەسى, 167-ءۇي, 4-بلوك مەكەنجايى بويىنشا جوعارى دارەجەلى شاقىرۋعا شىقتى.
«قابىلدانعان شارالارمەن ءورت 10:44-تە وقشاۋلاندى, 10:59-دا تولىق جويىلدى, بەسىنشى قاباتقا ءورتتىڭ تارالۋىنا جول بەرىلمەدى. قۇرباندار مەن زارداپ شەككەندەر جوق. ءورتتىڭ سەبەبى انىقتالۋدا. تجد-نىڭ 43 قىزمەتكەرى مەن 11 تەحنيكا شىقتى», دەپ حابارلادى الماتى تجد ءباسپاسوز قىزمەتى.