قازاقستاندا جەلتوقساندا قاراشامەن سالىستىرعاندا كوروناۆيرۋس ينفەكتسياسىمەن سىرقاتتانۋشىلىق 2,3 ەسە ءوستى. بۇل تۋرالى وكق بريفينگىندە باس مەملەكەتتىك سانيتاريالىق دارىگەر – دەنساۋلىق ساقتاۋ ۆيتسە-ءمينيسترى ايجان ەسماعامبەتوۆا ايتتى, دەپ حابارلايدى Egemen.kz.
«ەپيدەميالىق جاعدايدى باعالاۋ ماتريتساسىنا سايكەس 12 تامىزدان باستاپ قازاقستان رەسپۋبليكاسى مەن ونىڭ بارلىق وڭىرلەرى جاسىل ايماقتا. الايدا جەتىسۋ, اتىراۋ, جامبىل, قىزىلوردا, سولتۇستىك قازاقستان وبلىستارىن قوسپاعاندا, ەلدىڭ 13 وڭىرىندە R كورسەتكىشىنىڭ بىردەن جوعارى ەكەنى بايقالادى. بۇل ينفەكتسيانىڭ تارالۋىنىڭ وسكەنىن كورسەتەدى. تاۋلىگىنە 300-گە دەيىن كۆي+ جانە 20-عا دەيىن كۆي مينۋس جاعدايى تىركەلىپ وتىر», دەدى ا. ەسماعامبەتوۆا.
بۇل رەتتە ينفەكتسيالىق توسەك-ورىننىڭ قامتىلۋى – 13 % (309 توسەك-ورىن), رەانيماتسيالىق توسەك-ورىننىڭ قامتىلۋى – 4 % (17 توسەك-ورىن).
باس سانيتاريالىق دارىگەردىڭ ايتۋىنشا, شەكتەۋ شارالارىن ەنگىزۋگە كەلەتىن بولساق, 1-دەن جوعارى R كورسەتكىشى تىركەلگەن جاعدايدا حالىق كوپ جينالاتىن جەرلەردە ماسكا تاعۋ ۇسىنىلادى.
ەلدىڭ باس سانيتاريالىق دارىگەرى اتاپ وتكەندەي, كۆي-گە قارسى رەۆاكتسيناتسيا جاساۋ ينفەكتسيادان قورعانۋدىڭ جالعىز ءتاسىلى بولىپ قالا بەرەدى.
«العاشقى رەۆاكتسيناتسيانى 5,7 ملن ادام نەمەسە ءتيىستى حالىقتىڭ 70,5%-ى, قايتا رەۆاكتسيناتسيالاۋدى 1,2 ملن ادام نەمەسە ءتيىستى حالىقتىڭ 54,8%-ى الدى. تاۋلىگىنە ورتا ەسەپپەن 2600 ادام العاشقى رەۆاكتسيناتسيانى الدى, 4300 ادام قايتا رەۆاكتسيناتسيادان ءوتتى», دەدى دەنساۋلىق ساقتاۋ ۆيتسە-ءمينيسترى.
ا. ەسماعامبەتوۆانىڭ اقپاراتى بويىنشا قازىرگى ۋاقىتتا قازاقستاندا حالىقتى ۆاكتسيناتسيالاۋ جانە رەۆاكتسيناتسيالاۋ ءۇشىن ۆاكتسينالاردىڭ 3 ءتۇرى بار. ولار: كازۆاك, Sinofarm جانە Pfizer. ەگۋ پۋنكتتەرىندە 98 مىڭ دوزا كازۆاك, 306 مىڭ دوزا Sinofarm جانە 71 مىڭ Pfizer قالدىعى بار.
بۇدان باسقا, باس سانيتاريالىق دارىگەر وتكەن جىلدىڭ وسىنداي كەزەڭىمەن سالىستىرعاندا اعىمداعى ەپيدەميالىق ماۋسىمدا ەلدە جرۆي-مەن سىرقاتتانۋشىلىق 10%-عا وسكەنىن حابارلادى.
ماسەلەن, 2022 جىلدىڭ 1 قازانىنان باستاپ قازاقستاندا جرۆي-دىڭ 2,2 ملن جاعدايى جانە تۇماۋدىڭ 2 284 جاعدايى تىركەلدى, ناۋقاستاردىڭ 65%-ى 14 جاسقا دەيىنگى بالالار.
جرۆي-مەن اۋىراتىن جانە كۆي-عا كۇدىكتى پاتسيەنتتەرگە مەديتسينالىق كومەك كورسەتۋ ءۇشىن مساك ۇيىمدارىندا 2 289 ءموبيلدى بريگادا جۇمىس ىستەيتىنىن ايتتى, ونىڭ ىشىندە اۋىلدا – 1022, رەزەرۆتە – 1521.
تىنىس الۋ اعزالارىنىڭ اۋرۋلارىمەن ستاتسيونارلىق ەمدەۋدە 15 826 ادام, ونىڭ ىشىندە جرۆي دياگنوزىمەن – 8202 (52 %), تۇماۋمەن – 19 ادام (0,12%) بار.
دەنساۋلىق ساقتاۋ ۆيتسە-ءمينيسترى تۇماۋدىڭ كلينيكالىق بەلگىلەرىن ەسكە سالدى. ول 1,5 كۇنگە دەيىن قىسقا ينكۋباتسيالىق كەزەڭىمەن ەرەكشەلەنەدى. ال كۆي جانە باسقا جرۆي كەزىندە ول 10 كۇنگە دەيىن سوزىلادى. سونداي-اق جرۆي-مەن سالىستىرعاندا تۇماۋ ءجىتى باستالادى جانە دەنە تەمپەراتۋراسى 39°C-قا دەيىن كوتەرىلەدى, قالتىراۋ, بۇلشىقەت پەن باستىڭ اۋىرۋى, بۇكىل دەنەنىڭ سىرقىراۋى, كەۋدە سۇيەگىنىڭ استى اۋىرىپ, قۇرعاق جوتەل بايقالادى.
ءسوز سوڭىندا باس سانيتاريالىق دارىگەر الداعى جاڭا جىل مەرەكەسىن ەسكەرە وتىرىپ, كۆي مەن باسقا دا ۆيرۋستىق ينفەكتسيالاردى جۇقتىرۋدان ساقتايتىن بىرنەشە پروفيلاكتيكالىق ۇسىنىمدار بەردى. ولاردىڭ ءبىرىنشىسى – حالىق كوپ جينالاتىن جەرلەردە ماسكانى پايدالانۋ, مۇمكىندىگىنشە ادامدار كوپ جينالاتىن ورىندارعا, اسىرەسە جابىق ءۇي-جايلارعا, اسىرەسە بالالارمەن بارۋدى شەكتەۋ, قولدى وڭدەۋ ءۇشىن انتيسەپتيكتەر نەمەسە دەزينفەكتسيالىق سۋلىقتاردى پايدالانۋدى ۇمىتپاۋ, ناۋقاس ادامدارمەن بايلانىستى شەكتەۋ.