ەلوردادا شەكارا ارقىلى زەرگەرلىك بۇيىمداردىڭ ۇلكەن پارتياسىن زاڭسىز تاسىمالداعان ەر ادام سوتتالدى, دەپ حابارلايدى Egemen.kz قارجى مونيتورينگ اگەنتتىگىنىڭ ءباسپاسوز قىزمەتىنە سىلتەمە جاساپ.
«قما استانا قالاسى بويىنشا دەپارتامەنتى ەكونوميكالىق كونتراباندا فاكتىسى ياعني, ەۋرازيالىق ەكونوميكالىق وداقتىڭ كەدەندىك شەكاراسى ارقىلى اسا ءىرى مولشەردە تاۋارلاردى وتكىزۋ بويىنشا نۇرجان سۋراپوۆقا قاتىستى قىلمىستىق ءىستى سوتقا جولدادى», دەلىنگەن قما حابارلاماسىندا.
ول استانا حالىقارالىق اۋەجايىندا «ىستانبۇل-استانا» اۆيارەيسىمەن التىن اشەكەيلەردى تاسىمالداۋ بارىسىندا ۇستالدى. مامانداردىڭ قورىتىندىسى بويىنشا دەكلاراتسيالانباعان «زەرگەرلىك بۇيىمدار مەن ساعاتتاردىڭ» جالپى كەدەندىك قۇنى 565 ملن تەڭگەنى نەمەسە 1 ملن 200 مىڭ اقش دوللارىنا جۋىق سومانى قۇرادى.
سوت شەشىمىمەن, نۇرجان سۋراپوۆقا 1,5 جىل باس بوستاندىعىن شەكتەۋ تۇرىندەگى جازا تاعايىندالىپ, 565 ملن تەڭگە سوماسىنا, جالپى سالماعى 28 كگ بولاتىن, 7 مىڭنان استام زەرگەرلىك بۇيىمدار مەملەكەت كىرىسىنە تاركىلەندى.