الماتى قالاسىندا «ۋران ونەركاسىبىنىڭ وزەكتى ماسەلەلەرى» ح حالىقارالىق عىلىمي-پراكتيكالىق كونفەرەنتسيا ءوتىپ جاتىر, دەپ حابارلايدى Egemen.kz.
كونفەرەنتسيا جۇمىسىنا قازاقستان, رەسەي, فرانتسيا, كانادا, گەرمانيا, ۇلىبريتانيا, پولشا, وزبەكستان, قىرعىزستان, تاجىكستان جانە جاپونيا عالىمدارى قاتىسۋدا. جالپى العاندا, ءىس-شاراعا اتوم سالاسىنداعى جەتەكشى كاسىپورىندار مەن كومپانيالاردىڭ 450-دەن استام وكىلدەرى كەلدى.
اتاپ ءوتۋ كەرەك, اتوم ەنەرگەتيكاسىن دامىتۋعا بەت العان الەمدىك ءۇردىس ەلىمىزدە دە وسى سالاعا ەرەكشە نازار اۋدارۋدى تالاپ ەتە باستادى. بۇل رەتتە, قاتىسۋشىلار ۋراننىڭ مينەرالدىق-شيكىزات بازاسىن دامىتۋدىڭ ستراتەگياسىن, عىلىم مەن ءوندىرىستى جەتىلدىرۋ ماسەلەلەرىن جان-جاقتى قاراستىرۋى زاڭدى.
كونفەرەنتسيانىڭ نەگىزگى ماقساتى دا سول – ۋران ءوندىرۋدىڭ قازىرگى جاعدايى مەن الداعى بولاشاعىن تالقىلاۋ, حالىقارالىق قوعامداستىقپەن بىرلەسىپ, وزىق عىلىمي-تەحنولوگيالىق ماقساتتاردى اتاپ ءوتۋ جانە ولاردى شەشۋ ءۇشىن الاڭ ۇسىنۋ.
ۋران ونەركاسىبىنىڭ ماڭىزدى مىندەتتەرىن شەشۋدى عىلىم مەن تەحنولوگياسىز, حالىقارالىق ارەنادا ەلەستەتۋ مۇمكىن ەمەس. اتوم يندۋسترياسىن دامىتۋ الەمدىك كومپانيالاردى, عالىمداردى بىلىكتى مامانداردى بىرىكتىرۋدى تالاپ ەتەدى.
ەلىمىزدەگى ۇلتتىق كومپانيا «قازاتومونەركاسىپ» سالانىڭ قولدانىستاعى مينەرالدىق-شيكىزاتتىق, تەحنولوگيالىق, زياتكەرلىك جانە ەكونوميكالىق الەۋەتىن ءتيىمدى پايدالانۋ ءارى ۇلعايتۋ بويىنشا اۋقىمدى باعدارلامانى ىسكە اسىرىپ جاتىر.
«وزدەرىڭىز بىلەسىزدەر, قازاتومونەركاسىپ ەلىمىزدىڭ تەك بەيبىت اتومدى دامىتۋ ساياساتىن ۇستانادى. كونفەرەنتسيادا قامتىلاتىن ماسەلەلەردىڭ كەڭ اۋقىمى مەن قاتىسۋشىلاردىڭ جوعارى دەڭگەيى وعان قازاقستان مەن باسقا ەلدەر ءۇشىن ستراتەگيالىق ماڭىزدى سالا رەتىندە الەمدىك ۋران يندۋسترياسىنداعى ماڭىزدى وقيعا مارتەبەسىن بەرەتىنى ءسوزسىز», دەپ اتاپ ءوتتى قازاتومونەركاسىپتىڭ باسقارما توراعاسى ەرجان مۇقانوۆ.
قازاقستاننىڭ مەملەكەتتىك ساياساتىنداعى ماڭىزدى باعىتتاردىڭ ءبىرى – الەمدىك ساحنادا «بەيبىت اتوم» سالاسىن دامىتۋعا باسىمدىق بەرۋ. ءارى اتالعان سالادا عىلىمدى دامىتۋ ماسەلەسىنە بەتبۇرىس جاساۋ اسىرەسە ماڭىزدى ەكەندىگى انىق.
وسىعان بايلانىستى, قازاتومونەركاسىپ باسشىسى «اتوم يندۋسترياسىنداعى عىلىمي-تەحنولوگيالىق كوشباسشىلىققا قول جەتكىزۋ ماقساتىندا وندىرىستىك پروتسەسكە وزىق تەحنولوگيالار مەن يننوۆاتسيالىق شەشىمدەردى ەنگىزە وتىرىپ, عىلىمي ازىرلەمەلەردى بەلسەندى جۇرگىزۋ ماڭىزدى», دەدى.
كونفەرەنتسيا بارىسىندا گەولوگيا, گەوتەحنولوگيا جانە تاۋ-كەن دايىندىق جۇمىستارى, ۋران ءوندىرۋ جانە قايتا وڭدەۋ تەحنولوگياسى, اتوم سالاسى كاسىپورىندارىنىڭ قاۋىپسىز جۇمىس ىستەۋى جانە تەحنوگەندىك قالدىقتاردى باسقارۋ, تۇراقتى دامۋ (ESG) ماسەلەلەرى, اتوم سالاسى جۇمىس ىستەۋىنىڭ قۇقىقتىق, ماكروەكونوميكالىق جانە ءبىلىم بەرۋ اسپەكتىلەرى, اتوم سالاسىنداعى تسيفرلاندىرۋ, اۆتوماتتاندىرۋ جانە روبوتتاندىرۋ تالقىلانۋدا.
شارا اياسىندا قازاتومونەركاسىپ Paul Scherrer Institute (شۆەيتساريا) پەن قازاقستان-بريتان تەحنيكالىق ۋنيۆەرسيتەتى اراسىندا ىنتىماقتاستىق كەلىسىمە قول قويدى. بۇل قۇجات سالانىڭ عىلىمي-زەرتتەۋ جۇمىستارىن جۇرگىزۋگە, اتوم سالاسىنداعى عالىمداردى قولداۋ مەن جاڭا مامانداردى دايىنداۋعا ىقپال ەتۋگە باعىتتالعان.