قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋى الماتى وبلىسىندا دا قارقىندى باستالدى. داۋىس بەرۋشىلەردىڭ العاشقى لەگى تاڭعى ساعات جەتىدەن اسا سايلاۋ ۋچاسكەلەرىنە كەلە باستاعان. ايماقتا قازىر 606 سايلاۋ ۋچاسكەسى ۇزدىكسىز جۇمىس ىستەپ تۇر, دەپ حابارلايدى Egemen.kz.
ال وبلىس ورتالىعى قوناەۆ قالاسىندا 33 سايلاۋ ۋچاسكەسى بار. تاڭ بوزىنان ەسىگىن ايقارا اشقان ورىننىڭ ءبىرى – №949 سايلاۋ ۋچاسكەسى. بۇل ۋچاسكەدە 1737 سايلاۋشى تىركەلگەن ەكەن. ولاردىڭ العاشقى لەگى داۋىس بەرىپ, ءوز تاڭداۋىن جاساپ تا ۇلگەردى.
قازىنالى قاريا, وبلىستىق ارداگەرلەر كەڭەسىنىڭ مۇشەسى امانگەلدى كەرىمبەكوۆ اقساقال وسى سايلاۋ ۋچاسكەسىنە ءبىرىنشى كەلگەندەردىڭ قاتارىندا بولدى. العاشقى بولىپ ءوز داۋىسىن بەردى.
- حالقىما ءبىرىنشى تىنىشتىق بولسىن دەگىم كەلەدى. سوندا ءبىزدىڭ ۇرپاقتارىمىز قيىندىق كورمەي ومىردەن وتەدى. كەيىنگى جاستار قازاقستاندى الەمگە تانىتسىن. ءوز داۋىسىمدى ەلىمنىڭ تىنىشتىعى ءۇشىن بەردىم. 79 جاستامىن, قوناەۆ قالاسىندا ەكىنشى رەت سايلاۋعا قاتىسىپ وتىرمىن», دەدى امانگەلدى كەرىمبەكوۆ.
ال اقساقالعا №949 سايلاۋ ۋچاسكەسىنىڭ توراعاسى انار ابىشەۆا ءبىرىنشى بولىپ كەلگەنى ءۇشىن ارنايى سىي-سياپات تابىس ەتتى. سونداي-اق وسى №949 سايلاۋ ۋچاسكەسىنە كەلىپ, العاش رەت سايلاۋعا قاتىسۋ مارتەبەسىنە يە بولعان جاستار دا بولدى. قوناەۆ قالاسىنىڭ جاس تۇرعىنى اقنۇر اسحاتقىزى سونىڭ ءبىرى ەكەن.
- ەرتەمەن كەلىپ, تاڭداۋ جاسادىم. بۇل مەنىڭ ەڭ العاشقى داۋىس بەرۋىم. قوبالجىپ تۇرمىن. جاستار سايلاۋدا بارىنشا بەلسەندى بولسا ەكەن دەيمىن. بيىل 18 جاسقا تولىپ, العاش رەت سايلاۋعا قاتىستىم, دەيدى اقنۇر اسحاتقىزى.