ەلوردادا كوپقاباتتى ۇيلەردەگى ءبىر پاتەر ورتەنىپ, ءورت سوندىرۋشىلەر بەس ادامدى امان الىپ قالدى. الايدا ومىرلەرىن قاتەرگە تىگىپ, جالىننىڭ ورتاسىندا قالعان تۇرعىندارعا كومەك قولىن سوزعان قۇتقارۋشىلاردىڭ وزدەرىن كۇيىك شالعان. قازىر ءورت ءسوندىرۋشىنىڭ ءبىرى جانساقتاۋ بولىمىندە اۋىر حالدە جاتىر.
16 قاراشا كۇنى تاڭەرتەڭگى ساعات 10:43-تە سوققان قوڭىراۋعا ءورت سوندىرۋشىلەر بىردەن ب.مومىش ۇلى داڭعىلىنا اتتانادى. 14-ۇيدەگى پاتەرلەردىڭ بىرىندە شىققان ورتتەن 5 ادام قۇتقارىلادى.
استانا قالاسى قوعامدىق دەنساۋلىق ساقتاۋ باسقارماسىنىڭ مالىمەتىنشە, ورتتەن كەيىن ءتورت ناۋقاس جەدەل جاردەم كولىگىمەن №1 كوپسالالى قالالىق اۋرۋحاناعا جەتكىزىلگەن. زارداپ شەككەن ەكى ناۋقاستىڭ جاعدايى ەمحاناعا كەلگەن كەزدە ورتاشا اۋىر بولعان. قازىر توكسيكولوگيالىق بولىمشەدە ەم قابىلداپ جاتقان ولاردىڭ جاعدايى جاقسارعان. الايدا تۇرعىنداردىڭ ءومىرىن ساقتاپ قالعان قۇتقارۋشىلاردىڭ ءبىرى – ءورت ءسوندىرۋ قىزمەتىنىڭ كەزەكشى جەدەل كەزەكشىسى اسقار زابيكۋليننىڭ جاعدايى وتە اۋىر.
جاسى وتىزعا دا تولماعان جىگىت 3-دارەجەلى كۇيىك الىپ, قازىرگى ۋاقىتتا جانساقتاۋ بولىمىندە جاتىر. ءورت ءسوندىرۋشى دەنەسىنىڭ 80 پايىزىن كۇيىك شالعان. تارالعان اقپاراتتارعا سۇيەنسەك, قۇتقارۋشى ءورت شىققان پاتەرگە جوعارى قاباتتان كىرۋ ءۇشىن قورعانىش كيىمىن شەشىپ, وزىمەن بىرگە دەم الۋ اپپاراتىن عانا العان. پاتەردەن 80 جاستاعى قاريانى, 22 جاسار نەمەرەسىن جانە كورشى پاتەردە بالكونعا تىعىلىپ قالعان 10 جاسار بالانى قۇتقارعان. ال №10 ءورت ءسوندىرۋ ءبولىمىنىڭ كومانديرى ايان كەمپىروۆتىڭ (1988 جىلى تۋعان) جاعدايىن دارىگەرلەر ورتاشا اۋىر دەپ باعالاپ وتىر.
توتەنشە جاعدايلار دەپارتامەنتىنىڭ حابارلاماسىنا سۇيەنسەك, ءورت ءسوندىرۋ بولىمشەسىنە ب.مومىش ۇلى داڭعىلىنداعى كوپقاباتتى تۇرعىن ءۇي كەشەنىندە پاتەر ورتەنىپ جاتقانى تۋرالى حابار تۇسكەننەن كەيىن ءورت سوندىرۋشىلەر ءۇش مينۋتتا شاقىرتۋ ورنىنا جەتكەن. «ون بەس قاباتتى تۇرعىن ءۇيدىڭ 11-قاباتىندا 50 شارشى مەتر اۋماقتاعى پاتەر ورتەنىپ جاتقانى انىقتالدى. قىزمەتكەرلەر ءبىرىنشى كەزەكتە كومەك سۇراعان ادامداردى قۇتقارۋعا كىرىستى. ءوز ومىرلەرىن قاتەرگە تىككەن ءورت سوندىرۋشىلەر بەس ادامدى قۇتقاردى. ونىڭ بىرەۋى بالا, ون ادام ەۆاكۋاتسيالاندى», دەپ حابارلادى تجد ءباسپاسوز قىزمەتى. سونداي-اق توتەنشە جاعدايلار دەپارتامەنتى ءورت شىققان ءۇيدىڭ اۋلاسىندا كولىكتەر تۇرعاندىقتان, ءورت سوندىرۋشىلەرگە پاتەرگە جەتۋ وڭاي بولماعانىن دا ايتىپ وتىر.
ءورتتى سوندىرۋگە بارلىعى تجد-نىڭ 26 قىزمەتكەرى مەن 6 تەحنيكاسى جۇمىلدىرىلعان. بۇعان قوسا اپاتتار مەديتسيناسى ورتالىعىنىڭ ءۇش قىزمەتكەرى مەن ءبىر تەحنيكاسى وقيعا ورنىنا جەتەدى.
استانا قالاسى توتەنشە جاعدايلار دەپارتامەنتىنىڭ باستىعى قۋانار بازارباەۆ بەس ادامدى قۇتقارعان ءورت سوندىرۋشىلەردى ناگراداعا ۇسىناتىنىن حابارلادى. دەگەنمەن قازىرگى تاڭدا ادامداردى جانقيارلىقپەن قۇتقارىپ قالعان بۇگىنگى كۇننىڭ باتىرلارىنىڭ ءومىرىن امان ساقتاپ قالۋ باستى ماقسات بولىپ وتىر. اسقاردىڭ امان قالۋىن تىلەپ وتىرعان قالىڭ جۇرتتىڭ ىشىندە اتا-اناسى, كەلىنشەگى مەن قوس كىشكەنتاي بالاپانى دا بار.