بۇل تۋرالى مەملەكەت باسشىسى قاسىم-جومارت توقاەۆ الماتى جۇرتشىلىعىمەن كەزدەسۋىندە ايتتى, دەپ جازادى Egemen.kz.
«قالاداعى دەنساۋلىق ساقتاۋ سالاسى تۋرالى ايتساق, مۇنداعى نەگىزگى مىندەت – ينفراقۇرىلىمدى دامىتۋ جانە قىزمەت كورسەتۋ ساپاسىن ارتتىرۋ. الماتىدا ەمحانالار مەن اۋرۋحانالار ابدەن ەسكىرگەن. تۇرعىن ۇيلەر سالعان كەزدە الەۋمەتتىك نىساندار دۇرىس جوسپارلانبايدى. ال, بۇل الدىمەن تۇرعىنداردىڭ ومىرىنە تەرىس اسەر ەتەدى. ياعني, تۇرعىندارعا كورسەتىلەتىن قىزمەتتىڭ قولجەتىمدى بولۋىنا, جەدەل جاردەمنىڭ دەر كەزىندە كومەككە كەلۋىنە كەدەرگى كەلتىرەدى», دەدى پرەزيدەنت.
ق.توقاەۆتىڭ ايتۋىنشا, اكىمدىك جاڭا مەديتسينالىق نىساندار سالىپ, جاڭعىرتۋ ءۇشىن ارنايى جوسپار ازىرلەۋى كەرەك.
«بۇل شارالار انا مەن بالا ءولىمىن ازايتىپ, ازاماتتاردىڭ اۋىر دەرتتەن ساقتانۋىنا مۇمكىندىك بەرەدى. سونىمەن قاتار, العاشقى دارىگەرلىك-سانيتارلىق كومەك جۇيەسىن دامىتۋ قاجەت. كەلەسى جىلى حالىقارالىق دەڭگەيدەگى كوپبەيىندى اۋرۋحانا قۇرىلىسىن باستاۋ كەرەك. جوبانى مەملەكەت پەن بيزنەستىڭ سەرىكتەستىگى ارقىلى جۇزەگە اسىرعان ءجون», دەدى مەملەكەت باسشىسى.
سونداي-اق, قاسىم-جومارت كەمەل ۇلى قالانىڭ قارقىندى ءوسىپ كەلە جاتقان اۋداندارىندا پەرزەنتحاناسى بار اۋرۋحانالار سالۋ كەرەكتىگىن ايتتى. حالىقتىڭ دەنساۋلىعىن ساقتاۋ ءۇشىن ناۋقاستاردى ەمدەۋمەن قاتار, اۋرۋدىڭ الدىن الۋ وتە ماڭىزدى. وسى ورايدا, قالا تۇرعىندارىنىڭ سالاماتتى ءومىر سالتىن ۇستانۋىنا جاعداي جاساۋ قاجەتتىگىن اتاپ ءوتتى.
«قازىرگى تاڭدا الماتىلىقتاردىڭ ۇشتەن ءبىرى عانا دەنە شىنىقتىرۋمەن اينالىسادى. جالپى, دامىعان قالالاردا سالاماتتى ءومىر سالتىنىڭ ينفراقۇرىلىمى دەگەن ۇعىم بار. الماتىنىڭ بارلىق اۋداندارىندا وسىنداي ينفراقۇرىلىم سالىنۋى كەرەك. قازىر قالاداعى سپورت نىساندارى نەگىزىنەن ورتالىقتا ورنالاسقان. شەتتەگى اۋدانداردا مۇلدەم جەتىسپەيدى. سوندىقتان, اكىمدىككە جىل سايىن كەمىندە 3 دەنەشىنىقتىرۋ-ساۋىقتىرۋ كەشەنىن سالۋدى تاپسىرامىن», دەدى ەل پرەزيدەنتى.