يندۋستريا جانە ينفراقۇرىلىمدىق دامۋ ءمينيسترى قايىربەك وسكەنباەۆ فرانتسيانىڭ ەۋروپا جانە سىرتقى ىستەر ءمينيسترى جانىنداعى مينيستر-دەلەگات, قازاق-فرانتسۋز ۇكىمەتارالىق كوميسسياسىنىڭ توراعاسى وليۆە بەشتپەن كەزدەستى, دەپ حابارلايدى Egemen.kz يدم ءباسپاسوز قىزمەتىنە سىلتەمە جاساپ.
كەزدەسۋ بارىسىندا ونەركاسىپتىك گاز جانە ەنەرگەتيكا سالاسىنداعى, جاڭارتىلاتىن ەنەرگيا كوزدەرى, كولىك, اۆياتسيا ونەركاسىبى جانە عارىش سالالارىنداعى ەكىجاقتى ەكونوميكالىق ىنتىماقتاستىقتىڭ وزەكتى ماسەلەلەرى تالقىلانعان.
ءىس-شاراعا ەنەرگەتيكا مينيسترلىگى, ۇلتتىق ەكونوميكا مينيسترلىگى, دەنساۋلىق ساقتاۋ مينيسترلىگى, ءتسدياوم, تجم, «سامۇرىق-قازىنا» اق, «قتج» ۇك, «قازمۇنايگاز», «ەير استانا», «قازاۆياسپاس» جانە «كاەس» جشس وكىلدەرى قاتىسقان. فرانتسۋز تاراپىنان ونلاين فورماتتا قازاق-فرانتسۋز ىسكەرلىك كەڭەسىنىڭ توراعالارى جانە Total, Alstom, Orano, Air liquide, Airbus, CSFN, EDF جانە Idemia كومپانيالارىنىڭ باسشىلارى قاتىستى.
اڭگىمە بارىسىندا قر يدم باسشىسى فرانتسيا قازاقستاننىڭ ستراتەگيالىق سەرىكتەسى ەكەنىن اتاپ ءوتتى.
«بيىل ەكى ەل اراسىنداعى ديپلوماتيالىق قاتىناستاردىڭ ورناعانىنا 30 جىل تولدى. وسى ۋاقىت ىشىندە مەملەكەتتەردىڭ قارىم-قاتىناسى بارلىق نەگىزگى باعىت بويىنشا قارقىندى دامىپ كەلەدى. اتاپ ايتقاندا, 2022 جىلدىڭ 8 ايىندا تاۋار اينالىمى 12,2%-عا, ياعني $2,3 ملرد-قا دەيىن ءوستى», دەدى ق.وسكەنباەۆ.
ءوز كەزەگىندە و.بەشت قازاقستان فرانتسيانىڭ ماڭىزدى سەرىكتەسى ەكەنىن راستادى.
«قازاق-فرانتسۋز ۇكىمەتارالىق كوميسسياسىنىڭ تەڭ توراعالارى دەڭگەيىندەگى تۇراقتى بايلانىستار ەكى ەل اراسىنداعى ىنتىماقتاستىقتىڭ ماڭىزدى وزەكتى باعىتتارىن تالقىلاۋعا جانە وزەكتى ماسەلەلەر بويىنشا شەشىمدەر تابۋعا مۇمكىندىك بەرەدى», دەدى و.بەشت.
كەزدەسۋ قورىتىندىسى رەتىندە قازاقستان مەن فرانتسيا اراسىنداعى قارىم-قاتىناستى ودان ءارى دامىتۋدىڭ ماڭىزدىلىعى ايتىلدى.