«سامۇرىق-قازىنا» قايىرىمدىلىققا جۇمسالاتىن شىعىستاردى ۇلعايتادى

ميرات وتەپوۆتىڭ ايتۋىنشا, 2022 جىلدىڭ ءبىرىنشى جارتىجىلدىعىنىڭ قورىتىندىسى بويىنشا قوردىڭ تازا پايداسى 956 ملرد تەڭگەنى قۇرادى. بۇل وتكەن جىلدىڭ كورسەتكىشىمەن سالىستىرعاندا 18%-عا ارتىق. سپيكەردىڭ بولجامى بويىنشا, جىل سوڭىنا دەيىن بۇل كورسەتكىش 1,85 ترلن تەڭگەگە جەتەدى.

دەپارتامەنت ديرەكتورى مۇنى الەمدىك نارىقتاعى مۇناي قۇنىنىڭ وسۋىمەن بايلانىستىرىپ وتىر. تاعى ءبىر ماڭىزدى فاكتور - قوردىڭ وندىرىستىك ەمەس شىعىنداردى وڭتايلاندىرۋ بويىنشا اتقارعان جۇمىسى. «سامۇرىق-قازىنا» ونى كومپانيالار توبىنىڭ قىزمەتكەرلەرىنە زيان كەلتىرمەي وتكىزەدى. 2022 جىلى ولاردىڭ جالاقىسى تومەن جالاقى الاتىن لاۋازىمدار مەن وندىرىستىك پەرسونالعا ەرەكشە نازار اۋدارا وتىرىپ 5-تەن 48%-عا دەيىن كوتەرىلدى. جالپى بۇل ماقساتتارعا شامامەن 340 ملرد تەڭگە بولىنگەن.

پايدانىڭ ءوسۋى اياسىندا قور قازاقستانداعى قايىرىمدىلىق جوبالارىنا شىعىنداردى ەداۋىر ارتتىرۋعا دايىن ەكەنى ايتىلدى. قازىر «سامۇرىق-قازىنا» توبىنىڭ بارلىق كومپانيالارىنىڭ اتىنان قايىرىمدىلىق قىزمەتىن Samruk-Kazyna Trust قورى جۇزەگە اسىرادى. ونىڭ 2022 جىلعا ارنالعان بيۋدجەتى شامامەن 10 ملرد تەڭگەنى قۇرايدى, بۇل وتكەن جىلمەن سالىستىرعاندا 33%-عا ارتىق. مەملەكەت باسشىسى قاسىم-جومارت توقاەۆتىڭ تاپسىرماسىنا سايكەس 2023 جىلدان باستاپ «سامۇرىق-قازىنا» قورى تازا پايدانىڭ 7%-ىن قايىرىمدىلىق ماقساتتارعا جۇمساۋعا ءازىر. 2022 جىلدىڭ قورىتىندىسى بويىنشا بۇل سوما شامامەن 130 ملرد تەڭگەنى قۇرايتىن بولادى. وسىلايشا قوردىڭ قايىرىمدىلىق شىعىندارى 13 ەسە ارتا تۇسپەك.

سونداي-اق بريفينگ بارىسىندا «سامۇرىق-قازىنانىڭ» مەملەكەتكە تولەمدەرى تالقىلاندى. 2022 جىلى قور جالعىز اكتسيونەر رەتىندە ۇكىمەتكە شامامەن 170 ملرد تەڭگە ديۆيدەند تولەدى. ميرات وتەپوۆتىڭ ايتۋىنشا, قازاقستانداعى ءتۇرلى الەۋمەتتىك جوبالاردى قارجىلاندىرۋ ماقساتىندا تاعى 141 ملرد تەڭگە, قايىرىمدىلىققا 10 ملرد تەڭگە جۇمسالادى. بۇدان باسقا «سامۇرىق-قازىنا» جىل سايىن قر بيۋدجەتىنە 1 ترلن تەڭگەدەن استام سالىق تولەيدى, قازاقستان بويىنشا قور توبىنىڭ 250 مىڭ قىزمەتكەرىنىڭ جالاقىسىن كوتەرەدى, سونداي-اق بۇكىل ەل بويىنشا پورتفەلدىك كومپانيالارعا ينۆەستيتسيا سالادى.

«سامۇرىق-قازىنا» جۇمسايتىن بارلىق اقشا قازاقستاندا قالادى, ءبىزدىڭ ەكونوميكامىزدى دامىتۋعا جانە ازاماتتاردى قولداۋعا جۇمسالادى», دەپ تۇيىندەدى م.وتەپوۆ.