قازىر الەم ساراپشىلارى الەكساندر لۋكاشەنكو مەن ۆلاديمير پۋتين اراسىنداعى «كەلىسىمدى» قىزۋ تالقىلاپ جاتىر. «بەلارۋس شىنىمەن رەسەيگە كومەككە كەلىپ, ۋكرايناداعى قاقتىعىسقا اسكەر جىبەرە مە؟» دەگەن كوپتىڭ كوكەيىندە جۇرگەن ساۋالعا ساراپشىلار پىكىر ءبىلدىردى. ولاردىڭ باسىم بولىگى پۋتين مۇنى تالاپ ەتسە دە, بەلارۋس اسكەرلەرىنىڭ ۋكرايناعا قارسى سوعىسۋ مۇمكىندىگى جوق دەگەن پىكىردە.
بەلارۋس باسشىسى الەكساندر لۋكاشەنكو ۋكراينادا قاقتىعىس باستالعالى ەكى ەلگە دە تەڭ پوزيتسيانى ۇستانىپ كەلەدى. 24 اقپاندا بەلارۋس ەلىندە شوعىرلانعان رەسەي اسكەرلەرى ۋكراينا شەكاراسىنا ءوتىپ, ەلدى ەۋروپاعا باسىپ كىرۋ ءۇشىن ترامپلين رەتىندە پايدالانعان ەدى. بىراق بەلارۋس باسشىسى بۇل قاقتىعىسقا تىكەلەي ارالاسپادى, اسكەرىن شايقاسقا جىبەرمەدى.
الايدا لۋكاشەنكونىڭ ۆلاديمير پۋتينمەن جۋىرداعى كەزدەسۋى «كۇدىك» تۋدىرىپ, بىرقاتار ەلدى الاڭداتىپ وتىر. لۋكاشەنكو الداعى كۇندەرى مىڭداعان رەسەيلىك اسكەردىڭ بەلارۋسقا جاتتىعۋ ءۇشىن كەلەتىنىن مالىمدەدى. ء«بىز وڭىرلىك اسكەرلەر توبىنىڭ مىندەتتەرى تەك قورعانىس سيپاتىندا ەكەنىن تاعى دا اتاپ وتەمىز. قازىرگى ۋاقىتتا جۇرگىزىلىپ جاتقان شارالاردىڭ بارلىعى قاۋىپسىزدىككە باعىتتالعان», دەدى سەيسەنبىدە بەلارۋس قورعانىس ءمينيسترى ۆيكتور حرەنين.
ال ءدال وسى كۇنى ۋكراينا پرەزيدەنتى ۆولوديمير زەلەنسكي G7 وتىرىسىندا دابىل قاعىپ, لۋكاشەنكونىڭ «ارانداتۋىنا» جول بەرمەۋ ءۇشىن ۋكراينا مەن بەلارۋس شەكاراسىنا بۇۇ بىتىمگەرشىلىك كۇشتەرىن جىبەرۋدى سۇرادى. ساراپشىلار «الاڭداۋعا نەگىز بار, دەسە دە بەلارۋس مۇنداي قادامعا بارا المايدى» دەگەن پىكىردە. «ارينە, ءپۋتيننىڭ ىقپالى زور. بىراق ول لۋكاشەنكونى ساياسي سۋيتسيدكە ماجبۇرلەي المايدى. سونىمەن قاتار لۋكاشەنكو قاقتىعىسقا قاتىسۋعا يتەرمەلەيتىن كەز كەلگەن كەلىسىمدەردەن ءوزىن اۋلاق ۇستاۋعا تىرىسادى», دەدى بەلارۋس ساياساتتانۋشىسى, كارنەگي قورىنىڭ عىلىمي قىزمەتكەرى ارتيوم شرايبمان The Guardian باسىلىمىنا بەرگەن سۇحباتىندا. لۋكاشەنكو ءوز اسكەرىن قاقتىعىسقا جىبەرمەي, رەسەي اسكەرلەرىنە بەلارۋس شەكاراسىنا قاراي جىلجۋعا عانا رۇقسات بەرە الادى دەپ سانايدى ماماندار. «نەمەسە ول موبيليزاتسياعا ۇشىراعان ونداعان مىڭ رەسەيلىكتەر ءۇشىن ءوز جەرىن پوليگون رەتىندە پايدالانۋعا كەلىسىم بەرۋى مۇمكىن», دەيدى. بەلارۋستىڭ HajunProject مونيتورينگ توبى ەكى ەلدىڭ بىرلەسكەن وقۋ-جاتتىعۋلارى ۋكراينامەن شەكارادان نەبارى 17 شاقىرىم جەردە ورنالاسقان ەلسك قالاسىنداعى بىرنەشە مۋنيتسيپالدى عيماراتتىڭ جانىندا وتەدى دەگەن اقپارات تاراتتى. سونىمەن قاتار اتالعان مونيتورينگ توبى قازىر ۋاقىتتا ەلسكىدەگى جەرگىلىكتى پوليتسيا بولىمشەسى مەن اكىمشىلىك عيماراتىنىڭ جانىنداعى مۋزىكا مەكتەبىندە ساباق توقتاتىلعانىن حابارلادى. «جەرگىلىكتى تۇرعىندارعا سارسەنبىدە كەلگەن جاڭا بروندالعان كولوننانى تاسپاعا تۇسىرمەۋگە بۇيرىق بەرىلدى», دەدى ۇيىم وكىلدەرى.
تاۋەلسىز اسكەري ساراپشى, RochanConsulting ديرەكتورى كونراد مۋزيكا «بەلارۋستە اسكەري ءتارتىپتى قاداعالايتىن ۇيىم از, ويتكەنى ولاردىڭ اسكەرى سالىستىرمالى تۇردە ءالسىز. ارميا تولىق كۇشكە جەتۋ ءۇشىن 20 مىڭ ادامدى جۇمىلدىرۋ كەرەك. قازىر بەلارۋس جوعارى قارقىندى جاتتىعۋلاردى وتكىزۋدە. مينسك سوعىسقا دايىندالىپ جاتقانداي بارلىق مۇمكىندىكتەرىن سىناپ جاتىر. مۇنىڭ ءۇش تۇسىندىرمەسى بار: ءبىرىنشىسى – ناتو شابۋىلىنا دايىندىق; ەكىنشىسى – باسقا ايماقتارعا ورنالاستىرىلۋىنا جول بەرمەۋ ءۇشىن شەكاراعا جاقىن جەردە ۋكرايندىق كۇشتەردى ۇستاۋ; ءۇشىنشىسى – ۋكرايناعا شابۋىل جاساۋعا دايىندىق», دەيدى اسكەري ساراپشى. سونىمەن قاتار ونىڭ ايتۋىنشا, بەينەجازبالاردا كورسەتىلگەندەي رەسەي ۋكرايناعا شابۋىل جاساۋعا دايىنداپ جاتقان اۋىر قارۋ-جاراقتارىن بەلارۋسكە تاسىمالداۋدىڭ ورنىنا, كەرىسىنشە بەلارۋس رەسەيگە ءوز قويمالارىنان تانك, وق-ءدارى جانە جۇك كولىكتەرىن جىبەرىپ جاتىر. بەلارۋستىڭ «حادجۋن» جوباسى سەگىز ت-72ا تانكىنىڭ مينسكىدەن رەسەيگە تاسىمالدانۋى تۋرالى بەينەجازبانى جاريالادى جانە كۋاگەرلەردىڭ 15-30 تانك پەن كەم دەگەندە 28 «ۋرال» جۇك كولىگىن كورگەنىن ايتادى.
بەلارۋس وپپوزيتسياسىنىڭ جەتەكشىسى سۆەتلانا تيحانوۆسكايانىڭ باس كەڭەسشىسى فرانك ۆياچوركا بەلارۋس اسكەرلەرىنىڭ ۋكرايناداعى سوعىسقا بەلسەندى قاتىساتىنىنا سەنبەيتىنىن ايتادى The Guardian باسىلىمىنا بەرگەن سۇحباتىندا. «مەن بۇعان كۇماندانامىن, بىزدە بۇل تۋرالى ەشقانداي نۇسقاۋ جوق. كەرىسىنشە, اسكەري باسشىلار ۋكرايندىقتاردىڭ جەتىستىگىنە قاتتى الاڭدايتىندىقتان, ولار سوعىسقا تارتىلمايمىز دەپ, اسكەرلەردى تىنىشتاندىرۋعا تىرىسۋدا. ەشكىم پۋتين ءۇشىن سوعىسقىسى كەلمەيدى», دەيدى ول. ۆياچوركا بەلارۋس ارمياسىنىڭ ۋكراينادا سوعىسۋعا قاۋقارسىز ەكەنىن ايتتى. «بىزدە اسكەر دە, اسكەري تەحنيكا دا جوق. قازىردىڭ وزىندە رەسەي فەدەراتسياسىنا كوپتەگەن تەحنيكا جىبەرىلدى. قولدانۋعا بولاتىننىڭ ءبارى بۇرىننان قولدانىستا ءجۇر. جاۋىنگەرلىك ازىرلىكتەگى اسكەرلەر از, 7 مىڭعا دەيىن, ولار شابۋىلعا دايىن ەمەس», دەدى ۆياچوركا. «2020 جىلى ورىن العان نارازىلىق قوزعالىسىنان كەيىن سوعىس ءۇشىن لۋكاشەنكو ءوزىنىڭ ابىرويىن توككىسى كەلمەيدى», دەيدى بىرقاتار ساراپشى.
ايتا كەتەيىك, قازاقستانداعى وقۋ-جاتتىعۋعا كەلگەن رەسەي جانە بەلارۋس رەسپۋبليكالارىنىڭ اسكەري ەشەلوندارى وتكەن اپتادا (8-15 قازان ارالىعىندا) ءوز ەلدەرىنە قايتتى. قازاقستاننىڭ قورعانىس ۆەدومستۆوسى 26 قىركۇيەك – 8 قازان ارالىعىندا جامبىل جانە الماتى وبلىستارىندا ۇجىمدىق قاۋىپسىزدىك تۋرالى شارت ۇيىمىنىڭ جەدەل ارەكەت ەتۋ ۇجىمدىق كۇشتەرىنىڭ قاتىسۋىمەن ء«وزارا ءىس-قيمىل-2022», «ىزدەۋ-2022», «ەشەلون-2022» وقۋ-جاتتىعۋلارىن وتكىزگەن بولاتىن.