قازاقستان استاناسى ەكى كۇننەن بەرى مارتەبەلى مەيمانداردى قابىلداۋدا. ازياداعى ءوزارا ءىس-قيمىل جانە سەنىم شارالارى كەڭەسىنىڭ سامميتىنە 11 مەملەكەت باسشىسى قاتىستى.
سامميتكە ازەربايجان, يراك, يران, قىرعىزستان, پالەستينا, تاجىكستان, رەسەي, تۇركيا, وزبەكستان پرەزيدەنتتەرى, قاتار ءامىرى, سونداي-اق ۆەتنامنىڭ ۆيتسە-پرەزيدەنتى, قىتايدىڭ ۆيتسە-پرەزيدەنتى, سونداي-اق بەس مينيستر جانە اوسشك-ءنىڭ مەملەكەتتىك باقىلاۋشىسى بولىپ تابىلاتىن بەلارۋس پرەزيدەنتى دە كەلدى.
اوسشك باستاماسىن قازاقستان 1992 جىلى بۇۇ باس اسسامبلەياسىنىڭ 47-سەسسياسىندا كوتەرگەن بولاتىن. كەڭەستىڭ نەگىزگى ماقساتى مەن باعىتى – ازياداعى بەيبىتشىلىك پەن قاۋىپسىزدىكتى قامتاماسىز ەتۋدىڭ كوپجاقتى تاسىلدەرىن ازىرلەۋ ارقىلى ىنتىماقتاستىقتى نىعايتۋ. قۇرىلعان كۇننەن باستاپ اوسشك قۇرامى ازيا كونتينەنتىنىڭ 90 پايىزىن قامتيتىن 27 مۇشە مەملەكەتكە دەيىن ءوستى. بۇعان دەيىن اوسشك-ءتى تولىققاندى حالىقارالىق ۇيىمعا اينالدىرۋ جوسپارلارى تۋرالى حابارلانعان بولاتىن.