ورتالىق كوممۋنيكاتسيالار الاڭىندا وتكەن بريفينگتە ۇلتتىق ەكونوميكا مينيسترلىگى جولداۋدا ايتىلعان الەۋمەتتىك-ەكونوميكالىق ماسەلەلەردىڭ قالاي جۇزەگە اسىرىلاتىنى جونىندە مالىمدەدى. بۇل ماقساتتا قۇزىرلى ورگان جاڭا ەكونوميكالىق ساياسات, ناقتى سەكتوردى دامىتۋ, مەملەكەتتىك باسقارۋدى جاڭعىرتۋ سەكىلدى ءۇش باعىت بويىنشا جوسپار قۇرىپ, ىسكە كىرىسكەنىن حابارلادى.
قازىرگى تاڭدا ۇلتتىق ەكونوميكا مينيسترلىگى «ۇلتتىق قور – بالالارعا» جوباسىن ۇلتتىق قورمەن بىرلەسىپ ىسكە اسىرۋ تەتىكتەرىن پىسىقتاپ جاتىر. الدىمەن 18 جاسقا دەيىنگى بارلىق بالالارعا دەربەس جيناقتاۋشى شوت اشىلادى. 2024 جىلدان باستاپ جىل سايىن قوردىڭ ينۆەستيتسيالىق كىرىسىنىڭ جارتىسىنان تۇسكەن قاراجات ءار بالانىڭ شوتىنا اۋدارىلىپ وتىرادى. تولەم مەحانيزمى بۇگىندە قوسىمشا ەسەپتەلىپ جاتقانىن ايتقان ۇلتتىق ەكونوميكا ءمينيسترى الىبەك قۋانتىروۆ قوردىڭ ينۆەستيتسيالىق شەشىمى كوممەرتسيالىق ماقساتتىلىق, ۇزاق مەرزىمدى مۇددەلەر جانە نەگىزگى كريتەري تيىمدىلىك قاعيداتتارىنا نەگىزدەلەتىنىن العا تارتتى.
«مەملەكەت باسشىسىنىڭ تاپسىرماسىن ەسكەرە وتىرىپ, قوردىڭ ينۆەستيتسيالىق جوبالارى مەن اكتيۆتەرىنىڭ پورتفەلىن قايتا قاراۋ, ونىڭ ىشىندە ولارعا سىني باعالاۋ جۇرگىزۋ قاجەت. باسىمدىقتاردى بەلگىلەۋ جانە اكتيۆتەر مەن جوبالاردىڭ وڭتايلى پورتفەلىن قالىپتاستىرۋ, ونىڭ ىشىندە ينۆەستيتسيالاردى جەكەشەلەندىرۋ, رەسۋرستاردى بوساتۋ جانە قايتا ءبولۋ تەتىگى ارقىلى قالىپتاستىرۋ بولجانۋدا. ەل, ءوڭىر, سالا ءۇشىن ستراتەگيالىق ماڭىزى بار, ونىڭ ىشىندە ينفراقۇرىلىمدى جاڭعىرتۋعا, جاڭا سالالار مەن جوعارى تەحنولوگيالىق وندىرىستەردى قۇرۋعا باعىتتالعان ينۆەستيتسيالىق جوبالارعا باسىمدىق بەرىلەدى», دەدى مينيستر.
سونداي-اق 2030 جىلعا دەيىنگى سالىق ساياساتىنىڭ نەگىزگى تۇجىرىمداماسىن ازىرلەۋ بويىنشا جۇمىس جۇرگىزىلىپ جاتىر. بۇل تۋرالى الىبەك قۋانتىروۆ: «پرەزيدەنت قويعان جاڭا مىندەتتەر بيۋدجەتتىك جوسپارلاۋدى بيۋروكراتيادان ارىلتۋعا جانە بيۋدجەتارالىق قاتىناستاردى جەتىلدىرۋگە بايلانىستى جۇمىستىڭ قيسىندى جالعاسى بولادى. سوندىقتان مەملەكەتتىك قارجىنى باسقارۋ تۇجىرىمداماسىنىڭ ەرەجەلەرىن جانە باسقا دا وزەكتى ماسەلەلەردى قامتيتىن جاڭا بيۋدجەت كودەكسىن ازىرلەۋ ءتيىمدى جانە ۇنەمدى بيۋدجەت ساياساتىن قامتاماسىز ەتۋگە جاڭا سەرپىن بەرەدى. جاڭا سالىق جانە بيۋدجەت كودەكستەرىن ازىرلەۋ, قوعاممەن بىرلەسىپ جانە ساراپشىلاردىڭ بيزنەس قوعامداستىق وكىلدەرىنىڭ قاتىسۋىمەن جۇرگىزىلەتىن بولادى», دەدى.
ينفوگرافيكانى جاساعان امانگەلدى قياس, «ەQ»
«وڭىرلەردەگى ماڭىزدى ماسەلەلەردى جەدەل شەشۋ ءۇشىن وكىلەتتى مەكەمەلەر كەڭەيتىلەدى», دەپ مالىمدەدى مينيستر. «بۇل شارالار مەملەكەتتىك باسقارۋدىڭ سەرۆيستىك جانە «ادامعا باعدارلانعان» مودەلىن قۇرۋعا مۇمكىندىك بەرەدى. پرەزيدەنت جولداۋدا الەۋمەتتىك-ەكونوميكالىق ساياساتىمىزدىڭ نەگىزگى ماقساتى ازاماتتاردىڭ ءال-اۋقاتىن ساپالى جانە ينكليۋزيۆتى ارتتىرۋ ەكەنىن اتاپ ءوتتى. جەكە كاسىپكەرلىك باستامانى ىنتالاندىرۋ, باسەكەلەستىكتى دامىتۋ, ۇلتتىق تابىستى ءادىل ءبولۋ باسىمدىقتار رەتىندە بەلگىلەندى. ءبىلىم بەرۋ جانە دەنساۋلىق ساقتاۋ جۇيەلەرى ارقىلى ازاماتتارعا ينۆەستيتسيا سالاتىن جانە نەعۇرلىم وسال الەۋمەتتىك توپتارعا قولداۋ كورسەتە وتىرىپ, بارلىعى ءۇشىن تەڭ مۇمكىندىكتەردى قامتاماسىز ەتەتىن ەكونوميكالىق دامۋدىڭ اشىق جانە بولجامدى مودەلى قۇرىلادى», دەدى ءا.قۋانتىروۆ.
ال ءسان-سالتانات سالىعىنان تۇسەتىن قارجى شامامەن 8 ملرد تەڭگەنى قۇراماق. بۇل سالىق نەگىزىنەن كولىكتىڭ قىمبات تۇرىنە سالىنادى. سونداي-اق ياحتا, شەتەلدە ۆيللاسى, جەكە ۇشاعى بار باي-ماناپتار دا سايكەسىنشە جىل سايىن سالىق تولەپ, قازىنا قورىن تولىقتىرماق.