قازاقستان حالقى اسسامبلەياسىنىڭ مۇشەلەرى مەملەكەت باسشىسىنىڭ جولداۋىن تالقىلادى. دوستىق ۇيىندە قحا كەڭەسىنىڭ كەڭەيتىلگەن وتىرىسىنا جينالعاندار ماڭىزدى قۇجاتتا ايتىلعان وزەكتى ماسەلەلەر مەن ولاردى شەشۋ جولدارىن جۇزەگە اسىرۋدىڭ تەتىكتەرىن ۇسىندى.
جالپى, قازاقستان حالقى اسسامبلەياسىنىڭ جاڭا قازاقستاننىڭ قالىپتاسۋىندا وزىندىك ميسسياسى بار. بۇل تۋرالى قحا توراعاسىنىڭ ورىنباسارى تاۋفيك كارىموۆ ايتىپ ءوتتى. ونىڭ پىكىرىنشە, جولداۋ حالىقتىڭ بىرلىگى, ىنتىماعى مەن بىرتۇتاستىعى – جاراسقان ەكونوميكالىق ولشەمنىڭ ايقىن كورىنىسى. «ەلدەگى الەۋمەتتىك ءال-اۋقاتتىڭ, بەيبىتشىلىك پەن كەلىسىمنىڭ ماتەريالدىق نەگىزىن جاسايتىن ەكونوميكالىق رەفورمالاردىڭ تابىستى بولۋى تۇراقتىلىق پەن بىرلىككە بايلانىستى. ۇسىنىلعان ەكونوميكالىق رەفورمالار پاكەتى ەكونوميكالىق دامۋدىڭ سيپاتىن تۇبەگەيلى وزگەرتىپ, ونى تۇرعىنداردىڭ الەۋەتىن اشۋعا باعىتتالعان», دەدى ول.
كەڭەستە دەپۋتات, ساراپشى, عالىمدار مەملەكەتتىك ءتىل تاعدىرىن, پرەزيدەنتتىڭ كەزەكتەن تىس سايلاۋىن, ەلدىڭ ەكونوميكالىق جاعدايىن كەڭىنەن ءسوز ەتتى.
وتىرىستا ءسوز العان قاراعاندى وبلىسى بويىنشا قوعامدىق كەڭەستىڭ توراعاسى بەكزات التىنبەكوۆ جولداۋدا ايتىلعان ۇسىنىستار جاڭا ەكونوميكالىق ساياساتقا بەتبۇرىس جاسايتىنىن مالىمدەدى. «اششى دا بولسا اقيقاتىن ايتايىق, ءبىزدىڭ ەكونوميكانىڭ جەتەكشى باعىتتارى ءالى دە شيكىزاتقا تاۋەلدىلىكتەن ارىلا الماي وتىر. ەلىمىزدە ەلەكتر قۋاتىن تاراتۋشى كومپانيالار مەن باسقا دا كوممۋنالدىق قىزمەتپەن اينالىساتىن كاسىپورىندار مەنشىگىندەگى جەلىلەردىڭ 57%-دان استامى جارامسىزدىق شەگىندە تۇرعانىنا الاڭداۋشىلىق بىلدىرگەن پرەزيدەنت وسى كومپانيالاردىڭ ينۆەستيتسيالاۋ بەلسەندىلىگىن ەسكەرۋ ارقىلى تاريف ساياساتىن كۇشپەن ۇستاپ تۇرۋدى شەكتەۋ قاجەتتىگىن ايتتى. ياعني مەملەكەت باسشىسى ۇسىنىپ وتىرعان ء«تاريفتى ينۆەستيتسياعا ايىرباستاۋ» جوباسىنىڭ تيىمدىلىگى زەردەلەنۋى كەرەك. ەگەر تاريف ساياساتىنداعى بۇگىنگى رەجىم وزگەرمەسە, ءبىز ايتىپ وتىرعان جەلىلەر مەن قۇبىرلاردىڭ بىرتىندەپ ىستەن شىعۋى نەمەسە اپاتتى جاعدايلارعا الىپ كەلۋى ابدەن مۇمكىن. سوندىقتان جاڭا تاريف ساياساتىن قاراپايىم حالىققا ءتۇسىندىرۋ جۇمىسىندا بارشامىز بەلسەندىلىك تانىتۋعا ءتيىسپىز. ەكونوميكانىڭ تۇراقتى دامۋى قولدانىستاعى سالىق ساياساتىنا تىكەلەي تاۋەلدى. سالىق سالاسىنىڭ باقىلاۋ قىزمەتىن تسيفرلاندىرۋ, پايدانىڭ جاڭعىرۋعا جانە عىلىمي نەگىزدەمەلەرگە جۇمسالعان بولىگىنە سالىناتىن كورپوراتيۆتى تابىس سالىعىن جەڭىلدەتۋ نەمەسە ودان بوساتۋ ءتاسىلىن ەنگىزۋ, ء«سان-سالتاناتقا سالىق سالۋ» ءتارتىبىن ەنگىزۋ سەكىلدى سالىق رەفورمالارىن قامتىعان جاڭا سالىق كودەكسى ازىرلەنىپ جاتىر. سونداي-اق جولداۋدا مەملەكەتتىك مەكەمەلەردىڭ يگەرە الماعان قاراجاتىن كەلەسى جىلعا قالدىرۋ ءتارتىبىن ەنگىزۋ قاجەتتىگى دە ايتىلدى. بۇل دا – جاڭا ەكونوميكالىق ساياساتتىڭ وتە ءتيىمدى باعىتتارىنىڭ ءبىرى. بولاشاقتا سۋ تاپشىلىعى ەل ەكونوميكاسىنا دا, حالىق تۇرمىسىنا دا زور كەدەرگى, مول قيىندىقتار اكەلۋى مۇمكىن», دەدى ول.
ب.التىنبەكوۆ وسىنداي ءىرى جوبالاردىڭ جۇمىسىنا اسسامبلەيا بەلسەندىلەرىن قوعامدىق باقىلاۋشى رەتىندە قاتىستىرۋ قاجەتتىگىن العا تارتتى. «بۇل تۇرعىدا ءماسليحات دەپۋتاتتارى, جەرگىلىكتى ءوزىن ءوزى باسقارۋ قۇرىلىمدارى, قوعامدىق كەڭەس مۇشەلەرى بىزبەن ارىپتەستىك ورناتىپ, ەلدىڭ جارقىن بولاشاعى ءۇشىن جۇمىلا جۇمىس جۇرگىزەمىز دەپ سەنەمىن», دەدى ساراپشى.
ال قحا رەسپۋبليكالىق انالار كەڭەسىنىڭ مۇشەسى بايان احاتاي جولداۋدا ايتىلعان بىرنەشە ماسەلەنى قوزعادى. «ۇلتتىڭ ۇيىسۋى – دامۋدىڭ باستى باعدارى. الەۋمەتتىك جەلىدە نارازىلىققا ۇلاسقان ءتىل ماسەلەسى تولعاندىرماي تۇرمايدى. مەملەكەت باسشىسى قازاق ءتىلىن دە, ورىس ءتىلىن دە جەتىك مەڭگەرۋى بالالارعا تەك پايداسى تيەتىندىگىن ايتتى. بۇل ورايدا ورىس تىلىنە قارسىلىق تانىتا بەرگەننەن گورى, قازاق ءتىلىن ۇيرەتۋدىڭ ساپالى ءادىس-تاسىلدەرىن ويلاستىرۋ ءتيىمدى. ەتنوسارالىق قاتىناستاردىڭ ۇيلەسىمدى دامۋىنىڭ باستاۋى دا داستارقان باسىنان باستالادى. ءار الۋاندىلىعىمىزدى ارازدىققا ەمەس, اۋىزبىرلىككە جۇمىلدىرۋىمىز ءۇشىن ءار قازاقستاندىق قىزمەت ەتۋى كەرەك. سونىمەن قاتار قازاق ءتىلى, شىن مانىندە, ءبىلىم مەن عىلىمنىڭ, مادەنيەت پەن ءىس جۇرگىزۋدىڭ تىلىنە اينالدىرۋ ءار قازاقستاندىقتىڭ ازاماتتىق پارىزى دەر ەدىم. مەملەكەت باسشىسىنىڭ «مەملەكەتتىك ءتىلدى قولدانۋ اياسى كەڭەيىپ كەلەدى, بولاشاعىن وتانىمىزبەن بايلانىستىراتىن ءاربىر ازامات قازاق ءتىلىن ۇيرەنۋگە دەن قويۋعا ءتيىس» دەگەن ءسوزىن وتباسىنان باستاپ ناسيحاتتاپ وتىرساق, ءبىزدىڭ تۋعان تىلىمىزگە ناعىز قىزمەتىمىز سول بولماق. انا ءتىلىن ارداقتاي ءجۇرىپ, الەم تىلدەرىن مەڭگەرسە بالالارىمىز ۇتپاسا, ۇتىلمايدى. ءتىلدىڭ سالماعىن ءار ازامات ساليقالى سوزىمەن جانە ناقتى ىسىمەن كوتەرسە, ءتىلىمىز سوندا شىن دارىپتەلمەك. بالالاردىڭ بويىنا وسىنداي قۇندىلىقتاردى ەگە وتىرىپ تاربيەلەي الساق, ءوزىمىز ارمانداعان الدىڭعى قاتارلى, قازاق ءتىلدى قوعام ورناۋىنىڭ اۋىلى الىس ەمەس», دەدى بايان احاتاي. سونداي-اق ول ءبىلىم, عىلىم, بالا تاربيەسىنە دە كەڭىنەن توقتالدى. «ساپالى بىلىمگە مەكتەپ سانىنىڭ ساي كەلمەي جاتقانى راس. بۇل بويىنشا اتقارىلاتىن ءىس-شارالار كەزەڭ-كەزەڭىمەن وڭ ناتيجەسىن بەرەدى. «جايلى مەكتەپ» جوباسى جۇزەگە اسسا سالانىڭ ءبىراز ماسەلەلەرى شەشىلەدى. وسى ورايدا مەملەكەت باسشىسى مەكتەپكە دەيىنگى وقىتۋ مەن تاربيە سالاسىنداعى ولقىلىقتارعا اشىق توقتالىپ, تاربيەشىلەردىڭ الەۋمەتتىك جاعدايىن كوتەرۋ, ءبىلىمى مەن ساپالىق قۇرامىن جەتىلدىرۋگە باسا نازار سالعاندىعى قۋانتادى. بالاباقشا بالالارىنىڭ باپكەرى بىلىكتىلىگى مەن جاعدايى بوبەكتەردىڭ دۇرىس ادام بولىپ قالىپتاسۋىنىڭ نەگىزىن قالايدى. وسى تۇستا كەشەندى جۇمىستار اتقارىلادى دەپ بىلەمىن», دەپ پىكىرىن تۇيىندەدى.
ءىس-شارا بارىسىندا قحا كەڭەسىنىڭ مۇشەلەرى ۇلتارالىق قاتىناستاردىڭ ۇيلەسىمدى دامۋىنا كەرى اسەرىن تيگىزەتىن كەز كەلگەن قوعامدىق ارانداتۋشىلىق پەن زاڭسىز ارەكەتتەرگە قاتاڭ جاۋاپ بەرۋ قاجەتتىگىن ايتتى. سونداي-اق جيىنعا قاتىسۋشىلار اقپاراتتىق كەڭىستىكتە ءوزارا سەنىمسىزدىك, قوعامدا الاۋىزدىق تۋدىرۋدى توقتاتۋعا شاقىردى.