يتاليا پرەمەر-ءمينيسترى ماريو دراگي ەلدەگى ساياسي الاۋىزدىققا بايلانىستى وتستاۆكاعا كەتەتىنىن مالىمدەدى. بىراق ەل پرەزيدەنتى ونىڭ بۇل شەشىمىن قولدامايدى. ساراپشىلار يتاليا ساياسي داعدارىس پەن جاڭا سايلاۋعا دايىندالۋى قاجەت ەكەنىن ايتىپ وتىر.
اپتا ورتاسىندا يتاليا پرەمەر-ءمينيسترى ماريو دراگي ۇكىمەت باسشىسى قىزمەتىنەن كەتەتىنىن حابارلاعان. ۆۆس-ءدىڭ مالىمدەۋىنشە, دراگي مىرزا بۇل شەشىمىن وسىعان دەيىن ۇكىمەتتى ۇنەمى قولداپ كەلگەن ۇلتتىق بىرلىكتىڭ جوقتىعىمەن ءتۇسىندىردى. «ودان ءارى جۇمىس ىستەۋگە جانە مەملەكەتتىك باعدارلامانى ورىنداۋعا ەش مۇمكىندىكتى كورىپ تۇرعان جوقپىن», دەدى دراگي.
ەلدەگى مۇنداي ساياسي داعدارىستىڭ باستالۋىنا دراگي ۇكىمەتى ازىرلەگەن حالىق پەن بيزنەسكە ارنالعان ەكونوميكالىق كومەك باستاماسى اسەر ەتتى. ويتكەنى پارلامەنتتەگى كواليتسيانىڭ بىرەۋى – «بەس جۇلدىز قوزعالىسى» پارتياسى وعان داۋىس بەرۋدەن باس تارتتى. پارتيا مۇشەلەرىنىڭ پىكىرىنشە, ۇكىمەت جاريالاعان قولداۋ شارالارى ءتيىمسىز ءارى جەتكىلىكسىز.
دەگەنمەن ەكى تاراپ اراسىنداعى تەكە-تىرەس بۇدان بۇرىن باستالعان-تۇعىن. «بەس جۇلدىزدىڭ» جەتەكشىسى دجۋزەپپە كونتە پرەمەر-مينيستر دراگيدىڭ ۋكرايناعا قارۋ-جاراق جەتكىزۋگە بەلسەندى تۇردە جاردەمدەسۋىنە بايلانىستى پارلامەنتتىك كواليتسيادان شىعامىن دەپ مالىمدەگەن ەدى. حالىقتىڭ باسىم كوپشىلىگى قاقتىعىستى ديپلوماتيالىق جولمەن شەشۋ قاجەت دەپ ەسەپتەيدى.
وسىلايشا, يتاليا پرەزيدەنتى قيىن جاعدايدا قالىپ وتىر. ءبىر جاعىنان دراگيدى جىبەرگىسى جوق, ەكىنشى جاعىنان كەتەمىن دەگەن پرەمەردى ۇستاپ تۇرۋ دا وڭاي شارۋا ەمەس. بۇدان بولەك, 11 قالانىڭ, سونىڭ ىشىندە ريم مەن ميلاننىڭ مەرلەرى دە ماريو دراگيدى «قيماي» وتىر. ولار ساياساتكەردى قىزمەتىنەن كەتپەۋگە شاقىردى.
ساراپشىلار كەيىنگى ءبىر جارىم جىلعا جۋىق ۋاقىت ىشىندە ەلدە ساياسي تۇراقتىلىق ورناعانىن ايتادى. «ماريو دراگيدىڭ پرەمەر-مينيسترلىگى كەزىندە ەل كوروناۆيرۋس پاندەمياسىنىڭ ەڭ اۋىر زارداپتارىن باستان وتكەردى. ەۋروپالىق وداق قالپىنا كەلتىرۋ قورىنان ەلدى اياققا تۇرعىزۋعا كەرەك قاراجاتتىڭ اۋقىمدى بولىگىنە قول جەتكىزدى. ول قارجىنىڭ كوپ بولىگىن بۇرىنعى ۇكىمەتتىڭ كۇيرەۋىنەن كەيىنگى حاوستى تارتىپكە كەلتىرۋگە جۇمسادى. توتەنشە جاعدايمەن كۇرەسۋ ءۇشىن قۇرىلعان كەڭ اۋقىمدى باعدارلامالاردى ءساتتى ىسكە اسىرىپ, ۇكىمەتتى شەبەر باسقاردى», دەپ جازدى The Guardian باسىلىمى.
باتىس اقپارات قۇرالدارى دراگيدىڭ ۇكىمەت باسىنان كەتۋى رەسەي ءۇشىن «پايدالى» دەپ ەسەپتەيدى. ساراپشىلار دا دراگي كەتكەننەن كەيىن يتاليانىڭ ۋكراينا ماسەلەسىنە قاتىستى ۇستانىمى قالاي وزگەرەتىنىن ويلاپ باس قاتىرىپ جاتىر. «كوپ ۇزاماي يتاليا ساياسي داعدارىس جاعدايىندا ۋكرايناعا قارۋ-جاراق بەرۋدى توقتاتۋى مۇمكىن», دەپ مالىمدەدى ەلدىڭ سىرتقى ىستەر ءمينيسترى Politico باسىلىمىنا بەرگەن سۇحباتىندا.
نەگىزى ساياساتكەر ۋكرايناعا قارۋ-جاراق جەتكىزىلۋىن جانە ماسكەۋگە قارسى ەكونوميكالىق سانكتسيالار ەنگىزۋدى جان-تانىمەن قولدايتىنى بەلگىلى. وسى جىلدىڭ اقپان ايىنىڭ سوڭىندا ەل بيلىگى ۋكرايناعا اسكەري م ۇلىكتەردى, قاجەتتى ماتەريالدار مەن قۇرال-جابدىقتاردى بەرۋ تۋرالى قاۋلى شىعارعان ەدى. رەسمي تۇردە ولاردىڭ ءتىزىمى قۇپيا ساقتالعان-دى. بىراق يتاليا مەدياسى كيەۆكە تانككە قارسى گراناتومەتتەر مەن پۋلەمەتتەر, ۇشاقتارمەن كۇرەسۋگە ارنالعان قارۋ-جاراق پەن رادارلار, زاماناۋي ارتيللەريا مەن بروندى ماشينالار جەتكىزىلەتىنىن بىرنەشە رەت حابارلادى.
سونىمەن قاتار ساراپشىلار ۋكراينا دراگيدىڭ ارقاسىندا ەۋروپالىق وداققا ۇمىتكەر مارتەبەسىن الدى دەپ ەسەپتەيدى. ول – رەسەيلىك مۇناي مەن گازدىڭ باعاسىن شەكتەۋگە بەلسەندى تۇردە ۇمتىلعان تۇلعالاردىڭ ءبىرى. دراگيعا قاتىستى رەسەي ساراپشىلارى دا پىكىرلەرىن ءبىلدىرىپ, ونىڭ ساياسي ارەناداعى ورنىن باعامداۋعا تىرىسىپ جاتقانى جاسىرىن ەمەس.
«ماريو دراگي – باستاپقىدا يتاليا ساياساتىنا قارجى, بيزنەس الەمىنەن كەلگەن قايراتكەر. ول ءبىرىنشى كەزەكتە يتاليانى ەكونوميكالىق داعدارىستان قۇتقارۋى كەرەك. ەشقانداي رۋسسوفوبيا جوق, بىراق ول – ەۋروپالىق ىنتىماقتاستىقتا سولتۇستىك اتلانتيكا ساياساتىن دايەكتى تۇردە جۇزەگە اسىرۋعا كەپىلدىك بەرە الاتىن ساياساتكەر. دراگي شىن مانىندە ۆاشينگتوننىڭ دا, ەۋروپالىق وداقتىڭ دا ۇستانىمىن قولدايدى», دەيدى مگيمو ينتەگراتسيالىق ۇدەرىستەر كافەدراسىنىڭ دوتسەنتى ەلەنا ماسلوۆا.
قازىرگى اۋمالى-توكپەلى كەزەڭدە دراگي يتالياعا اۋاداي قاجەت. ويتكەنى ونىڭ بريۋسسەلدەگى جانە قارجى نارىعىنداعى جوعارى بەدەلى ەل ءۇشىن ماڭىزدى. سونىمەن قاتار ۇلىبريتانيا جاڭا ساياسي داعدارىسقا تاپ بولىپ, ەممانۋەل ماكرون فرانتسياعا ءوزىنىڭ ساياسي ەرىك-جىگەرىن تانىتۋعا بارىن سالىپ جاتقاندا, دراگيدىڭ ەۋروپالىق ارەناداعى ىقپالى ۋكراينانىڭ ەلدىگى مەن بىرلىگى سىنالعان كەزەڭگە ءدوپ ءتۇستى.
اسىرەسە رەسەيگە قاتىستى قاتاڭ باعىتتى جاقتاعان ۇلىبريتانيانىڭ پرەمەر-ءمينيسترى بوريس دجونسون وتستاۆكاعا كەتكەننەن كەيىن, دراگيدىڭ ورنىندا قالۋى ەۋروپاعا قاجەت-اق. ساراپشىلاردىڭ بولجامى بويىنشا, يتالياداعى ساياسي داعدارىس بۇكىل ەۋروپالىق وداققا اسەر ەتۋى مۇمكىن.
«ەگەر ماريو دراگي كەتسە, مەرزىمىنەن بۇرىن سايلاۋ وتەدى. بۇرىنعى بيلىكتىڭ قايتادان جەڭىسكە جەتۋ مۇمكىندىگى بار, سودان كەيىن ساياسات كۇرت وزگەرۋى مۇمكىن. يتالياداعى ساياسي سپەكتردىڭ وڭشىل بولىگى رەسەيمەن ەكونوميكالىق ىنتىماقتاستىقتىڭ ماڭىزىنا ءمان بەردى. سونداي-اق ەۋروپالىق وداق پەن اقش-تىڭ دەگەنىنە كونۋگە ىنتالى ەمەس. سوندىقتان ۆاشينگتون قۇرعان كواليتسياعا اۋىر سوققى بولۋى مۇمكىن», دەيدى تەننەسسي ۋنيۆەرسيتەتىنىڭ ساياساتتانۋ جانە حالىقارالىق قاتىناستار كافەدراسىنىڭ پروفەسسورى, ەكونوميكا عىلىمدارىنىڭ كانديداتى اندرەي كوروبكوۆ.
قازىردە يتاليانىڭ 100-دەن استام مەرى دراگيدى قىزمەتىنەن كەتۋ تۋرالى شەشىمىن قايتا قاراۋعا شاقىردى. ەلدەگى بيزنەس پەن كاسىپوداق جەتەكشىلەرى دە ونى رايىنان قايتارۋعا تىرىسىپ جاتىر.
«ۇكىمەت سايىپ كەلگەندە ساياسي كەلىسپەۋشىلىكتەردى داۋىس بەرۋ ارقىلى شەشۋى كەرەك. سايلاۋ ءوز ۋاقىتىمەن, كەلەسى كوكتەمدە وتۋگە ءتيىس. وعان دەيىن ماريو دراگي ءوز ورنىندا قالعانى ءجون», دەپ ەسەپتەيدى ەلدەگى دەموكراتيالىق پارتيا (دپ) جەتەكشىسى ەنريكو لەتتا.
قورىتا ايتقاندا, يتالياداعى ساياسي داعدارىستىڭ سالقىنى ەۋروپاعا دا سەزىلۋى مۇمكىن. دراگي مىرزانىڭ بيلىكتە قالۋ-قالماۋى ءبىراز ماسەلەنى تۇبەگەيلى وزگەرتەتىن سىڭايلى.