ورتالىق ازيا مەملەكەتتەرىنىڭ شەكاراسىندا ءاربىر اتىلعان وقتىڭ جاڭعىرىعى بارلىق ايماققا اۋىر سەزىلەدى. بۇل تۋرالى قازاقستان پرەزيدەنتى قاسىم-جومارت توقاەۆ شولپان-اتادا وتكەن ورتالىق ازيا مەملەكەتتەرى باسشىلارىنىڭ كونسۋلتاتيۆتىك كەزدەسۋىندە وسىلاي دەپ مالىمدەدى.
ونىڭ ايتۋىنشا, مەملەكەت باسشىلارى ايماقتاعى تۇراقسىزدىقتىڭ ءالى دە ساقتالىپ وتىرعان فاكتورلارىن بارىنشا جويۋ ءۇشىن قولدان كەلگەننىڭ ءبارىن جاساۋى كەرەك.
«مەملەكەتارالىق شەكارالارداعى ءاربىر مىلتىق داۋسىنىڭ جاڭعىرىعى ەكى ەلگە عانا ەمەس, بۇكىل وڭىرگە جاعىمسىز اسەر ەتەدى. كەرىسىنشە, ءدال قازىرگى داعدارىس جاعدايىندا مەملەكەتتەرىمىز قايشىلىقتاردى ەڭسەرۋ ىسىندە وركەنيەتتىلىكتىڭ, جاۋاپتىلىقتىڭ ۇلگىسىن كورسەتۋگە ءتيىس. شەكارانى زاڭدى تۇردە راسىمدەۋ ۇدەرىسىنىڭ وتە كۇردەلى ءارى قيىن ەكەنىن ءوز تاجىريبەمىزدەن بىلەمىز. داۋلى ماسەلەلەر شىنايى تاتۋ كورشىلىك پەن حالىقارالىق قۇقىقتىڭ ىرگەلى قاعيداتتارىنا قۇرمەت كورسەتۋ ارقىلى تەك قانا بەيبىت جولمەن شەشىلۋى مۇمكىن. بۇنىڭ باسقا جولى جوق. بۇل كەشەندى پروبلەمالاردى ەلەمەۋدىڭ نەمەسە سوزبالاڭعا سالۋدىڭ سالدارى قيىن بولادى, ءتىپتى ورتالىق ازياداعى ىنتىماقتاستىقتى دامىتۋعا باعىتتالعان بارلىق كۇش-جىگەرىمىزدى جوققا شىعارۋى مۇمكىن. پوستكەڭەستىك كەڭىستىكتە ءوزىنىڭ شەكاراسىن تولىق دەليميتاتسيا جاساعان مەملەكەت رەتىندە, قازاقستان, ءوزارا ءتيىمدى شەشىمدەر ىزدەستىرۋگە بارىنشا كومەك كورسەتۋگە دايىن», دەدى ق.توقاەۆ.