شري-لانكاداعى پرەزيدەنتتىك سايلاۋ كەزىندە رانيل ۆيكراماسينگحە جەڭىسكە جەتتى. پارلامەنت دەپۋتاتتارىنىڭ باسىم بولىگى ەكس-پرەمەرگە داۋىس بەردى. ساراپشىلار بۇل حالىقتىڭ نارازىلىعىن ودان ءارى ۋشىقتىرۋى مۇمكىن ەكەنىن العا تارتادى. ويتكەنى جاڭا باسشى بيلىكتەن قۋىلعان پرەزيدەنت گوتابايا رادجاپاكساعا جاقىن تۇلعا.
التى رەت پرەمەر-مينيستر قىزمەتىن اتقارعان رانيل ۆيكراماسينگحە سارسەنبىدە پارلامەنتتە جاسىرىن داۋىس بەرۋ ارقىلى شري-لانكا پرەزيدەنتى بولىپ سايلاندى. «شري-لانكا تاۋەلسىزدىك العاننان بەرگى ەڭ اۋىر ەكونوميكالىق داعدارىستان, ازىق-ت ۇلىك پەن جانارماي تاپشىلىعىنان جانە پارلامەنتكە دەگەن ۇلكەن سەنىم داعدارىسىنان زارداپ شەككەن ۋاقىتتا, ەل بيلىگىنە كەلگەن ۆيكراماسينگحەنى قيىن جول كۇتىپ تۇر», دەپ جازادى The Guardian.
جەڭىسكە جەتكەننەن كەيىنگى سوزىندە رانيل ۆيكراماسينگحە بۇكىل ساياسي پارتيانى ەلدىڭ يگىلىگى ءۇشىن بىرلەسىپ جۇمىس ىستەۋگە شاقىردى. 73 جاستاعى ساياساتكەر 134 داۋىس, ونىڭ قارسىلاسى بۇرىنعى بۇقارالىق اقپارات قۇرالدارى ءمينيسترى دۋللا اللاحاپەرۋما 82 داۋىس جينادى.
Associated Press اگەنتتىگى ۆيكراماسينگحەنىڭ سايلانۋى ەلدە نارازىلىق قوزعالىسىن تۋدىرۋى مۇمكىن ەكەنىن ايتادى. ويتكەنى ول شري-لانكانىڭ بۇرىنعى پرەزيدەنتىنىڭ اكىمشىلىگىنىڭ قۇرامىندا قىزمەت ەتكەن. رانيل ۆيكراماسينگحە وسى جىلدىڭ مامىر ايىنان باستاپ پرەمەر-مينيستر قىزمەتىن اتقاردى. شىلدەنىڭ باسىندا ەلدەگى ساياسي داعدارىستىڭ سالدارىنان پرەزيدەنت قاشىپ كەتكەننەن سوڭ شري-لانكا پرەزيدەنتىنىڭ مىندەتىن اتقارعان-دى.
داۋىس بەرۋگە پارلامەنتتىك پالاتادا رادجاپاكسا وتباسىنىڭ ءۇش مۇشەسى بار. اتاپ ايتقاندا, گوتابايا رادجاپاكسانىڭ ۇلكەن اعاسى, بۇرىنعى پرەزيدەنت جانە پرەمەر-مينيستر ماحيندا رادجاپاكسا داۋىس بەرۋگە قاتىستى. بۇل گوتابايا رادجاپاكسا ەلدەن قاشۋعا ءماجبۇر بولعاننان كەيىن رادجاپاكسا وتباسىنىڭ كوپشىلىك الدىندا العاش رەت شىعۋى.
ۆيكراماسينگحەنىڭ ساياساتتا جۇرگەنىنە قىرىق جىلدان استى. ونى شري-لانكانى قازىرگى ەڭ اۋىر ساياسي جانە ەكونوميكالىق داعدارىستان وتكىزۋگە لايىق تۇلعا دەيتىندەر دە بار. اسىرەسە ەلگە حالىقارالىق قارجى قورىنان قارجىلىق كومەك كورسەتۋ تۋرالى كەلىسسوزدەر جۇرگىزۋگە كومەكتەسەتىن تاجىريبەلى جانە قابىلەتتى تۇلعا دەپ ەسەپتەيدى. رانيل ۆيكراماسينگحە ەلدى 2024 جىلدىڭ قاراشاسىنا دەيىن باسقارادى.
بىراق ونىڭ قاشقىن گوتابايا رادجاپاكسامەن تىعىز قارىم-قاتىناسى سايلاۋشىلار اراسىنداعى بەدەلىنە نۇقسان كەلتىرۋى ىقتيمال. اراگالايا دەپ اتالاتىن ەلگە تانىمال نارازىلىق قوزعالىسى مۇشەلەرىنىڭ كوپشىلىگى ول دا بيلىكتەن كەتكەنگە دەيىن نارازىلىقتارىن جالعاستىرۋعا انت بەردى. سارسەنبىدە جاسىرىن داۋىس بەرۋ كەزىندە كولومبوداعى پرەزيدەنت حاتشىلىعىندا ۆيكراماسينگحەنىڭ وتستاۆكاعا كەتۋىن تالاپ ەتكەن ءۇنسىز نارازىلىق اكتسياسى ءوتتى.