باس پروكۋراتۋرا مەن ىشكى ىستەر مينيسترلىگى «قاڭتار وقيعاسىنىڭ» كەزەكتى تەرگەۋ بارىسى تۋرالى مالىمدەدى. بۇگىندە تەرگەۋ, تەكسەرۋ ناتيجەسىندە 5 مىڭنان استام ءتۇرلى دەڭگەيدەگى سوتقا دەيىنگى ءىس تىركەلگەن.
جاپپاي تارتىپسىزدىك, اتاپ ايتقاندا, قيراتۋ, مەملەكەتتىك وبەكتىلەردى ورتتەۋ, م ۇلىكتەردى جويۋ جانە تەرروريزم اكتىلەرى الماتى, شىمكەنت قالالارىندا, اقتوبە, اتىراۋ, الماتى, جامبىل, قىزىلوردا جانە شىعىس قازاقستان وبلىستارىندا ورىن الدى. نارازىلار اسكەريلەرگە شابۋىل جاساپ, جولدىڭ ءجۇرۋ بولىگىن جاۋىپ, اۆتوكولىكتەردى ورتەپ, ازاماتتاردى تارتىپسىزدىكتەرگە قاتىسۋعا كوندىرگەن جانە نىسانداردى توناعان.
«قوعامدىق قاۋىپسىزدىك پەن قۇقىقتىق ءتارتىپتى قامتاماسىز ەتۋدى بۇعاتتاۋ ءۇشىن ولار پوليتسيا ورگاندارىنىڭ عيماراتتارىنا شابۋىلدار جاسادى. بۇگىنگى كۇنى ارنايى پروكۋرورلاردىڭ ءىس جۇرگىزۋىندە جاپپاي تارتىپسىزدىكتەر بويىنشا – 53, تەرروريزم اكتىلەرىنە قاتىستى 32 قىلمىستىق ءىس بار. تەرگەۋ ارەكەتتەرىنىڭ اياقتالۋىنا قاراي ىستەر سوتقا جولدانادى. الماتى قالاسىندا ارنايى پروكۋرورلار 3 ازاماتقا قاتىستى سوتقا دەيىنگى تەرگەپ-تەكسەرۋ اياقتالدى. ولار جاپپاي تارتىپسىزدىكتەرگە قاتىسقانى, مەملەكەتتىك ورگانداردىڭ عيماراتتارىنا شابۋىل جاساعانى جانە بيلىك وكىلدەرىنە كۇش قولدانعانى ءۇشىن كۇدىكتى دەپ تانىلعان. قاڭتاردىڭ 4-نەن 5-نە قاراعان ءتۇنى ولار الماتى قالاسىنىڭ ورتالىق الاڭىندا بولىپ, باسقا ادامدارمەن توپتاسا پوليتسيانىڭ 42 قىزمەتتىك اۆتوكولىگىن قيراتتى. قولجەتىمدى قۇرالدارمەن قارۋلانىپ, قۇقىق قورعاۋ قىزمەتكەرلەرىنە زورلىق-زومبىلىق جاسادى. سودان كەيىن اكىمدىك عيماراتىنا شابۋىل جاساۋعا جانە ورتەۋگە بەلسەندى تۇردە قاتىستى. ولاردىڭ وسى قىلمىستارعا قاتىسىن بەينەكامەرا جازبالار, كۋالاردىڭ جاۋاپتارى جانە ساراپتامالىق زەرتتەۋلەر راستادى. قىلمىستىق ءىس ايىپتاۋ اكتىسى رەتىندە قاراۋ ءۇشىن سوتقا جولداندى», دەدى باس پروكۋراتۋرانىڭ قىلمىستىق قۋدالاۋ قىزمەتى باستىعىنىڭ ورىنباسارى ەلدوس قيلىمجانوۆ.
سونداي-اق پروكۋرورلار بۇگىنگە دەيىن 8 وڭىردە 30 مىڭنان استام تەرگەۋ ارەكەتىن جۇرگىزگەن. ناتيجەسىندە, 4 مىڭنان استام سوت ساراپتامالارى تاعايىندالدى.
«قازىرگى ۋاقىتتا 349 كۇدىكتى ادام قاماۋدا وتىر. ولاردىڭ قيراتۋلارعا, عيماراتتاردى ورتەۋگە, قارۋلاردى جىمقىرۋعا, مەملەكەتتىك وبەكتىلەرگە جانە قۇقىق قورعاۋ ورگاندارى قىزمەتكەرلەرىنە قارۋلى شابۋىل جاساۋعا بەلسەندى تۇردە قاتىسقانى انىقتالدى. ءاربىر قاماۋعا الىنعان ادامنىڭ قىلمىسقا قاتىسى تۋرالى جەتكىلىكتى مالىمەت بار. قاڭتار وقيعالارى بويىنشا سوتقا 479 قىلمىستىق ءىس جولدانىپ, سوعان سايكەس 545 ادام سوتتالدى. ناقتى باس بوستاندىعىنان ايىرۋ جازاسىن بيلىك وكىلدەرىنە قاتىستى كۇش قولدانعان, م ۇلىكتەردى زاقىمداۋعا بايلانىستى اۋىر قىلمىس جاساعاندار, سونداي-اق زالالدى وتەمەگەن جانە وتەلمەگەن سوتتىلىعى بار 83 سوتتالۋشى الدى», دەدى ە.قيلىمجانوۆ.
سونىمەن قاتار اقتوبە وبلىسىندا 3 كۇدىكتىگە قاتىستى ايىپتاۋ ۇكىمى شىعارىلعان. انىقتالعان ءمان-جايلارعا سايكەس, 5 قاڭتار ولار بۇعاتتاۋ جانە قىزمەتتى توقتاتۋ ارقىلى اقتوبە قالاسىنىڭ حالىقارالىق اۋەجايىن باسىپ العان. ناتيجەسىندە, ستراتەگيالىق وبەكتىنىڭ جۇمىسى 2 تاۋلىكتەن استام مەرزىمگە توقتاتىلىپ, ىشكى جانە حالىقارالىق رەيستەر كەشىكتىرىلىپ, ايتارلىقتاي زالال كەلتىرىلگەن. كۇدىكتىلەرگە ءتۇرلى جازا تاعايىندالىپ, سوتتالدى.
«الماتى وبلىسىندا پروتسەستىك كەلىسىم بويىنشا تالدىقورعان قالاسىنداعى جاپپاي نارازىلىقتىڭ 5 بەلسەندى قاتىسۋشىسى شارتتى جازا الدى. بۇعان دەيىن حابارلانعانداي, سول كۇندەرى جاپپاي تارتىپسىزدىكتەرگە قازاقستاندا تىيىم سالىنعان «دۆك/كوشە» ەكسترەميستىك ۇيىمىنىڭ جاقتاۋشىلارى بەلسەندى قاتىستى. شىمكەنت قالاسىندا سوت ۇكىمىمەن وسى ۇيىمنىڭ 3 مۇشەسى 3 جىلعا باس بوستاندىعىنان ايىرىلدى. ولار جاپپاي تارتىپسىزدىككە قاتىسۋعا شاقىرۋمەن شەكتەلمەي, قيراتۋعا, مەملەكەتتىك م ۇلىككە زاقىم كەلتىرۋگە ارالاسىپ, قالالىق اكىمدىك عيماراتىنا شابۋىل جاسادى. سوت اكتىسى زاڭدى كۇشىنە ەنگەن جوق», دەدى باس پروكۋراتۋرا وكىلى.
ال ىشكى ىستەر مينيسترلىگى «قاڭتار وقيعاسىنا» قاتىستى 381 قىلمىستىق ءىس بويىنشا 10 ادام قاماۋدا وتىرعانىن مالىمدەدى. ايىپتاۋ اكتىسىمەن 589 كۇدىكتىگە قاتىستى 359 ءىس سوتقا جولدانعان. ولاردىڭ كوپشىلىگى جاپپاي تارتىپسىزدىك بارىسىندا ۇرلىق جاساعانى, قارۋ ۇرلاعانى جانە زاڭسىز ساقتاعانى, كولىك قۇرالدارىن زاڭسىز ايداپ كەتكەنى, توناۋ جانە بۇزاقىلىق جاساعانى ءۇشىن جاۋاپكەرشىلىككە تارتىلعان.
«سوتتا قاراۋ ناتيجەلەرى بويىنشا 460 ادامعا قاتىستى ۇكىم شىقتى. سونىڭ ىشىندە 371 ادام باس بوستاندىعىنان ايىرىلدى. 4 ادام قوعامدىق جۇمىستارعا تارتىلدى, 5 ادامعا ايىپپۇل سالىندى, اۋىر جانە اسا اۋىر قىلمىس جاساعانى ءۇشىن 80 ادام باس بوستاندىعىنان ايىرىلدى. ودان باسقا, كەلتىرىلگەن شىعىندى وتەۋىنە جانە تاراپتاردىڭ تاتۋلاسۋىنا بايلانىستى 13 ادام قىلمىستىق جاۋاپكەرشىلىكتەن بوسادى. قازىرگى تاڭدا سوتتاردىڭ وندىرىسىندە 116 سوتتالۋشىعا قاتىستى 55 قىلمىستىق ءىس قارالىپ جاتىر», دەدى ىشكى ىستەر مينيسترلىگى تەرگەۋ دەپارتامەنتى باستىعىنىڭ ورىنباسارى مۇحتار قوجاەۆ.
سونىمەن قاتار ءتارتىپ ساقشىلارى وقيعا كەزىندە 343 ملن تەڭگەدەن استام سومانى قۇرايتىن م ۇلىكتى تاركىلەگەن. «جاپپاي تارتىپسىزدىكتەردەن جابىرلەنۋشى بولىپ تانىلعان ازاماتتارعا كەلگەن شىعىندى ءوندىرۋ اياسىندا ازاماتتار مەن بيزنەس سۋبەكتىلەرىنەن ۇرلانعان 343 ملن تەڭگەدەن استام سومانىڭ مۇلكى تابىلىپ, الىندى. ونىڭ ىشىندە 12 اۆتوكولىك, 317 تۇرمىستىق تەحنيكا, 189 زەرگەرلىك بۇيىم, 386 ۇيالى تەلەفون, 550-گە جۋىق ءتۇرلى كيىم-كەشەك, 16 ملن تەڭگەدەن استام اقشالاي قاراجات جانە تاعى باسقالارى بار. ىشكى ىستەر ورگاندارى جاپپاي تارتىپسىزدىكتەر بارىسىندا ۇرلانعان قارۋدى ىزدەپ تاۋىپ, تاركىلەۋ بويىنشا بەلسەندى جۇمىستى جالعاستىرادى», دەدى ءىىم-ءنىڭ وكىلى.