اقتوبەنىڭ تەمىر اۋدانىندا شەنەۋنىكتەر كەڭكياق پەن شۇبارقۇدىق اۋىلدارىنداعى سۋ قۇبىرىن جوندەۋگە بولىنگەن قاراجاتتى تالان-تاراجعا سالعان. بيۋدجەتتىڭ 14 ميلليون تەڭگەسىن جەپ قويدى دەپ ايىپتالعان اۋداندىق تۇرعىن ءۇي كوممۋنالدىق شارۋاشىلىق ءبولىمىنىڭ باسشىسى بولعان جانىبەك ايداشەۆ پەن ونىڭ ەكى سىبايلاسى سوتتالدى, دەپ جازادى Egemen.kz استانا تۆ ارناسىنا سىلتەمە جاساپ.
سوت ماتەريالى بويىنشا, اتالعان ءبولىم باسشىسى كوممۋنالدىق مەكەمەسىنىڭ ديرەكتورىمەن ءسوز بايلاسىپ, ءوزىنىڭ دوسىنا تيەسىلى مەردىگەر مەكەمەمەن قۇبىردىڭ جوندەلگەنى تۋرالى جالعان قۇجاتتار جاساعان.
ءسويتىپ, ۇشەۋى بيۋدجەت قاراجاتىن ءوزارا ءبولىپ العان. سوتتالۋشىلار كىنانى تولىق مويىنداپ, ۇرلانعان قاراجاتتى مەملەكەتكە قايتارعان. بىراق جازادان قاشىپ قۇتىلا المادى.«سوت ۇكىمىمەن ايداشەۆقا 2 جىل 6 اي, سوۆەتوۆاعا 2 جىل باس بوستاندىعىنان ايىرۋ جازاسى تاعايىندالدى. سوتتالۋشىلاردىڭ ەكەۋى دە ءومىر بويىنا مەملەكەتىك قىزمەتتە ەڭبەك ەتۋ قۇقىعىنان ايىرىلدى. تىلەۋعاليگە 3 جىل مەرزىمگە پروباتسيالىق باقىلاۋ ورناتىلا وتىرىپ, باس بوستاندىعىن شەكتەۋ جازاسى تاعايىندالدى», دەيدى اقتوبە وبلىستىق سوتىنىڭ ءباسپاسوز حاتشىسى گۇلجانار وتارباەۆا.