اقش-تا جانارماي قىمباتتادى

اقش ۇكىمەتىنىڭ مالىمەتتەرى بويىنشا, كوروناۆيرۋستىق پاندەمياعا بايلانىستى جانارماي باعاسى 2020 جىلدىڭ ساۋىرىنەن باس­تاپ كوتەرىلدى. 1,80 دوللار بولعان باعا 2021 جىلدىڭ مامىرىندا 3 دوللارعا جەتسە, وسى جىلدىڭ ناۋرىز ايىندا 4 دوللاردان استى. ەندى مىنە ماۋسىمدا گاللونىنا 5 دوللارعا دەيىن كوتەرىلىپ وتىر. «وتكەن جىلدىڭ سايكەس ۋاقىتىمەن سالىستىرعاندا جانار-جاعارماي باعاسى $1,92 جوعارى بولدى. باعا كورسەتكىشى كاليفورنيادا 6,43 دوللاردان, ميسسيسيپيدە 4,52 دوللارعا دەيىن اۋىتقىپ تۇر», دەيدى اقش اۆتوكولىك قاۋىمداستىعى. «الەمدىك مۇناي باعاسى بىركەلكى ەمەس, بىراق كۇرت وسۋدە. دۇنيە جۇزىندەگى مۇناي باعاسى شامامەن ەكى ەسە ءوستى, ال اقش-تاعى ەتالوندىق باعا ءدال وسىنداي سوماعا ءوستى. باعانىڭ وسۋىنە بىرنەشە فاكتور اسەر ەتەدى. رەسەيدىڭ ۋكرايناعا باسىپ كىرۋى جانە ودان كەيىن اقش پەن ونىڭ وداقتاستارىنىڭ سانكتسيالارى جانارماي وسىمىنە تۇرتكى بولدى», دەيدى ساراپشىلار.

سونىمەن قاتار «مۇناي مەن جانار-جاعار­ماي قورلارىنىڭ تاۋسىلۋى ەكونوميكا­نىڭ قالپىنا كەلۋىنە بايلانىستى ەنەرگيا تۇتىنۋ­دىڭ وسۋىنە اسەر ەتەدى. سونداي-اق امەري­كا­لىقتار مامىر ايىنىڭ سوڭىنداعى «ەسكە الۋ كۇنىنەن» باستاپ كوبىرەك كولىك جۇرگىزگەن, بۇل سۇرانىستى ارتتىرادى», دەپ قوستى ولار. ال اقش ەنەرگەتيكا مينيسترلىگىنىڭ مالىمەتىنشە, اقش الەمدەگى ەڭ ءىرى مۇناي ءوندىرۋشى ەل بولىپ تابىلادى, بىراق ونىڭ مۇنايدان بەنزينگە دەيىنگى قۋاتتىلىعى 2019 جىلدىڭ سوڭىنان بەرى تاۋلىگىنە 900 مىڭ باررەلگە تومەندەگەن. ەۋروپالىق وداق باسشىلارى بولسا وسى جىلدىڭ سوڭىنا دەيىن رەسەيلىك مۇنايدىڭ باسىم بولىگىنە تىيىم سالۋعا ۋادە بەرىپ وتىر.

بىرقاتار ساراپشىنىڭ بولجاۋىنشا, اقش-تاعى جانارمايدىڭ ورتاشا باعاسى تامىز ايىندا ءبىر گاللون ءۇشىن 6 دوللاردان دا اسۋى مۇمكىن. رەسەيدىڭ ەكسپورتى قىسقارعاننان كەيىن جانارماي داعدارىسى اقش-پەن قاتار ەۋروپا, ازيا ەلدەرىندە دە بايقالىپ وتىر. قازىردە ۇلىبريتانيادا بەنزين باعاسى گاللونىنا 7,70 دوللار, نيدەرلاند پەن گەرمانيادا 8,25 دوللار, دانيادا 9 دوللارعا جەتكەن.