بيىل مەملەكەتتىك رامىزدەردىڭ قابىلدانعانىنا – 30 جىل. وسىعان وراي قازاقستان رەسپۋبليكاسىنىڭ تۇڭعىش پرەزيدەنتى – ەلباسى كىتاپحاناسىندا «مەملەكەتتىلىكتىڭ رامىزدەرى» تاقىرىبىندا حالىقارالىق عىلىمي كونفەرەنتسيا ءوتتى. القالى جيىندا وتاندىق جانە شەتەلدىك ساراپشى-عالىمدار رامىزدەردىڭ ناسيحاتتالۋى مەن يدەولوگيالىق كەمشىن تۇستارىن ءسوز ەتتى.
ءىس-شارا جۇمىسىن كىتاپحانا ديرەكتورى, ساياسي عىلىمدار كانديداتى باقىتجان تەمىربولات جۇرگىزدى. ول ءوز سوزىندە مەملەكەتتىك سيمۆولدارعا بايلانىستى پىكىرىن ەلدىڭ ساياسي رامىزدەرى جاستاردىڭ ءوزىن-ءوزى تانۋىنىڭ ماڭىزدى فاكتورلارى رەتىندە جەتكىزدى. سونىمەن قاتار اقپارات جانە قوعامدىق دامۋ ۆيتسە-ءمينيسترى الەكساندر دانيلوۆ ەل جاستارىنىڭ الەۋمەتتىك پورترەتى تۋرالى ءسوز قوزعادى. ال مەملەكەتتىك ەلتاڭبانىڭ اۆتورى, قازاقستاننىڭ ەڭبەك سىڭىرگەن قايراتكەرى جانداربەك مالىبەكوۆ ۇلتتىق رامىزدەرىمىزدى ناسيحاتتاۋ جۇمىستارىنا كوڭىلى تولمايتىنىن جەتكىزدى.
«بارلىعى ناۋقان ەسەبىندە عانا, رامىزدەر كۇنىنە وراي جىلىنا ءبىر اپتا, ون كۇندەي عانا كەزدەسۋلەر, وزگە دە ءىس-شارالار وتكىزەمىز دە قويامىز. ال ولاردىڭ ءمانى مەن ماعىناسىن, قۇندىلىعىن بالاباقشا, مەكتەپ, جوعارى وقۋ ورىندارىندا, اۋىل جاستارىنىڭ بويىنا ءسىڭدىرۋىمىز قاجەت. جاستار تۋدى قولدارىنا العاندا, ۇيلەرىنىڭ تورىنە ىلگەندە عانا جۇرەگىمەن سەزىنەدى. مەنىڭ وتانىم, مەنىڭ وتباسىم, مەنىڭ قازاقستانىم, مەنىڭ بايراعىم, مەنىڭ تاڭبام, مەنىڭ ەلىم دەگەن تۇسىنىك قالىپتاسادى. جاڭا قازاقستان قۇرامىز دەپ جاتىرمىز, ولاي بولسا وسى جاستار ۇيىمدارى بار, كوميتەتى بار سولاردىڭ جانىنان رامىزدەرىمىزدى ناسيحاتتاۋ ءۇشىن زاڭدا قانداي وزگەرىستەر, تالاپتار قاجەت ەكەنىن انىقتايتىن كوميسسيا قۇرىلسا دەگەن ۇسىنىسىم بار. ءبىر كونفەرەنتسيامەن عانا ماسەلە شەشىلمەيدى», دەپ پىكىرى مەن ۇسىنىسىن ءبىلدىردى جانداربەك مالىبەكوۆ.
ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پرورەكتورى, فيلولوگيا عىلىمدارىنىڭ دوكتورى, پروفەسسور ديحان قامزابەك ۇلى دا رامىزتانۋداعى جاستاردىڭ رولىنە انىعىراق ايتساق, جاڭا مىندەتتەرىنە توقتالدى.
كونفەرەنتسياعا شەتەلدىك ساراپشىلار ونلاين بايلانىس ارقىلى قاتىستى. قىرعىز مەملەكەتتىك زاڭ اكادەمياسىنىڭ كافەدرا مەڭگەرۋشىسى, فيلوسوفيا عىلىمدارىنىڭ دوكتورى ساۆەتبەك ابدراسۋلوۆ مەملەكەتتىك رامىزدەردىڭ يدەولوگيالىق, ساياسي كەمشىلىكتەرىن ءوز ەلىنىڭ مىسالىندا باياندادى. «تۋ تۋرالى ايتاتىن بولساق, قىرعىزدار ەرتە زاماننان اق, كوك, قىزىل جانە قارا ءتۇستى تۋدى قولدانعان. ولاردىڭ ارقايسىسى حالىقتىڭ بەلگىلى ءبىر كۇيىن ءبىلدىردى. قىرعىز حالقى جوقتاۋدى قارامەن, سۇلۋلىق, ءومىر مەن ەرلىكتى قىزىلمەن, اسپان, اقيقات, تەكتىلىكتى كوكپەن, ادىلدىك, كەلىسىم, تاتۋلىق, بىرلىك, رۋحاني تازالىقتى اقپەن بەلگىلەگەن. تۋ نەگىزى اق جانە اشىق كوك ءتۇستى بولۋ كەرەك. ال بۇرىنعى قىرعىزستاننىڭ تۋىندا قارا ءتۇس قولدانىلدى. بۇل جوبانى قۇراردا كاسىبي مامانداردىڭ تارتىلماعانىن كورسەتەدى. يدەولوگيا, ساياسات تۇرعىسىنان العاندا نەنى كورسەتەدى؟ قارا ءتۇس – قارالى كۇن, ازا تۇتۋدى مەڭزەيدى. مۇمكىن, قىرعىز حالقىنىڭ اۋمالى-توكپەلى كەزەڭدەردى باستان وتكەرگەنىن كورسەتكىسى كەلگەن بولار. تۋدىڭ ءتۇسى اق, كوك جانە التىننىڭ ۇيلەسىمى بولۋى كەرەك. كوگىلدىر-كوك ءتۇستى تۋ, ونىڭ ورتاسىندا اق ءوڭى بار التىن شەڭبەر جانە ىشىندە سۋرەتى بار. وسى تۇرعىدا تۋدى قۇراستىراردا قازاق حالقى دۇرىس شەشىم قابىلداعان. ەركىندىكتى ءبىر تۋعا سىيعىزعان. وسى جاعىنان ەلدىڭ ساياسي الەۋەتىن كورۋگە بولادى», دەدى قىرعىز عالىمى. ال دجوردج مارشالل اتىنداعى ەۋروپالىق قاۋىپسىزدىك ماسەلەلەرىن زەرتتەۋ جونىندەگى ورتالىقتىڭ پروفەسسورى, ساياسي عىلىمدار دوكتورى (نيۋ-مەكسيكو, اقش) گرەگوري گليسون قازاقستاننىڭ مەملەكەتتىك رامىزدەرىن جانە جالپى قازاق ەلىن شەتەل ازاماتىنىڭ كوزىمەن سيپاتتاپ بەردى.
كونفەرەنتسيا وسكەلەڭ ۇرپاقتىڭ مەملەكەتتىك رامىزدەرگە, ەلىمىزدىڭ پاتريوتتىق مازمۇنداعى برەندتەرىنە قۇرمەتپەن قاراۋىن, ولاردىڭ جاسامپازدىق قۇندىلىقتارىن نىعايتۋدى ماقسات ەتكەن ەدى. ساراپشىلار ءىس-شارا جوعارى دەڭگەيدە وتكەنىن جەتكىزىپ, ماقساتىنا جەتۋ كەلەر كۇننىڭ ەنشىسىندە ەكەنىن ايتتى. عىلىمي كونفەرەنتسيانىڭ قورىتىندىسى بويىنشا مەملەكەتتىك رامىزدەرىمىزدى مەملەكەت ىشىندە جانە شەكارادان تىس جۇرگەن جاستاردىڭ اراسىندا ناسيحاتتاۋ بويىنشا ۇسىنىستار ازىرلەندى.