جاستاردىڭ ءاربىر ۇسىنىسى ەسكەرىلەدى

كەزدەسۋگە سەرۆيس جانە تۋريزم, تەحنولوگيالىق كوللەدج, كولىك جانە كوممۋنيكاتسيا جانە Astana Polytechnic جوعا­رى كوللەدجدەرىنىڭ, سونداي-اق «اس­تانا-پروفي» قالالىق شارۋا­شىلىق كوللەدجىنىڭ ستۋدەنت­تەرىمەن قاتار مەكتەپ مۇعالىمدەرى قاتىستى. كەزدەسۋ بارى­سىندا دەپۋتاتتار كونستي­تۋتسياعا ۇسىنىلىپ وتىرعان تولىق­تى­رۋ­لاردى تالقىلاپ, ولاردى رەسپۋب­ليكالىق رەفەرەندۋم ارقىلى ەن­گىزۋدىڭ ماڭىزدىلىعىن اتاپ ءوتتى.

«ەلدەگى ساياسي ماڭىزى بار كەزەڭگە, ياعني رەفەرەندۋمنىڭ وتۋىنە از ۋاقىت قالدى. دەگەنمەن قازىر حالىقتىڭ, ءاربىر داۋىس بەرۋشى ازاماتتىڭ بۇل وقيعانىڭ نەگىزگى ءمانىن تەرەڭ ءتۇسىنۋى ماڭىزدى بولىپ وتىر. وسى ماقساتتا ءبىز بىرنەشە كەزدەسۋ وتكىزىپ, حالىقپەن, وزدەرىڭدەي جاستارمەن پىكىر الىسىپ وتىرمىز. بايقاعانىمىز, حالىق پرەزيدەنت قاسىم-جومارت توقاەۆتىڭ ەكىنشى رەسپۋبليكا قۇرۋ جونىندەگى ماقساتىن, بۇكىل حالىقتىڭ مەملەكەتتى باسقارۋعا تىكەلەي قاتىسۋى ءۇشىن ناقتى تەتىكتەرگە قادام جاساپ جاتقانىن ءتۇسىنىپ, وڭ پىكىر بىلدىرۋدە. سوندىقتان ءوزىم رەفەرەندۋمنىڭ ءبىزدىڭ حالىقتان قولداۋ تاباتىنىنا سەنىمدىمىن. جاستاردىڭ ايتقان ءاربىر پىكىرى مەن ۇسىنىسى ەسكەرىلەدى», دەدى قازاقستان حالقى اسسامبلەياسىنىڭ اتىنان سايلانعان پارلامەنت ءماجى­لىسىنىڭ دەپۋتاتى ساۋىتبەك ابدراح­مانوۆ.

ال دەپۋتات يۋري لي: «نەگىزگى زاڭىمىز – كونستيتۋتسياعا ۇسىنىلعان تۇزەتۋلەر ساياسي جۇيەدە وتە ماڭىزدى وزگەرىستەردى, قوعامدىق-ساياسي سالاداعى ناقتى كۇرەستى كۇشەيتۋدى كوزدەيدى. وسى تۇرعىدان العاندا, ەلدىڭ ءاربىر ازاماتى 5 ماۋسىمدا وتەتىن رەفەرەندۋمدا ءوز پىكىرىن بىلدىرۋگە قۇقىلى. بۇل كەزەڭ ازاماتتاردىڭ قوعامدىق-ساياسي ورتادا ءوز ويىن جەتكىزىپ, بولاشاعىنا ماقسات-مىندەتتەر قويا الاتىن, ولاردى ىسكە اسىرا الاتىن, سونداي-اق قوعامدىق-ساياسي سالادا ماڭىزدى تۇلعا بولا الاتىن ءسات. سوندىقتان ءبىز جاستارىمىزدىڭ وسىنداي باستامالارعا بەلسەنە ارالاسىپ, وزدەرىن تانىتقانىن قالايمىز», دەدى.

كەزدەسۋدە كوللەدج جاس­تارى وزدەرىن قىزىقتىرعان سۇراق­تارىن قويدى. جاستاردىڭ ساۋال­دارىنا جاۋاپ بەرگەن دەپۋتات­تار وسكەلەڭ ۇرپاقپەن وتكەن كەز­دەسۋدىڭ كوڭىلدەرىنەن شىققانىن جەتكىزدى.