بۇگىن ورتالىق كوممۋنيكاتسيالار قىزمەتىندە وتكەن بريفينگتە قازاقستان ەكونوميكاسىنىڭ كۆازيمەملەكەتتىك سەكتورىنىڭ تيىمدىلىگىن ارتتىرۋعا مۇمكىندىك بەرەتىن «سامۇرىق-قازىنا» اق رەفورمالاۋ باعدارلاماسى تانىستىرىلدى, دەپ حابارلايدى Egemen.kz.
ءباسپاسوز ءماسليحاتىنا «سامۇرىق-قازىنا» اق باسقارما توراعاسى الماسادام ساتقاليەۆ قاتىستى.
ا.ساتقاليەۆتىڭ ايتۋىنشا, جىل باسىنان بەرى «سامۇرىق-قازىنا» قورى بىرقاتار كادرلىق رەفورمالاردى ىسكە اسىردى. نۇر-سۇلتان قالاسىنداعى كورپوراتيۆتىك ورتالىق قىزمەتكەرلەرىنىڭ سانى ەكى ەسەگە قىسقارتىلدى (248-دەن 124 ادامعا دەيىن), كومپانيالار توبىندا 106 كەڭەسشى جۇمىستان بوساتىلدى, «كەڭەسشىلەر» ينستيتۋتى ۇيىمدىق قۇرىلىمنان تولىعىمەن جويىلدى. قوردىڭ بارلىق شەتەلدىك وكىلدىكتەرى: لوندوندا, بەيجىڭدە, ابۋ-دابيدە جانە ماسكەۋدە جابىلدى. «سامۇرىق-قازىنا» توبىنداعى التى كومپانيانىڭ, ونىڭ ىشىندە «قازمۇنايگاز» بەن «QazaqGaz» كومپانياسىنىڭ باسشىلىعى وزگەردى. پەرسونالدى وڭتايلاندىرۋ «سامۇرىق-قازىنا» كورپوراتيۆتىك ورتالىعىنا 2 ميلليارد تەڭگەدەن استام قاراجاتتى ۇنەمدەۋگە مۇمكىندىك بەردى.
قور قىزمەتىنىڭ اشىقتىعىن قامتاماسىز ەتۋ جانە قارجىلىق-ەكونوميكالىق قۇقىق بۇزۋشىلىقتاردىڭ الدىن الۋ ماقساتىندا سىبايلاس جەمقورلىققا قارسى ءىس-قيمىل اگەنتتىگىمەن جانە قارجى مونيتورينگى اگەنتتىگىمەن ىنتىماقتاستىق تۋرالى مەموراندۋمدارعا قول قويىلدى. قوردىڭ قوعامدىق كەڭەسىنىڭ ءرولى كۇشەيتىلدى.
ايتا كەتسەك, 2022 جىلى قور جالاقىسى از ماماندىقتارعا نازار اۋدارا وتىرىپ, جۇمىسكەرلەردىڭ جالاقىسىن كوتەردى. توپتىڭ بارلىق كومپانيالارىنداعى (239 مىڭ جۇمىسشى مەن ينجەنەرلىك قىزمەتكەرلەر) وندىرىستىك پەرسونالدىڭ جالاقىسى 5 پايىزدان 48 پايىزعا دەيىن ءوستى. جىل سوڭىنا دەيىن تاعى ءتورت كومپانيا جۇمىسشىلاردىڭ جالاقىسىن قوسىمشا كوبەيتەدى.