2021 جىلى مەملەكەت الەۋمەتتىك تاپسىرىستارعا 14,5 ملرد تەڭگە ءبولدى. بۇل تۋرالى قر اقدم ازاماتتىق قوعام ىستەرى كوميتەتىنىڭ توراعاسى ماديار قوجاحمەت ايتتى, دەپ حابارلايدى Egemen.kz.
«ۇكىمەتتىك ەمەس ۇيىمداردىڭ مەملەكەتتىك الەۋمەتتىك تاپسىرىس, گرانتتار ارقىلى قارجىلىق قولداۋعا يە بولۋدا. ماسەلەن, بىلتىر مەملەكەت تەك قانا الەۋمەتتىك تاپسىرىستارعا 14,5 ملرد تەڭگە ءبولدى. ەلىمىز بويىنشا قوعامنىڭ سان ءتۇرلى باعىتى بويىنشا 2 مىڭعا جۋىق جوبا ىسكە استى. 500-دەن استام ۇيىم قارجى الدى. سونداي-اق جالپى كولەمى 1,5 ملرد تەڭگەنى قۇرايتىن 50-دەن استام گرانتتىق جوبا ىسكە اسىرىلدى», دەدى ول ورتالىق كوممۋنيكاتسيالار قىزمەتىندەگى ءباسپاسوز ءماسليحاتىندا.
ونىڭ اتاپ وتۋىنشە, قوعامدىق كەڭەستەردىڭ قىزمەتى جانداندىرىلدى. قوعامدىق كەڭەستەر تۋرالى زاڭناماعا كەڭەستەردىڭ ءرولىن ارتتىرۋ بولىگىندە وزگەرىستەر ەنگىزىلدى. وسى وزگەرتۋلەر كۆازيمەملەكەتتىك سەكتوردىڭ 13 سۋبەكتىسىندە قوعامدىق كەڭەستەر قۇرۋعا مۇمكىندىك بەردى.
«قازىرگى تاڭدا قوعامدىق كەڭەستەردىڭ سانى 253-كە جەتتى. ولارعا 3 مىڭنان استام ۇكىمەتتىك ەمەس ۇيىمداردىڭ وكىلدەرى قاتىسىپ, مەملەكەتتى باسقارۋعا ءوز ۇلەستەرىن قوسۋدا. 200-دەن استام كەڭەس ءوز قۇرامىن جاڭارتتى», دەدى م. قوجاحمەت.