بەلگىلى قازاقستاندىق رەجيسسەر بولات قالىمبەتوۆ تۇسىرگەن «مۇقاعالي» كوركەم ءفيلمى ءۇندىستاندا ناۋرىزدىڭ 18-25 ارالىعىندا وتەتىن 26-شى حالىقارالىق كەرالا كينوفەستيۆالىنىڭ «الەمدىك كينو» باعدارلاماسى شەڭبەرىندە كورسەتىلەدى. بۇل تۋرالى «قازاقفيلم» كينوستۋديانىڭ ءباسپاسوز قىزمەتى ءمالىم ەتتى, دەپ حابارلايدى Egemen.kz.
اتالعان بايقاۋدا بەرلين جانە كانن سىندى باسقا دا الەمدەگى بەدەلدى فەستيۆالدەردە جۇلدەلەرگە يە بولعان فيلمدەر ۇسىنىلادى. ەسكە سالايىق, قر مادەنيەت جانە سپورت مينيسترلىگى تاپسىرىسى بويىنشا ش.ايمانوۆ اتىنداعى «قازاقفيلم» اق تۇسىرگەن «مۇقاعالي» ءفيلمى قازاقتىڭ اقيىق اقىنى مۇقاعالي ماقاتاەۆ ءومىرىنىڭ سوڭعى جىلدارى تۋرالى باياندايدى.
ءفيلمنىڭ الەمدىك تۇساۋكەسەرى تالليندەگى «ا» ساناتىنداعى 25-ءشى حالىقارالىق «تەمنىە نوچي» (PÖFF) كينوفەستيۆالى شەڭبەرىندە ءوتتى. بايقاۋدىڭ نەگىزگى باعدارلاماسىنا قاتىسقان وتاندىق كينوتۋىندى ەكۋمەنيكالىق قازىلار القاسىنىڭ ارنايى جۇلدەسىنە يە بولدى.
بىلتىر قازان ايىندا بيوگرافيالىق دراما ەلىمىزدە پروكاتقا شىعىپ, كورەرمەننىڭ ىستىق ىقىلاسىنا يە بولعان. كەرالا حالىقارالىق كينوفەستيۆالى ءۇندىستاندا وتەتىن ەڭ ءىرى ءارى بەدەلدى بايقاۋلاردىڭ ءبىرى.
مادەني ءىس-شارا كەرالا شتاتىنىڭ مادەنيەت دەپارتامەنتى ۇيىمداستىرۋىمەن جىل سايىن جەلتوقسان ايىندا وتكىزىلەدى. بيىلعى فەستيۆال Covid-19 پاندەمياسىنا بايلانىستى ناۋرىز ايىنا اۋىستىرىلىپ, ءداستۇرلى فورماتتا وتكىزىلەتىن بولادى. فەستيۆال شەڭبەرىندە بارلىعى 180 فيلم كورسەتىلەدى.