قر پرەمەر-ءمينيسترى ءاليحان سمايىلوۆ ۇكىمەت وتىرىسىندا «سامۇرىق-قازىنا» قورىنىڭ مەملەكەتتىك ساتىپ الۋ شارالارىن رەتتەۋدى تاپسىردى, دەپ حابارلادى Egemen.kz.
ۇكىمەت باسشىسى پرەزيدەنت قاسىم-جومارت توقاەۆ مەملەكەتتىك قولداۋ شارالارىن كورسەتۋ تاسىلدەرى مەن كەيبىر دامۋ ينستيتۋتتارىنىڭ قىزمەتىن تۇبەگەيلى قايتا قاراۋدى تاپسىرعانىن ەسكە سالىپ, ۇلتتىق ەكونوميكا مينيسترلىگىنە مەملەكەتتىك ورگاندارمەن جانە «اتامەكەن» كاسىپكەرلەر پالاتاسىمەن بىرلەسىپ, شاعىن جانە ورتا بيزنەسكە مەملەكەتتىك قولداۋ شارالارىن كورسەتۋدىڭ اشىق ءارى تۇسىنىكتى مەحانيزمىن بارىنشا قىسقا مەرزىمدە دايىنداۋدى جۇكتەدى.
ء«ۇشىنشى. ۇلتتىق ەكونوميكا مينيسترلىگى ۇلتتىق بانكپەن جانە «اتامەكەن» كاسىپكەرلەر پالاتاسىمەن بىرلەسىپ, ينفلياتسياعا قارسى ارەكەت ەتۋ شارالارىنىڭ كەشەنىن جاڭارتىپ, قاۋلى جوباسى ۇكىمەتكە ەنگىزسىن.
ءتورتىنشى, «سامۇرىق-قازىنا» قورىنىڭ ساتىپ الۋ ءتارتىبىن تۇبەگەيلى قايتا قاراۋ قاجەت. مۇندا ءبىر كوزدەن الۋ تاسىلىمەن مەملەكەتتىك ساتىپ الۋ ۇلەسىن قىسقارتۋ ماسەلەسىن پىسىقتاۋ كەرەك. قارجى مينيسترلىگى اتالعان تاسىلمەن مەملەكەتتىك ساتىپ الۋدىڭ نەگىزدىلىگى بويىنشا تيىسىنشە باقىلاۋدى قامتاماسىز ەتسىن», دەدى ءاليحان سمايىلوۆ.
سونداي-اق, ول «سامۇرىق-قازىنا» قورىن قارجى مينيسترلىگىمەن, باسەكەلەستىكتى قورعاۋ اگەنتتىگىمەن بىرلەسىپ, قور مەن ونىڭ ەنشىلەس كومپانيالارىنىڭ ساتىپ الۋدى جۇزەگە اسىرۋ پروتسەسىن ءبىر قۇجات دەڭگەيىندە قايتا قاراۋعا مىندەتتەدى.