قوستاناي وبلىسىندا جىل باسىنان بەرى 443 ءسابي كوروناۆيرۋسپەن اۋىرىپ شىققان. قازىر وڭىردە 8 ءبۇلدىرشىن ينفەكتسيالىق ستاتسيوناردا جاتىر. وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى انجەلا بەكسۇلتانوۆانىڭ ايتۋىنشا, بۇگىندە قوستانايداعى ينفەكتسيالىق ورتالىقتا 50 شاقتى جۇكتى ايەل ەمدەلۋدە. ولاردىڭ ۇشەۋى جانساقتاۋ بولىمىندە جاتىر.
تاياۋدا عانا باس سانيتارلىق دارىگەر ەرلان قياسوۆ قول قويعان قاۋلىعا سايكەس, ەلىمىزدە 18 جاسقا دەيىنگى جاسوسپىرىمدەردى, جۇكتى جانە بالا ەمىزىپ وتىرعان ايەلدەردى Pfizer پرەپاراتىمەن ۆاكتسينالاۋ جونىندەگى ادىستەمەلىك ۇسىنىمدار بەكىتىلگەنى بەلگىلى. وسىعان وراي, قاراشا ايىنىڭ باسىندا 4 ملن Pfizer دوزاسى جەتكىزىلمەك. شەتەلدىك ۆاكتسينانىڭ توبىل وڭىرىنە ناقتى قاشان جەتكىزىلەتىنى ازىرگە بەلگىسىز. دەنساۋلىق ساقتاۋ باسقارماسىنىڭ وكىلدەرى ۆاكتسينانىڭ قازان ايىنىڭ سوڭىنا دەيىن كەلەتىنىن جانە 80 مىڭ ادامعا ەكپە سالىناتىنىن ايتىپ وتىر.
– دەنساۋلىق ساقتاۋ مينيسترلىگى بالالاردى ۆاكتسينالاۋ تۋرالى شەشىم قابىلداپ وتىر. ويتكەنى كەيىنگى كەزدە كوروناۆيرۋس جۇقتىرىپ جاتقان بالعىندار كوبەيىپ بارادى. بالالاردان كوبىنە ىندەت سيمپتومى بايقالمايدى. بۇل, اسىرەسە, قارت كىسىلەر مەن جۇكتى ايەلدەر ءۇشىن ۇلكەن قاۋىپ. الدىمەن 16 جاستان جوعارى جاسوسپىرىمدەر ۆاكتسينا قابىلدايدى دەپ جوسپارلاپ وتىرمىز. ودان كەيىنگى كەزەك تومەنگى جاستاعى بالالاردىكى. بالا ۆاكتسينا قابىلداماس بۇرىن, اتا-انا بالاسىنا ءوز ىقتيارىمەن ەكپە سالدىراتىنى تۋرالى كەلىسىمگە قول قويۋى كەرەك. بۇل جۇكتى ايەلدەرگە دە قاتىستى. اياعى اۋىر ايەلدەر جۇكتىلىك مەرزىمىنىڭ ەكىنشى جانە ءۇشىنشى ايلىعىندا عانا ەكپە قابىلدايدى. العاشقى ءۇش ايلىقتا ۆاكتسينا قابىلداۋعا بولمايدى. ەگەر ايەل جۇكتى ەكەنىن بىلمەي ۆاكتسينا السا, تولىق كۋرستى ەكىنشى جانە ءۇشىنشى تريمەستردە عانا اياقتاۋعا بولادى. بۇل ءۇشىن الدىن الا ەشبىر تالداۋ ناتيجەلەرىن تاپسىرۋدىڭ قاجەتى جوق, – دەدى وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى انجەلا بەكسۇلتانوۆا.
ونىڭ ايتۋىنشا, شەتەلدىك ۆاكتسينا ۇكىمەت قورىنىڭ ەسەبىنەن ساتىلىپ الىنعان. سوندىقتان ونى اياعى اۋىر ايەلدەر مەن بالا ەمىزىپ وتىرعان انالار عانا تەگىن قابىلداي الادى.
قوستاناي وبلىسى